លោក ស៊ី និង​លោក ពូទីន ពិភាក្សា​គ្នា​ពី​ទំនាក់ទំនង​ជាមួយ ត្រាំ អ៊ុយក្រែន និង​តៃវ៉ាន់

ប្រធានាធិបតីរុស្ស៊ី លោក វ្ល៉ាឌីមៀរ ពូទីន និងប្រធានាធិបតីចិន លោក ស៊ី ជីនពីង បានធ្វើសន្និសីទវីដេអូមួយកាលពីថ្ងៃទី​២១​ខែមករា​ឆ្នាំ​២០២៥ ដើម្បីពិភាក្សាអំពីការពង្រឹងភាពជាដៃគូរបស់ប្រទេសពួកគេ លទ្ធភាពនៃកិច្ចព្រមព្រៀងសន្តិភាពនៅអ៊ុយក្រែន និងការគាំទ្រឥត​ងាករេ​របស់ទីក្រុងមូស្គូសម្រាប់ទីក្រុងប៉េកាំងចំពោះ​បញ្ហាជាមួយ​​កោះតៃវ៉ាន់។

មេដឹកនាំ​ទាំង​ពីរ ដែលបានបង្កើតភាពជាដៃគូ «គ្មានដែនកំណត់» ចាប់តាំងពីឆ្នាំ​២០២២ បានបង្ហាញចំណាប់អារម្មណ៍ទៅវិញទៅមកក្នុងការកសាងទំនាក់ទំនងជាមួយសហរដ្ឋអាមេរិកក្រោមការដឹកនាំ​ថ្មី​របស់ប្រធានាធិបតី ដូណាល់ ត្រាំ បើរដ្ឋបាលរបស់គាត់បង្ហាញពីឆន្ទៈសម្រាប់កិច្ចសហប្រតិបត្តិការ។

លោក ពូទីន បានសង្កត់ធ្ងន់ថា រុស្ស៊ីស្វែងរកដំណោះស្រាយសន្តិភាពយូរអង្វែងនៅអ៊ុយក្រែន មិនមែនគ្រាន់តែជាបទឈប់បាញ់នោះទេ ហើយបានកត់សម្គាល់ថា កិច្ចព្រមព្រៀងណាមួយត្រូវតែស្របតាមផលប្រយោជន៍របស់រុស្ស៊ី។ ខណៈពេលដែលលោក ស៊ី បានពិភាក្សាអំពីការហៅទូរស័ព្ទនាពេលថ្មីៗនេះជាមួយលោក ត្រាំ ដែលផ្តោតលើប្រធានបទដូចជា TikTok ពាណិជ្ជកម្ម និងតៃវ៉ាន់ មេដឹកនាំទាំងពីរបានរំលឹកឡើងវិញនូវបំណងរបស់ពួកគេសម្រាប់ការសន្ទនាប្រកបដោយការស្ថាបនាជាមួយសហរដ្ឋអាមេរិកស្តីពីជម្លោះ​​នៅ​អ៊ុយក្រែន។

សម្ព័ន្ធភាពជិតស្និទ្ធរបស់លោក ស៊ី និងលោក ពូទីន បានបង្កើនការព្រួយបារម្ភនៅលោកខាងលិច ដោយក្រុមអ្នកវិភាគបានពណ៌នាថាវាជា «សម្ព័ន្ធភាពដែលមិនបានប្រកាស​ឲ្យ​គេ​ដឹង​ឮ​​ដ៏​សំខាន់បំផុតនៅក្នុងពិភពលោក»។ អ្នក​ជំនាញ​ខ្លះ​ជឿ​ថា ឥទ្ធិពល​របស់​លោក ស៊ី អាច​ដើរ​តួនាទី​សំខាន់​ក្នុង​ការ​បញ្ចប់​សង្រ្គាម​នៅ​អ៊ុយក្រែន ដែល​ជា​គោល​ដៅ​មួយ​ដែល​លោក ត្រាំ ក៏​បាន​បង្ហាញ​ចំណាប់​អារម្មណ៍​ក្នុង​ការ​សម្រេច​​ឲ្យ​បាន​ផង​ដែរ៕

ដោយ៖ ឈាង