ព្យុះ យីនស៊ីង ដ៏ខ្លាំង នឹងហោះទៅវាយប្រហារវៀតណាម ចុងសប្តាហ៍នេះ

តាមការចុះផ្សាយរបស់ VN Express នៅថ្ងៃព្រហស្បតិ៍ទី៧ខែវិច្ឆិកា, ប្រទេសវៀតណាម កំពុងត្រៀមខ្លួនទទួលព្យុះមួយទៀតឈ្មោះ យីនស៊ីង (Yinxing) ដែលនឹងវាយប្រហារឆ្នេរសមុទ្ររបស់ខ្លួនជាមួយកម្លាំងដ៏ខ្លាំង នៅចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណា មុនទៅដល់វៀតណាម ព្យុះយីនស៊ីង នឹងវាយប្រហារកោះ Luzon នៃប្រទេសហ្វីលីពីនសិន ជាមួយកម្លាំងខ្យល់១៨៣គីឡូម៉ែត្រក្នុងមួយម៉ោង។ 

អាស្រ័យហេតុដូច្នេះ ក្រសួងកសិកម្មនិងអភិវឌ្ឍន៍ជនបទវៀតណាម បានស្នើឲ្យខេត្តជាប់មាត់សមុទ្រដូចជាក្វាងនិញនិងប៊ិញថ្វឹន ត្រូវតាមដានឲ្យដិតដល់បំផុត នូវការវិវត្តនៃព្យុះទីហ្វុងនេះ ដើម្បីជូនដំណឹងដល់អ្នកនេសាទ កុំឲ្យចូលទៅក្នុងតំបន់គ្រោះថ្នាក់។

លើសពីនេះ ខេត្តនិងក្រុងនៅភាគកណ្តាល ក៏ត្រូវតែត្រៀមខ្លួនជម្លៀសប្រជាពលរដ្ឋនិងប្រុងជើងការជួយសង្គ្រោះផងដែរ ក្នុងករណីចាំបាច់ណាមួយ។

សូមបញ្ជាក់ថា ចាប់​តាំង​ពី​ដើម​ឆ្នាំ​មក សមុទ្រ​ចិនខាងត្បូង បានកកើត​ព្យុះ​ចំនួន៦ហើយ ខណៈព្យុះចុងក្រោយបំផុតគឺ ត្រាមី ដែលបោកបក់លើខេត្តធឿធៀនហ្វេ និងដាណាង កាលពីថ្ងៃទី២៧ខែតុលា ដោយបណ្តាលឲ្យមានភ្លៀងធ្លាក់ខ្លាំង នៅតំបន់ភាគកណ្តាល សម្លាប់មនុស្សចំនួន៨នាក់ របួស១៤នាក់ ខូចខាតផ្ទះជិត៣៣០ខ្នង ងាប់គោក្របីមាន់ទា ១ ៥០០ក្បាល និងជន់លិចផលដំណាំលើផ្ទៃដីជាង ១ ២០០ហិកតា។

កាលពីខែកញ្ញា វិទ្យាស្ថានឧតុនិយម ជលសាស្ត្រ និងបម្រែបម្រួលអាកាសធាតុវៀតណាម បានព្យាករថា សល់ប៉ុន្មានខែចុងក្រោយនៃឆ្នាំនេះ នឹងមានព្យុះប្រហែល៤ទៅ៥ទៀត ដែលនឹងកកើតនៅសមុទ្រចិនខាងត្បូង ហើយក្នុងនោះមានព្យុះ ២-៣ នឹងវាយប្រហារដីគោកវៀតណាម៕

អត្ថបទ៖ សុខ សុវណ្ណ

ចុចអាន៖ ទើបតែមកបានមួយថ្ងៃ ព្យុះទី២២ យីនស៊ីង បានវិវដ្ដទៅជាព្យុះសង្ឃរា