ការសិក្សាថ្មីបង្ហាញថា អ្នកជំងឺកូវីដបន្តរោគសញ្ញាយ៉ាងហោច៣ខែ ក្រោយចេញពីមន្ទីរពេទ្យ

របាយការណ៍មួយដែលចេញផ្សាយដោយរដ្ឋាភិបាលអង់គ្លេសបានរកឃើញថា អ្នកជំងឺកូវីដម្នាក់ក្នុងចំណោម ១០ នាក់ នៅមានអាការឈឺចាប់រាប់ខែ បន្ទាប់ពីរកឃើញឆ្លងដំបូង។

វិទ្យាស្ថានជាតិស្រាវជ្រាវសុខភាព (NIHR) បានធ្វើការវិភាគលើឯកសារវិទ្យាសាស្ត្រជាង ៣០០ មកពីជុំវិញពិភពលោក អំពីរោគសញ្ញាផ្សេងៗ ​ក្រោយពេលជាពីជំងឺកូវីដ-១៩។

ការស្រាវជ្រាវបានរកឃើញថា ប្រហែល ១០% នៃអ្នកជាសះស្បើយនៅមានអាការឈឺចាប់យ៉ាងហោចបីខែ ក្រោយចេញពីមន្ទីរពេទ្យ។

ក្នុងនោះបញ្ហាទូទៅរបស់អ្នកជំងឺរួមមាន អស់កម្លាំង ពិបាកដកដង្ហើម និងអារម្មណ៍មិនមូល។ ប្រសិនបើរោគសញ្ញាធ្ងន់ធ្ងរអ្នកជំងឺអាចប៉ះពាល់ខូចសរីរាង្គមួយចំនួន មានការថប់បារម្ភ និងរងជំងឺធ្លាក់ទឹកចិត្ត។

ដោយឡែក ៦០-៩០% នៃអ្នកដែលធ្លាប់សម្រាកព្យាបាលនៅមន្ទីរពេទ្យ ការសិក្សាដដែលបានឱ្យដឹងថា នឹងមានអាការឈឺចាប់ប្រមាណពីរខែទៀត ក្រោយត្រឡប់ទៅផ្ទះវិញ។

ទោះជាយ៉ាងណា NIHR និយាយថា អ្នកជំងឺមិនមានរោគសញ្ញាដូចគ្នាទេ ហើយពួកគេក៏មានតម្រូវការព្យាបាលខុសៗគ្នាផងដែរ។

ក្នុងនោះ NIHR បញ្ជាក់ដែរថា រោគសញ្ញាកូវីដបន្តលេចឡើងត្រឹម ១០% នៃអ្នកជំងឺប៉ុណ្ណោះ ហើយយ៉ាងយូរត្រឹមរយៈពេលបីខែ បន្ទាប់ពីធ្វើរោគវិនិច្ឆ័យ៕

ប្រែសម្រួល៖ សន្យា

ប្រភព៖ Daily Mail

ចុចអាន៖ ការសិក្សា៖ ស្ត្រីវ័យក្មេងរងផលប៉ះពាល់ខ្លាំងជាងបុរស ក្រោយចាក់វ៉ាក់សាំងកូវីដ