ព័ត៌មានអន្ដរជាតិ

អាស៊ាន ប្រទេសឈូងសមុទ្រពែរ្ស និង ចិន បើកកិច្ចប្រជុំកំពូលដ៏សំខាន់ ចំពេលសង្គ្រាមពន្ធគយជាមួយអាមេរិក

បានផុស

២ ម៉ោង មុន

នៅ

ថ្ងៃពុធ ២៨ ឧសភា ២០២៥

ដោយ

ប្លុកអាស៊ានដែលជាសមាគមប្រជាជាតិនៅអាស៊ីអាគ្នេយ៍ បានបើកកិច្ចប្រជុំកំពូលត្រីភាគីជាប្រវត្តិសាស្ត្រកាលពីថ្ងៃអង្គារជាមួយប្រទេសចិន និងប្រទេសក្នុងក្រុមប្រឹក្សាសហប្រតិបត្តិការឈូងសមុទ្រពែរ្ស (GCC) ក្នុងគោលបំណងធ្វើឱ្យទំនាក់ទំនងសេដ្ឋកិច្ចកាន់តែស៊ីជម្រៅ និងពង្រឹងភាពធន់ ចំពេលមានការកើនឡើងនូវភាពមិនប្រាកដប្រជានៃពាណិជ្ជកម្មសកលដែលបណ្តាលមកពីការគំរាមកំហែងពន្ធរបស់សហរដ្ឋអាមេរិក។ នេះបើយោងតាមការចេញផ្សាយរបស់ទីភ្នាក់ងារព័ត៌មានAP នៅថ្ងៃទី២៨ខែឧសភានេះ។

(មេដឹកនាំអាស៊ាន ប្រទេសពីឈូងសមុទ្រពែរ្ស និងចិន ចាប់ដៃគ្នា។ រូបភាព៖ AP

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំកំពូលនេះបានធ្វើឡើងនៅទីក្រុងកូឡាឡាំពួរ ប្រទេសម៉ាឡេស៊ី ដែលប្រមូលផ្តុំមេដឹកនាំមកពីប្រទេសអាស៊ានទាំង១០ នាយករដ្ឋមន្ត្រីចិន និងមេដឹកនាំ ប្រទេស GCC ដែលសម្បូរប្រេងចំនួន៦ប្រទេស។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលជាប្រធានប្តូរវេនអាស៊ាននៅឆ្នាំនេះបានសាទរចំពោះកិច្ចប្រជុំនេះថាជា «ជំពូកថ្មីនៃកិច្ចសហប្រតិបត្តិការ» ដោយសង្កត់ធ្ងន់លើផលិតផលក្នុងស្រុកសរុប២៥ពាន់ពាន់លានដុល្លារ និងទីផ្សារនៃប្រជាជនជាង២ ពាន់លាននាក់ក្នុងតំបន់ទាំងបី។

នាយករដ្ឋមន្ត្រីចិន លោក លី ឈាង (Li Qiang) បានបន្ទរពីមនោសញ្ចេតនានេះ ដោយសន្យាថា នឹងមានកិច្ចសហប្រតិបត្តិការសេដ្ឋកិច្ច និងយុទ្ធសាស្ត្រកាន់តែរឹងមាំ។ ប្រទេសចិនដែលជាដៃគូពាណិជ្ជកម្មកំពូលរបស់អាស៊ានមើលឃើញថា GCC មានសារៈសំខាន់សម្រាប់ការនាំចូលថាមពល ដោយជាងមួយភាគបីនៃប្រេងឆៅរបស់ចិនបាននាំចូលមកពីបណ្តាញប្រទេសឈូងសមុទ្រនេះ។ ក្រោយមក លោក អាន់វ៉ា បានបង្ហើបថា អាស៊ាន និង GCC គ្រោងនឹងចាប់ផ្តើមកិច្ចពិភាក្សាស្តីពីកិច្ចព្រមព្រៀងពាណិជ្ជកម្មសេរីដ៏មានសក្តានុពលមួយ។

គួរបញ្ជាក់ថា កិច្ចប្រជុំនេះកើតឡើងនៅពេលដែលការគំរាមកំហែងពន្ធគយនាពេលថ្មីៗនេះរបស់ប្រធានាធិបតីអាមេរិកលោក ដូណាល់ ត្រាំ ដែលប៉ះពាល់ដល់ប្រទេសអាស៊ានចំនួនប្រាំមួយដែលមានអត្រាខ្ពស់ដល់ទៅ ៤៩% បានធ្វើឱ្យសេដ្ឋកិច្ចក្នុងតំបន់មានភាពតានតឹង។ ខណៈពេលដែលការព្យួររយៈពេល ៩០ថ្ងៃលើពន្ធគយ និងការបន្ធូរបន្ថយភាពតានតឹងពាណិជ្ជកម្មជាមួយប្រទេសចិនផ្តល់នូវការធូរស្រាលបណ្តោះអាសន្ន ប៉ុន្តែវាទាមទារឱ្យអាស៊ានធ្វើពិពិធកម្មភាពជាដៃគូសេដ្ឋកិច្ចយ៉ាងសកម្មជាងមុន។

អ្នកវិភាគនិងជាអ្នកអត្ថាធិប្បាយផ្នែកសន្តិសុខ និងកិច្ចការពិភពលោក លោក Collins Chong Yew Keat បានកត់សម្គាល់ថា កិច្ចប្រជុំកំពូលនេះ បង្ហាញពីការជំរុញរបស់ប្រទេសចិន ក្នុងការទទួលបានការគាំទ្រ ចំពេលមានការប្រកួតប្រជែងជាមួយសហរដ្ឋអាមេរិក ខណៈដែលអាស៊ាន ធ្វើឱ្យមានតុល្យភាពទំនាក់ទំនងរវាងមហាអំណាចទាំងពីរ។ ទោះជាយ៉ាងណាក៏ដោយ ភាពតានតឹងនៅតែមានលើការទាមទារដ៏ធំធេងរបស់ចិននៅក្នុងសមុទ្រចិនខាងត្បូង ដែលសមាជិកអាស៊ានមួយចំនួនបដិសេដ។

ទោះបីជាមានទំនាក់ទំនងកាន់តែកើនឡើងជាមួយប្រទេសចិនក៏ដោយ ក៏លោក អាន់វ៉ា បានបញ្ជាក់ជាថ្មីអំពីអព្យាក្រឹតភាពរបស់អាស៊ានថា «ខ្ញុំមិនគិតថា អាស៊ានមានភាពលំអៀងក្នុងផ្លូវណាមួយទេ យើងធ្វើការជាមួយទាំងទីក្រុងប៉េកាំង និងវ៉ាស៊ីនតោន»។

ទាក់ទងនឹងកិច្ចប្រជុំនេះផងដែរ ស្តេចស៊ុលតង់ Hassanal Bolkiah របស់ប្រទេសប្រ៊ុយណេ បានខកខានមិនបានចូលរួមកិច្ចដោយសារតែបញ្ហាសុខភាព និងកំពុងសម្រាកនៅក្នុងមន្ទីរពេទ្យទីក្រុងគូឡាឡាំពួ ប៉ុន្តែស្ថិតក្នុងស្ថានភាពល្អប្រសើរ៕