មនុស្សយ៉ាងតិច២៤​នាក់​ស្លាប់ និង​៤០​នាក់​​របួស​ក្នុង​ហេតុការណ៍ផ្ទុះ​រថយន្ត​ដឹក​ប្រេង​​នៅ​​ហៃទី

មនុស្សយ៉ាងតិច២៥នាក់បានស្លាប់ និងប្រហែល៤០នាក់បានរងរបួស ក្នុងហេតុការណ៍ផ្ទុះរថយន្តដឹកប្រេងដ៏រន្ធត់មួយគ្រឿង នៅភាគខាងត្បូងប្រទេសហៃទី​ដែល​ប្រឈម​​អំពើ​ហិង្សា​ក្នុង​ប្រទេស​យ៉ាង​ធ្ងន់ធ្ងរ​។ យោងការចេញផ្សាយរបស់សារព័ត៌មាន Al Jazeera នៅថ្ងៃទី១៦ខែកញ្ញានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយករដ្ឋមន្ត្រីបណ្តោះអាសន្ន លោក Garry Conille បានឲ្យដឹងថា មានហេតុការណ៍ផ្ទុះរថយន្តដឹកប្រេងមួយនៅក្នុងតំបន់ Nippes ខណៈជនរងគ្រោះទាំងអស់ និងក្រុមគ្រួសាររបស់ពួកគេកំពុងត្រូវបានជម្លៀសតាមរយៈឧទ្ធម្ភាគចក្រ។ ចំនួនអ្នកស្លាប់ក្នុងការរាយការណ៍ដំបូងមានចំនួន​១៦នាក់ ខណៈមកដល់ពេលនេះមានចំនួន​យ៉ាងតិច២៤នាក់។

យោងតាមសាក្សី​និយាយ​ថា ការ​ផ្ទុះ​នេះ​បាន​កើត​ឡើង ខណៈ​ជន​រង​គ្រោះភាគច្រើនបាន​កំពុង​ព្យាយាមប្រមូលយក​ប្រេង​ដែល​លេច​ធ្លាយ​ចេញ​ពី​រថយន្ត​ ចំណែកអ្នកខ្លះទៀតកំពុងឈរមើលអំឡុងពេលដែលរថយន្តដឹកប្រេងនោះបានលេចធ្លាយប្រេង។

អ្នករងរបួសត្រូវបានបញ្ជូនទៅមន្ទីរពេទ្យ Sainte Therese ក្នុងទីក្រុងកំពង់ផែ Miragoane ចម្ងាយប្រហែល ១០០គីឡូម៉ែត្រ ភាគខាងលិចរដ្ឋធានី Port-au-Prince។ ចំណែកជនរងគ្រោះដែលស្ថិតក្នុងស្ថានភាពធ្ងន់ធ្ងរ នឹងត្រូវបញ្ជូនទៅព្យាបាលនៅមន្ទីរពេទ្យក្នុងតំបន់ផ្សេងទៀត។

គួរបញ្ជាក់ថានេះមិនមែនជាលើកទីមួយទេដែលប្រទេសហៃទីមានហេតុករណ៍ផ្ទុះរថយន្តដឹកប្រេងដ៏សាហាវបែបនេះ។ ក្នុងឆ្នាំ ២០២១ មនុស្សរាប់សិបនាក់បានស្លាប់នៅក្នុងទីក្រុង Cap-Haitien ភាគខាងជើង នៅពេលដែលរថយន្តដឹកប្រេងបានក្រឡាប់ ខណៈពេលដែលព្យាយាមគេចពីម៉ូតូ។

ស្របពេលប្រទេសនេះប្រឈមនឹងការខ្វះខាតប្រេងឥន្ធនៈកាន់តែធ្ងន់ធ្ងរឡើងដោយសារអំពើហិង្សារបស់ក្រុមក្មេងទំនើង ដែលបានកាន់កាប់ទីក្រុង Port-au-Prince និងតំបន់ផ្សេងៗទៀត។ ជាមួយគ្នានេះការដឹកជញ្ជូនប្រេងឥន្ធនៈទៅកាន់តំបន់ Miragoane បានថយចុះក្នុងប៉ុន្មានសប្តាហ៍ថ្មីៗនេះ ដោយសាររថយន្តដឹកទំនិញត្រូវបានដឹកជញ្ជូនតាមសាឡាង ដើម្បីជៀសវាងផ្លូវហាយវេដែលគ្រប់គ្រងដោយក្រុមក្មេងទំនើងជុំវិញទីក្រុង Port-au-Prince ៕

អត្ថបទ៖ ប៊ុន សុភាព