ព័ត៌មានអន្ដរជាតិ

បងធំណាតូ ២ប្រទេស ប្រកាសអនុវត្តតាមដីកា ICC ចាប់ខ្លួនលោក Netanyahu

បានផុស

១១ ខែ មុន

នៅ

ថ្ងៃព្រហស្បតិ៍ ២៣ ឧសភា ២០២៤

ដោយ

តាមការចុះផ្សាយរបស់ RT, សមាជិកជាបងធំអង្គការណាតូ២ប្រទេស គឺអាល្លឺម៉ង់និងបារាំង បានចេញមុខអនុវត្តតាមសេចក្តីសម្រេចរបស់តុលាការឧក្រិដ្ឋកម្មអន្តរជាតិ ចាប់ខ្លួននាយករដ្ឋមន្ត្រីអ៊ីស្រាអែលលោក Benjamin Netanyahu ជុំវិញបទឧក្រិដ្ឋកម្មសង្រ្គាមប្រឆាំងនឹងប៉ាឡេស្ទីន

នាយករដ្ឋមន្ត្រីអ៊ីស្រាអែលលោក Benjamin Netanyahu (រូបថត៖ NBC)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទសារព័ត៌មានកាលពីថ្ងៃពុធទី២២ខែឧសភា អ្នកនាំពាក្យរដ្ឋាភិបាលអាល្លឺម៉ង់លោក Steffen Hebestreit បានប្រកាសយ៉ាងច្បាស់ថា ជាការពិត ទីក្រុងបែរឡាំង នឹងអនុវត្តតាមសាលដីការបស់ ICC ព្រោះវាគឺជាការគោរពច្បាប់។

ការបញ្ជាក់ជំហរបែបនេះ កើតឡើងបន្ទាប់ពីឯកអគ្គរដ្ឋទូតអ៊ីស្រាអែលប្រចាំទីក្រុងបែរឡាំង លោក Ron Prosor បានជំរុញឲ្យរដ្ឋបាលរបស់លោក Olaf Scholz ប្រឆាំងនឹង ICC។

ឯកអគ្គរដ្ឋទូតអ៊ីស្រាអែលប្រចាំទីក្រុងបែរឡាំង លោក Ron Prosor (រូបថត៖ DPA)

ត្បិតតែដីកាមិនទាន់ចេញក៏ពិតមែន ប៉ុន្តែរដ្ឋាភិបាលអ៊ីស្រាអែល បានឆ្លើយតបជាមុន ដោយចាត់ទុកសាលដីកានេះថាជាការប្រឆាំងនឹងជាតិសាសន៍ជ្វីហ្វ ហើយអំពាវនាវឲ្យប្រទេសស៊ីវិល័យទាំងឡាយ ធ្វើពហិការចំពោះបទបញ្ជាចាប់មេដឹកនាំរបស់ខ្លួន។

មិនមែនតែអាល្លឺម៉ង់ទេ, បារាំង ដែលស្ថិតក្នុងចំណោមប្រទេសទាំង ១២៤ ទទួលស្គាល់សិទ្ធិអំណាចរបស់ ICC ក៏បង្ហាញជំហរគាំទ្រសេចក្តីសម្រេចរបស់តុលាការនេះដូចគ្នា។ ជាក់ស្តែង កាលពីថ្ងៃអង្គារទី២១ ក្រសួងការបរទេសបារាំង បានបញ្ជាក់ពីការគាំទ្ររបស់ខ្លួនចំពោះ ICC ដោយនិយាយថា វាគឺស្រេចលើអង្គជំនុំជម្រះរបស់តុលាការ ដើម្បីសម្រេចថាតើត្រូវបញ្ជាឲ្យចាប់ខ្លួនមេដឹកនាំអ៊ីស្រាអែល និងក្រុមហាម៉ាស ដោយផ្អែកលើព័ស្តុតាងមានក្នុងដៃរដ្ឋអាជ្ញា ដែរឬក៏អត់។

តុលាការឧក្រិដ្ឋកម្មអន្តរជាតិ (រូបថត៖ Getty)

សូមរម្លឹកបន្តិច កាលពីដើមសប្តាហ៍នេះ ប្រធានរដ្ឋអាជ្ញា ICC លោក Karim Khan បានចោទប្រកាន់នាយករដ្ឋមន្ត្រីអ៊ីស្រាអែល Benjamin Netanyahu និងរដ្ឋមន្ត្រីការពារជាតិ Yoav Gallant ក៏ដូចជាមេដឹកនាំក្រុម ហាម៉ាស Yahya Sinwar, Ismail Haniyeh និង Mohammed Diab Ibrahim al-Masri ពីបទឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅក្នុង តំបន់ហ្គាហ្សានិងអ៊ីស្រាអែល។

ទោះបីជាយ៉ាងណាក៏ដោយ មិនបានប៉ុន្មានផង ការចោទប្រកាន់នេះស្រាប់តែមានប្រតិកម្មពីសហរដ្ឋអាមេរិកដល់ថ្នាក់សមាជិកសភា គំរាមដាក់ទណ្ឌកម្ម ICC ហើយលោកប្រធានាធិបតី ចូ បៃដិន ថ្កោលទោស ICC ទាំងខឹងសម្បាទៀតផង៕

អត្ថបទ៖ សុខ សុវណ្ណ

ចុចអាន៖ គ្រាន់ ICC បង្ហើបចង់ចាប់ខ្លួនលោក Netanyahu, អាមេរិក គំរាមដាក់ទណ្ឌកម្មភ្លែត