បក្សប្រឆាំងបង់ក្លាដែសទាមទារការបោះ​ឆ្នោត​ថ្មី​ឱ្យ​បាន​ឆាប់​ ប៉ុន្តែ​រដ្ឋាភិបាល​បណ្តោះអាសន្ន​​ធ្វើ​ហី​

សកម្មជននិងមេដឹកនាំគណបក្សជាតិនិយមបង់ក្លាដែសរាប់ពាន់នាក់បានប្រមូលផ្តុំគ្នាកាលពីថ្ងៃអង្គារក្នុងរដ្ឋធានីដាកា (Dhaka)​ ដើម្បីទាមទារឱ្យមានការផ្លាស់ប្តូរប្រជាធិបតេយ្យតាមរយៈការបោះឆ្នោត ខណៈដែលរដ្ឋាភិបាលបណ្តោះអាសន្នមិនទាន់បានកំណត់ពេលវេលាបោះឆ្នោតថ្មីនៅឡើយ។ យោងតាមការចេញផ្សាយរបស់ទីភ្នាក់ងារព័ត៌មានAPនៅថ្ងៃទី១៨ខែកញ្ញានេះ។

ក្រុមអ្នកគាំទ្របានប្រមូលផ្តុំគ្នានៅមុខទីស្នាក់ការកណ្តាលបក្ស BNP ក្នុងទីក្រុងដាកា​ជាកន្លែងដែលពួកគេបាន​​ស្រែកពាក្យ​ស្លោកទាមទារឱ្យមានការរៀបចំ​ការ​បោះឆ្នោត​ជា​ថ្មី។ រដ្ឋាភិបាលបណ្តោះអាសន្នដែលដឹកនាំដោយម្ចាស់ជ័យលាភីណូបែល លោក Muhammad Yunus បានដាក់ចេញនូវផែនការមួយចំនួនដើម្បីធ្វើកំណែទម្រង់វិស័យផ្សេងៗរបស់ប្រទេស ចាប់ពីគណៈកម្មការរៀបចំការបោះឆ្នោត រហូតដល់ស្ថាប័នហិរញ្ញវត្ថុ។ ប៉ុន្តែគណបក្សនយោបាយធំៗ រួមទាំងបក្ស BNP ដែលដឹកនាំដោយអតីតនាយករដ្ឋមន្ត្រី Khaleda Zia ចង់បានការបោះឆ្នោតថ្មីក្នុងពេលឆាប់ៗនេះ។

គួររម្លឹកថា លោក Yunus បានឡើងកាន់តំណែង បន្ទាប់ពីអតីតនាយករដ្ឋមន្ត្រី Sheikh Hasina បានភៀសខ្លួនចេញពីប្រទេសក្នុងអំឡុងពេលនៃការបះបោរដ៏ធំមួយកាលពីខែមុន ដែលបញ្ចប់ការកាន់អំណាចរយៈពេល១៥ឆ្នាំ។ ការ​តវ៉ា​បាន​ចាប់​ផ្តើម​ក្នុង​ខែ​កក្កដា ហើយ​បាន​ក្លាយ​ទៅ​ជា​ចលនា​ប្រឆាំង​រដ្ឋាភិបាល ដែលធ្វើឲ្យ Hasina បានរស់នៅក្នុងប្រទេសឥណ្ឌាតាំងពីពេលនោះមក។

ជាមួយគ្នានេះយោធាដ៏មានឥទ្ធិពលរបស់ប្រទេសក៏កំពុងដើរតួនាទីយ៉ាងសំខាន់ក្នុងការដំណើរការរដ្ឋបាល ដែលប្រឈមមុខនឹងបញ្ហាជាច្រើន រួមទាំងភាពចលាចលរបស់កម្មករនៅក្នុងវិស័យឧស្សាហកម្មកាត់ដេរ ច្បាប់ និង សណ្តាប់ធ្នាប់មិនស្ថិតស្ថេរ និងសេដ្ឋកិច្ចមិនមានភាពប្រាកដប្រជា។ នៅក្នុងសុន្ទរកថា នាពេលថ្មីៗនេះ លោក Yunus មិនបានរៀបរាប់​ថាតើនៅពេលណាដែលការបោះឆ្នោតជាតិថ្មីនឹងត្រូវធ្វើឡើងនោះទេ ហើយថា​ពួកគេនឹងបន្តកាន់អំណាចដរាបណាប្រជាជនចង់ឱ្យពួកគេបន្ត។

បើទោះបី បក្ស BNP ដំបូងឡើយទាមទារឱ្យមានការបោះឆ្នោតក្នុងរយៈពេលបីខែ ប៉ុន្តែក្រោយមកបាននិយាយថា ខ្លួនចង់ទុកពេលរដ្ឋាភិបាលបណ្តោះអាសន្នសម្រាប់កំណែទម្រង់។ ចំណែកគណបក្ស Jamaat-e-Islami ឥស្លាមដ៏សំខាន់​របស់ប្រទេស ដែលធ្លាប់ជាដៃគូសម្ព័ន្ធភាពជាផ្លូវការនៅក្រោមគណបក្សរបស់ Zia ក៏ចង់ផ្តល់ពេលវេលាដល់រដ្ឋាភិបាលដឹកនាំដោយ Yunus មុនពេលបោះឆ្នោតផងដែរ។

បន្ទាប់ពីការទម្លាក់លោកស្រី Sheikh Hasina ដែលបានកាន់តំណែងជានាយករដ្ឋមន្ត្រីតាំងពីឆ្នាំ២០០៩ស្ថានភាពនៅក្នុងប្រទេសបង់ក្លាដែសបានបន្តវិវឌ្ឍ ដោយមានការប្រកួតប្រជែងជាបន្តបន្ទាប់ ហើយការបណ្តេញលោកស្រី Sheikh Hasina បានកត់សម្គាល់ចំណុចរបត់ដ៏សំខាន់មួយនៅក្នុងប្រវត្តិសាស្ត្ររបស់ប្រទេស ដោយបានផ្លាស់ប្តូរទិដ្ឋភាពនយោបាយ សេដ្ឋកិច្ច និងសង្គមរបស់ខ្លួននៅក្នុងប៉ុន្មានឆ្នាំបន្ទាប់៕

អត្ថបទ៖ ប៊ុន សុភាព