ប៉ូលិសអាមេរិក ស្លាប់ក្នុងការវាយប្រហារនៅវិមានកាពីតូល

មន្ត្រីប៉ូលិសម្នាក់ បានស្លាប់រួមជាមួយអ្នកបើកបរម្នាក់ ដែលបើករថយន្តបុករនាំងនៅអគារកាពីតូលសហរដ្ឋអាមេរិកកាលពីថ្ងៃសុក្រ (ថ្ងៃសៅរ៍នៅកម្ពុជា) ដែលជាហេតុបង្កឲ្យមានការបិទអគារសភា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Yogananda Pittman ប្រធានស្តីទីនៃប៉ូលិសកាពីតូលសហរដ្ឋអាមេរិក បាននិយាយថា ជនសង្ស័យម្នាក់និងមន្រ្តីកងកម្លាំងម្នាក់ បានស្លាប់ខណៈដែលមន្រ្តីទី២ ត្រូវបានបញ្ជូនទៅកាន់មន្ទីរពេទ្យបន្ទាប់ពីឧប្បត្តិហេតុនេះបានកើតឡើងក្រោយម៉ោង១រសៀល (ម៉ោងនៅអាមេរិក)។

លោកស្រីនិយាយក្នុងសន្និសីទកាសែតមួយថា “ជនសង្ស័យ បានបើករថយន្តបុកមន្ត្រីរបស់យើងចំនួនពីរនាក់ ហើយបន្ទាប់មកបានបុករនាំងខាងជើង។ នៅពេលនោះ ជនសង្ស័យបានចេញពីរថយន្តដោយកាំបិតនៅក្នុងដៃ”។

លោកស្រី Pittman បន្តថា ជនសង្ស័យមិនបានឆ្លើយតបនឹងការព្រមានទេ ហើយរូបគេត្រូវបានបាញ់សម្លាប់ដោយប៉ូលិស។

ស្របពេលជាមួយគ្នានោះ លោក Robert Contee ប្រធានប៉ូលិសក្រុងបាននិយាយថា កងកម្លាំងរបស់លោកកំពុងរកមើលមូលហេតុនៃសកម្មភាពនេះ ហើយបានបន្ថែមថា វាហាក់ដូចជាមិនមានការគំរាមកំហែងបន្តទៀតនោះទេ។

ការវាយប្រហារប្រឆាំងនឹងប៉ូលិសអាមេរិកកាពីតូលកាលពីថ្ងៃសុក្រ បានកើតឡើងមិនដល់៣ខែផង បន្ទាប់ពីការវាយប្រហារថ្ងៃទី៦ខែមករា ទៅលើសភាដោយអ្នកគាំទ្រលោក Trump ដែលព្យាយាមរារាំងការប្រកាសជ័យជម្នះរបស់លោក Joe Biden នៅក្នុងការបោះឆ្នោតប្រធានាធិបតីឆ្នាំ២០២០។

មន្រ្តីប៉ូលិសកាពីតូលម្នាក់ត្រូវបានសម្លាប់បន្ទាប់ពីរងរបួសអំឡុងពេលការវាយលុក ខណៈដែលមន្រ្តីប៉ូលិសកាពីតូលចំនួន២នាក់ទៀតដែលឆ្លើយតបនឹងការវាយប្រហារនោះ បានស្លាប់ដោយការធ្វើអត្តឃាតនៅថ្ងៃបន្ទាប់៕

ប្រែសម្រួលដោយ៖ Vann Vann

ប្រភព៖ FT

ចុចអាន៖ FBI បញ្ចេញវីដេអូជនសង្ស័យដាក់គ្រាប់បែកបំពង់ជិតវិមានកាពីតូល កាលខែមករា