ព័ត៌មានអន្ដរជាតិ

UN៖ មួយថ្ងៃៗ ពិភពលោកខាតបង់១ពាន់លានដុល្លារ ព្រោះគ្រោះរាំងស្ងួត

បានផុស

២ years មុន

នៅ

ថ្ងៃពុធ ៤ ធ្នូ ២០២៤

ដោយ

Chheang

អង្គការសហប្រជាជាតិ បានព្រមានកាលពីថ្ងៃអង្គារថា គ្រោះរាំងស្ងួតធ្វើឲ្យពិភពលោកខាតបង់ជាង ៣០០ពាន់លានដុល្លារក្នុងមួយឆ្នាំៗ ដែលតម្រូវឲ្យមានការវិនិយោគលើដំណោះស្រាយជាបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យនៃការខាតបង់ដោយសារគ្រោះរាំងស្ងួតនេះ បានធ្វើឡើងនៅក្នុងរបាយការណ៍ដែលបានដាក់ចេញដោយអនុសញ្ញារបស់អង្គការសហប្រជាជាតិដើម្បីប្រយុទ្ធប្រឆាំងនឹងរហោស្ថានកម្ម (UNCCD) នៅសន្និសីទក្នុងទីក្រុងរីយ៉ាដ ប្រទេសអារ៉ាប៊ីសាអូឌីត។

របាយការណ៍ បានលើកឡើងថា ពិភពលោក «ត្រូវការប្រាក់ចំនួន ១ពាន់លានដុល្លារជារៀងរាល់ថ្ងៃ ដើម្បីប្រយុទ្ធប្រឆាំងនឹងរហោស្ថានកម្ម ការខូចគុណភាពដី និងគ្រោះរាំងស្ងួតនៅចន្លោះឆ្នាំ២០២៥ និងឆ្នាំ២០៣០»។

របាយការណ៍ដដែល បានព្រមានថា គ្រោះរាំងស្ងួតដែលបណ្តាលមកពី «ការបំផ្លិចបំផ្លាញបរិស្ថានរបស់មនុស្ស» នឹងប៉ះពាល់ដល់ «មនុស្ស៣នាក់ក្នុងចំណោមមនុស្ស៤នាក់នៅទូទាំងពិភពលោក» ឬ ៧៥% នៃចំនួនប្រជាជនពិភពលោកសរុបនៅឆ្នាំ២០២៥។

របាយការណ៍ បានណែនាំថា ដំណោះស្រាយចំពោះគ្រោះរាំងស្ងួតគឺស្ថិតនៅក្នុងការវិនិយោគលើ «ដំណោះស្រាយផ្អែកលើធម្មជាតិ» ដូចជា «ការដាំដើមឈើឡើងវិញ ការគ្រប់គ្រងវាលស្មៅ ព្រមទាំងការគ្រប់គ្រង ការស្ដារឡើងវិញ និងការអភិរក្សអាងបង្ហូរទឹក»៕

ដោយ៖ ឈាង