ត្រាំ គំរាមឈប់ធ្វើជំនួញជាមួយប្រទេសណា ដែលមិនព្រមទទួលយកជនអន្តោប្រវេសន៍ ទៅវិញ

ប្រទេសជាច្រើនបានបង្ហាញក្តីបារម្ភ ចំពោះគោលនយោបាយបណ្តេញជនអន្តោប្រវេសន៍ចេញពីសហរដ្ឋអាមេរិក របស់លោក ដូណាល់ ត្រាំ ហើយក្នុងបទសម្ភាសន៍ជាមួយទស្សនាវដ្តី Time កាលពីថ្ងៃព្រហស្បតិ៍ទី១២ខែធ្នូឆ្នាំ២០២៤ ប្រធានាធិបតីជាប់ឆ្នោតអាមេរិករូបនេះ ថែមទាំងគំរាមទៀតថា បើប្រទេសណាមិនទទួលយកជនអន្តោប្រវេសន៍របស់ខ្លួនទៅវិញ លោកនឹងឈប់ធ្វើជំនួញជាមួយប្រទេសនោះតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ប្រកាសថា «ខ្ញុំនឹងបញ្ជូនពួកគេត្រឡប់ទៅប្រទេសពួកគេវិញ ឬបើមិនដូច្នោះទេ យើងនឹងឈប់ធ្វើជំនួញជាមួយប្រទេសទាំងនោះតែម្តង។ ខ្ញុំចង់ឲ្យពួកគេចេញ ហើយបើប្រទេសណាមិនទទួលវិញនោះ អាមេរិកនឹងដាក់ពន្ធយ៉ាងធ្ងន់លើពួកគេ។ ពេលពួកគេនាំចេញទំនិញ ពួកគេនឹងត្រូវបង់ពន្ធខ្ពស់ ដូច្នេះពួកគេនឹងពិបាកធ្វើជំនួញជាមួយអាមេរិកណាស់»។

បញ្ហាធំ២ដែលលោក ត្រាំ ទទួលបានការគាំទ្រនិងកើនប្រជាប្រិយភាពខ្លាំង ឈានទៅដល់ការឈ្នះឆ្នោតប្រធានាធិបតីអាមេរិកអាណត្តិថ្មី គឺសន្តិសុខព្រំដែននិងអន្តោប្រវេសន៍នេះឯង។

ក្នុងអំឡុងយុទ្ធនាការឃោសនាបោះឆ្នោត លោកប្រកាសថា ជនអន្តោប្រវសន៍ខុសច្បាប់ កំពុងឈ្លានពានអាមេរិក ហើយស្តីបន្ទោសប្រទេសផ្សេងៗថា ដោះលែងអ្នកទោសនិងអនុញ្ញាតឲ្យមនុស្សមានប្រវត្តិមិនល្អ ធ្វើដំណើរមកសហរដ្ឋអាមេរិក។

កាលពីខែមុន លោក ត្រាំ ថែមទាំងគំរាមប្រកាសច្បាប់គ្រាអាសន្ន ហើយមានគម្រោងប្រើកម្លាំងទ័ព ដើម្បីធ្វើប្រតិបត្តិការបណ្តេញជនអន្តោប្រវេសន៍ខុសច្បាស់ ចេញពីទឹកដីអាមេរិកទៀតផង។

យោងតាមទិន្នន័យឆ្នាំ២០២២របស់វិទ្យាស្ថាន Pew Research, មានមនុស្សប្រមាណ១១លាននាក់ កំពុងរស់នៅក្នុងសហរដ្ឋអាមេរិកដោយខុសច្បាស់។ ការធ្វើចំណាកស្រុកទៅកាន់ព្រំដែនសហរដ្ឋអាមេរិកបានឈានដល់កម្រិតកំណត់ត្រាក្នុងឆ្នាំ២០២២និង២០២៣ មុនពេលធ្លាក់ចុះមកវិញនៅឆ្នាំ២០២៤៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រកាសប្រើកម្លាំងទ័ព បណ្តេញជនអន្តោប្រវេសន៍ខុសច្បាស់ ចេញពីទឹកដីអាមេរិក