ព័ត៌មានអន្ដរជាតិ

លោក Duterte ត្រៀមបង្ហាញខ្លួននៅមុខតុលាការ ICC ជាលើកដំបូង នៅថ្ងៃសុក្រនេះ

បានផុស

១ year មុន

នៅ

ថ្ងៃសុក្រ ១៤ មីនា ២០២៥

ដោយ

Chheang

អតីតប្រធានាធិបតីហ្វីលីពីន លោក Rodrigo Duterte គ្រោងនឹងបង្ហាញខ្លួនដំបូងនៅចំពោះមុខតុលាការឧក្រិដ្ឋកម្មអន្តរជាតិ (ICC) ក្នុងទីក្រុងឡាអេ នៅថ្ងៃរសៀលសុក្រទី១៤ខែមីនាឆ្នាំ២០២៥ (ម៉ោងនៅប្រទេសហូឡង់ ត្រូវម៉ោង៨យប់ថ្ងៃសុក្រ ម៉ោងនៅកម្ពុជា)។

សវនាការនេះ ធ្វើឡើងបន្ទាប់ពីការចាប់ខ្លួនគាត់នៅទីក្រុងម៉ានីលកាលពីថ្ងៃទី១១ខែមីនា ក្រោមដីការបស់ ICC ចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិទាក់ទងនឹង «សង្រ្គាមលើគ្រឿងញៀន» ដែលបានបណ្តាលឲ្យមនុស្សរាប់ពាន់នាក់បានស្លាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសវនាការ អតីតមេដឹកនាំវ័យ៧៩ឆ្នាំ នឹងត្រូវតុលាការប្រកាសពីឧក្រិដ្ឋកម្មដែលគាត់ត្រូវបានគេចោទប្រកាន់ ក៏ដូចជាសិទ្ធិរបស់គាត់ក្នុងនាមជាចុងចោទ។

ការចោទប្រកាន់របស់ ICC ប្រឆាំងនឹងលោក Duterte កើតចេញពីការសម្លាប់ក្រៅប្រព័ន្ធតុលាការក្នុងអំឡុងពេលយុទ្ធនាការប្រឆាំងគ្រឿងញៀនរបស់គាត់ ដែលអ្នករិះគន់បានអះអាងថាបានបណ្តាលឲ្យមនុស្សស្លាប់រហូតដល់ ៣០ ០០០នាក់។ នេះជាលើកទីមួយហើយដែលអតីតមេដឹកនាំមកពីប្រទេសអាស៊ីបានប្រឈមមុខនឹងការចោទប្រកាន់ដែលដាក់ដោយ ICC។

ការចាប់ខ្លួននេះ បានបង្កើនភាពតានតឹងផ្នែកនយោបាយនៅក្នុងប្រទេសហ្វីលីពីន ជាពិសេសរវាងក្រុមគ្រួសារនយោបាយរបស់លោក Duterte និងក្រុមគ្រួសាររបស់លោកប្រធានាធិបតីបច្ចុប្បន្ន Ferdinand Marcos។ កូនស្រីរបស់លោក Duterte ឈ្មោះ Sara Durterte ដែលជាអនុប្រធានាធិបតី ក៏កំពុងប្រឈមមុខនឹងការចោទប្រកាន់ពាក់ព័ន្ធនឹងការប៉ុនប៉ងធ្វើឃាតប្រឆាំងនឹងលោក Marcos ផងដែរ។

ក្រុមអ្នកច្បាប់របស់លោក Duterte បានទំទាស់នឹងយុត្តាធិការរបស់ ICC ដោយលើកឡើងពីការដកខ្លួនរបស់ហ្វីលីពីនចេញពីលក្ខន្តិកៈទីក្រុងរ៉ូមក្នុងឆ្នាំ២០១៩។ ទោះជាយ៉ាងណាក៏ដោយ ICC បានច្រានចោលដោយរក្សាសិទ្ធិអំណាចលើឧក្រិដ្ឋកម្មដែលបានប្រព្រឹត្តនៅមុនការដកខ្លួន៕

ដោយ៖ ឈាង

ចុចអាន៖ មេដឹកនាំអាស៊ី ៤រូប ដែល ICC ចេញដីកាចាប់ខ្លួន ជុំវិញបទឧក្រិដ្ឋកម្មប្រឆាំងមនុស្សជាតិ