ព័ត៌មានអន្ដរជាតិ

មុនបញ្ចប់អាណត្តិ រដ្ឋបាលបៃដិនដាក់ទណ្ឌកម្មមន្ត្រីមានឥទ្ធិពលរបស់ហុងគ្រី

បានផុស

១ year មុន

នៅ

ថ្ងៃសុក្រ ១០ មករា ២០២៥

ដោយ

ក្រសួងរតនាគារសហរដ្ឋអាមេរិក បានប្រកាសឲ្យដឹងថា ខ្លួនបានដាក់ទណ្ឌកម្មលើលោក Antal Rogan ជារដ្ឋមន្ត្រីទទួលបន្ទុកការិយាល័យគណៈរដ្ឋមន្ត្រី និងជាបុរសដ៏មានឥទ្ធិពលបំផុតម្នាក់នៅក្នុងរដ្ឋាភិបាលរបស់នាយករដ្ឋមន្ត្រីហុងគ្រី លោក Viktor Orban ដែលស្និទ្ធនឹងលោក វ៉្លាឌីមៀរ ពូទីន។

សេចក្តីរាយការរបស់ BBC បានឲ្យដឹងថា ការដាក់ទណ្ឌកម្មនេះវាគឺជាការផ្លាស់ប្តូរដ៏កម្រមួយរវាងសម្ព័ន្ធមិត្តណាតូ និងជានិមិត្តរូបនៃទំនាក់ទំនងរវាងសហរដ្ឋអាមេរិក និងហុងគ្រី ដែលបានធ្លាក់ចុះចាប់តាំងពីការឈ្លានពានរបស់រុស្ស៊ីលើអ៊ុយក្រែនជិតបីឆ្នាំមុន។

បើតាមសេចក្តីថ្លែងការណ៍ដែលធ្វើឡើងដោយឯកអគ្គរដ្ឋទូតអាមេរិក លោក David Pressman ដែលនឹងចាកចេញប្រទេសនេះបានឲ្យដឹងថា៖«លោក Antal Rogan គឺជាស្ថាបត្យករចម្បង អ្នកអនុវត្ត និងអ្នកទទួលផលពីប្រព័ន្ធនៃអំពើពុករលួយ»។

លោក Pressman នឹងចាកចេញពីរដ្ឋធានី Budapest របស់ហុងគ្រីនៅសប្តាហ៍ក្រោយ បន្ទាប់ពីចំណាយពេល២ឆ្នាំកន្លះក្នុងនាមជាអ្នកការទូតដ៏សកម្ម ធ្វើដំណើរប្រទេស និងរិះគន់រដ្ឋាភិបាល Orban ជាញឹកញាប់។ ការចាកចេញរបស់គាត់កើតឡើងប៉ុន្មានថ្ងៃមុនការវិលត្រឡប់របស់លោក ដូណាល់ ត្រាំ ទៅកាន់សេតវិមាន ខណៈប្រធានាធិបតីទើបជាប់ឆ្នោតមានទស្សនៈវិជ្ជមានលើលោក Viktor Orban ជាងរដ្ឋបាលលោកបៃដិន ។

ពាក់ព័ន្ធបញ្ហានេះ រដ្ឋមន្ត្រីការបរទេសហុងគ្រី លោក Peter Szijjarto បានចេញសេចក្ដីថ្លែងការណ៍វាយប្រហារឯកអគ្គរដ្ឋទូតអាមេរិកភ្លាមៗ ដោយលើកឡើងថា៖«នេះគឺជាការសងសឹកផ្ទាល់ខ្លួនរបស់ឯកអគ្គរដ្ឋទូតដែលត្រូវបានបញ្ជូនទៅកាន់ប្រទេសហុងគ្រីដោយរដ្ឋបាលសហរដ្ឋអាមេរិកដែលបរាជ័យ ហើយការងាររបស់លោកគ្មានជោគជ័យ និងគួរឱ្យអាម៉ាស់ ខណៈវានឹងល្អប៉ុនណាពេលដែលក្នុងរយៈពេលពីរបីថ្ងៃទៀត សហរដ្ឋអាមេរិកនឹងត្រូវបានដឹកនាំដោយអ្នកដែលមើលឃើញប្រទេសរបស់យើងជាមិត្ត និងមិនមែនជាសត្រូវ»។

ទោះបីយ៉ាងក៏ដោយ នៅមានសំណួរចំពោះតំណែងប្រធានាធិបតីរបស់លោក ត្រាំ ដែលនឹងចូលមកដល់ និងឯកអគ្គរដ្ឋទូតបន្ទាប់របស់ខ្លួនប្រចាំនៅទីក្រុង Budapest ថាតើពួកគេនឹងលុបចោលទណ្ឌកម្មប្រឆាំងនឹងលោក Antal Rogan ភ្លាមៗដែរឬទេ៕