ផ្ទុះការបាញ់ប្រហារក្នុងពិធីជប់លៀងនៅអាមេរិក ស្លាប់ និងរងរបួសមនុស្ស ១៥ នាក់

យ៉ាងហោចណាស់មនុស្ស ១៥ នាក់ត្រូវបានបាញ់ប្រហារនៅឯពិធីជប់លៀងមួយកាលពីថ្ងៃអាទិត្យនៅសង្កាត់ Greater Grand Crossing ទីក្រុង Chicago ដែលបណ្តាលឲ្យមនុស្ស ២ នាក់ស្លាប់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជំនួយការគ្រូពេទ្យ Greg Stinnett បាននិយាយថា យ៉ាងហោចណាស់មនុស្ស ១៥ នាក់ត្រូវបានបាញ់ប្រហារនៅខាងក្នុងពិធីជប់លៀងមួយលើផ្លូវ South Chicago Avenue នាម៉ោងប្រហែល ៤ និង ៤០ នាទីព្រឹកថ្ងៃអាទិត្យ ។

លោក Stinnett បានបន្ថែមទៀតថា ចំនួនមនុស្សដែលត្រូវបានបាញ់ប្រហារនៅក្នុងហេតុការណ៍នេះត្រូវបានគេរំពឹងថានឹងកើនឡើង នៅពេលដែលជនរងគ្រោះកាន់តែច្រើនមកដល់មន្ទីរពេទ្យ ។ យោងតាមប៉ូលិសបានឲ្យដឹងថា ជនរងគ្រោះ ២ នាក់ត្រូវបានគេប្រកាសថាស្លាប់នៅពេលមកដល់មន្ទីរពេទ្យ ។

ប៉ូលិសបាននិយាយថា មកដល់ពេលនេះជនរងគ្រោះមានអាយុពី ២០ ឆ្នាំទៅ ៤៤ ឆ្នាំ ។

យោងតាមមន្រ្តីអគ្គិភ័យទីក្រុង Chicago បានឲ្យដឹងថា ជនរងគ្រោះចំនួន ៧ នាក់ត្រូវបានដឹកទៅមន្ទីរពេទ្យក្នុងស្ថានភាពធ្ងន់ធ្ងរ ខណៈជនរងគ្រោះមានទាំងបុរស និងស្ត្រីពេញវ័យ ។

ឧប្បត្តិហេតុនេះគឺជាលើកទី ២ ហើយក្នុងរយៈពេលមិនដល់មួយឆ្នាំផងដែលមនុស្ស ១៥ នាក់ត្រូវបានបាញ់ប្រហារនៅក្នុងឧប្បត្តិហេតុតែមួយនៅទីក្រុង Chicago បន្ទាប់ពីមានការបាញ់ប្រហារមនុស្ស ១៥ នាក់នៅខាងក្រៅផ្ទះបុណ្យសពមួយកន្លែងកាលពីខែកក្កដាឆ្នាំមុន ខណៈរហូតមកដល់ពេលនេះការស៊ើបអង្កេត និងការសួរចម្លើយរបស់ប៉ូលិសកំពុងដំណើរការ ៕

ប្រែសម្រួលដោយ ៖ ជីវ័ន្ត

ប្រភព ៖ Mytwintiers

ចុចអាន ៖ ផ្ទុះការបាញ់ប្រហារក្នុងហាងលក់កាំភ្លើងនៅអាមេរិក ស្លាប់ ៣ នាក់

ចុចអាន ៖ ផ្ទុះការបាញ់ប្រហារនៅក្បែរទីក្រុង Chicago ស្លាប់ ៣ នាក់ របួស ៣ នាក់