វៀតណាម ជម្លៀសពលរដ្ឋរាប់ម៉ឺននាក់ព្រោះទឹកជំនន់ ខណៈមនុស្សស្លាប់ កើនដល់១២នាក់

ភាគកណ្តាលប្រទេសវៀតណាម មិនទាន់ធូរស្រាលពីឥទ្ធិពលព្យុះ ត្រាមី ឡើយ ព្រោះថា គិតត្រឹមពេលនេះ មានមនុស្សចំនួន១២នាក់ហើយដែលបាត់បង់ជីវិត និងរាប់ម៉ឺននាក់ត្រូវជម្លៀស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីឆក់យកជីវិតមនុស្សហើយនោះ គ្រោះធម្មជាតិនេះក៏បណ្តាលឲ្យមនុស្ស៧នាក់រងរបួស ​ពន្លិចកប៉ាល់ចំនួន៥គ្រឿងនិងជន់លិចផ្ទះប្រមាណ ៣៤ ០០០ខ្នងផងដែរនៅក្នុងខេត្ត ក្វាងប៊ិញ។ 

ព្យុះត្រាមី បានចាប់ផ្តើមវាយប្រហារប្រទេសវៀតណាម កាលពីសប្តាហ៍មុនជាមួយកម្លាំងខ្យល់ ៨៨គីឡូម៉ែត្រក្នុងមួយម៉ោង ហើយបើគិតក្នុងរយៈពេល៤ថ្ងៃកន្លងមកនេះ ឥទ្ធិពលរបស់វាបានបណ្តាលឲ្យមានភ្លៀងធ្លាក់ខ្លាំងនិងទឹកជំនន់ បង្ខំមនុស្សជាង៩ ២៩០គ្រួសារ ត្រូវជម្លៀសចេញពីផ្ទះសម្បែង។

ទោះយ៉ាងណា ត្បិតតំបន់ខ្លះហាក់ធូរស្បើយបន្តិចមែន ប៉ុន្តែកម្ពស់ទឹកទន្លេគៀនយ៉ាង នៅតែមានកម្រិតគ្រោះថ្នាក់ពោលគឺ ២.៣៥ម៉ែត្រ បង្កហានិភ័យដល់ប្រជាពលរដ្ឋ។

ទឹកជំនន់ក៏ បានបំផ្លាញដំណាំលើផ្ទៃដី ៧៩១ហិកតា, សម្លាប់មាន់ទាជាង ៧០ ៥០០ក្បាល និងសត្វពាហនៈជិត៥០០ក្បាល ថែមទាំងបំផ្លាញកសិដ្ឋានចិញ្ចឹមត្រីចំនួន៧១៦ហិកតាផងដែរ។

ទន្ទឹមនោះ គណៈកម្មាធិការបង្ការ ស្វែងរកនិងជួយសង្គ្រោះគ្រោះមហន្តរាយធម្មជាតិខេត្ត បានប៉ាន់ស្មានអំពីការខាតបង់ថាមានប្រហែល៥០០ពាន់លានដុង (១៩.៧លានដុល្លារអាមេរិក)៕

អត្ថបទ៖ សុខ សុវណ្ណ

ចុចអាន៖ វៀតណាម ចាប់ផ្តើមមានមនុស្សស្លាប់ ដោយសារព្យុះ ត្រាមី