នាយករដ្ឋមន្ត្រីហៃទីថ្មី ធ្លាក់ខ្លួនឈឺប៉ុន្មានថ្ងៃបន្ទាប់ពីត្រូវបានជ្រើសរើសឱ្យដឹកនាំប្រទេស

នាយករដ្ឋមន្ត្រីទើបជ្រើសរើសថ្មីរបស់ប្រទេសហៃទី លោក Garry Conille ត្រូវបានសម្រាកព្យាបាលនៅមន្ទីរពេទ្យកាលពីល្ងាចថ្ងៃសៅរ៍ ក្នុងរដ្ឋធានី Port-au-Prince ប៉ុន្មានថ្ងៃបន្ទាប់ពីបានមកដល់ប្រទេសនេះ។ ​នេះបើយោងតាមការចេញផ្សាយរបស់ទីភ្នាក់ងារពត៌មាន AP នៅថ្ងៃទី​០៩ ខែ មិថុនា​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការិយាល័យនាយករដ្ឋមន្រ្តីបានឲ្យដឹងថាលោក Conille មានអារម្មណ៍មិនស្រួលខ្លួន បន្ទាប់ពីមមាញឹកពេញមួយសប្ដាហ៍និងកំពុងសម្រាកនៅមន្ទីរពេទ្យ ប៉ុន្តែមិនបានផ្តល់ព័ត៌មានលម្អិតពីស្ថានភាពជំងឺនោះទេ។ ខណៈអ្នកដែលជិតដិតជាមួយលោក Conille បាននិយាយក្នុងលក្ខខណ្ឌមិនបញ្ចេញឈ្មោះថា លោកបានកត់សម្គាល់ឃើញលោក Conille មានជំងឺហឺត ហើយជាញឹកញាប់ប្រើប្រដាប់ហឺតជាជំនួយក្នុងការដកដង្ហើម។

គួរបញ្ជាក់ថាលោកConille បានមកដល់ប្រទេសហៃទីនៅថ្ងៃទី ១ ខែមិថុនាក្រោយបានធ្វើការនៅក្រៅប្រទេសជានាយកប្រចាំតំបន់របស់ UNICEF សម្រាប់អាមេរិកឡាទីននិងការ៉ាប៊ីន តាំងពីខែមករាឆ្នាំ ២០២៣ ។ លោកធ្លាប់ធ្វើជានាយករដ្ឋមន្ត្រីនៃប្រទេសហៃទីពី២០១១ ឆ្នាំ ២០១២ ក្រោមការដឹកនាំរបស់ប្រធានាធិបតី លោក Michel Martelly ។

លោក Conille ត្រូវបានជ្រើសរើសជានាយករដ្ឋមន្ត្រីនៅថ្ងៃទី ២៨ខែឧសភា បន្ទាប់ពីដំណើរការជ្រើសរើសដ៏ចម្រូងចម្រាសមួយ។ លោកប្រឈមមុខនឹងការងារដ៏លំបាកមួយក្នុងនាមជាមេដឹកនាំថ្មីបំផុតរបស់ប្រទេសហៃទី រួមទាំងការលុបបំបាត់អំពើហិង្សាដែលកំពុងរីករាលដាល ខណៈដែលប្រទេសនេះរៀបចំការដាក់ពង្រាយកម្លាំងប៉ូលិសកេនយ៉ាដែលគាំទ្រដោយអង្គការសហប្រជាជាតិ តែត្រូវបានពន្យារពេលមួយផ្នែកដោយសារតែប្រទេសហៃទីខ្វះនាយករដ្ឋមន្ត្រី បន្ទាប់ពីអតីតនាយករដ្ឋមន្ត្រី Ariel Henry បានលាឈប់ពីតំណែង៕

អត្ថបទ៖ ប៊ុន សុភាព