ព្យុះត្រូពិកវីពផា បង្កឲ្យមានទឹកជំនន់ក្នុងខេត្តជាច្រើនរបស់ឡាវ

ព្យុះវីពផា​(Wipha) ដែលបន្ទាបខ្លួនមកជាព្យុះត្រូពិក បាននាំមកនូវភ្លៀងធ្លាក់ខ្លាំង និងខ្យល់បក់ខ្លាំងទៅកាន់ផ្នែកខ្លះនៃអាស៊ីអាគ្នេយ៍ ដែលបណ្តាលឱ្យមានទឹកជំនន់ រាំងស្ទះការដឹកជញ្ជូន និងជំរុញឲ្យមានការព្រមានអំពីសុវត្ថិភាព ជាពិសេសនៅក្នុងប្រទេសជិតខាងកម្ពុជា ដូចជា ប្រទេសថៃ ឡាវ និងវៀតណាម។

យោងតាមកាចេញផ្សាយរបស់សារព័ត៌មាន​ The Laotian Times នៅថ្ងៃទី ២៣ ខែកក្កដា ព្យុះត្រូពិកវីពផា បានបណ្តាលឱ្យមានទឹកជំនន់រីករាលដាលពាសពេញប្រទេសឡាវ ចន្លោះពីថ្ងៃទី ២១ដល់ថ្ងៃទី ២៣ ខែកក្កដា ដោយប៉ះពាល់ដល់ខេត្តជាច្រើន។ ភ្លៀងធ្លាក់ខ្លាំង និងខ្យល់បក់បោកខ្លាំង បណ្តាលឲ្យបាក់ស្ពាន ទឹកជំនន់ភ្លាមៗ ដាច់ចរន្តអគ្គិសនី និងខូចខាតអស់ទឹកប្រាក់ជាង ៨៣៥,០០០ ដុល្លារអាមេរិក។

នៅព្រឹកថ្ងៃនេះ ទន្លេ Khan ក្នុងខេត្ត Luang Prabang បានហក់ឡើងយ៉ាងលឿន ដោយសារតែភ្លៀងធ្លាក់ខ្លាំងរងឥទ្ធិពលពីព្យុះ និងទឹកដែលបញ្ចេញចេញពីទំនប់វារីអគ្គីសនីនៅក្បែរនោះ។ អាជ្ញាធរ​បាន​ព្រមាន​ប្រជាពលរដ្ឋ​ឲ្យ​ការពារ​ទ្រព្យសម្បត្តិ ពិនិត្យ​ផ្លូវ និង​តាមដាន​កម្រិត​ទឹក​ឲ្យ​បាន​ដិតដល់។

​ជាមួយគ្នានេះនៅក្នុង ​ខេត្ត​ Phongsaly មន្ត្រី​បាន​និយាយថា ទំនប់​វា​រី​អគ្គិសនី​ Nam Ou ទី​៤ ទី​៥ និង​៦ នឹង​បើក​ទ្វារ​ទឹកជំនន់​ចាប់ពី​ថ្ងៃទី​២២ ដល់​ថ្ងៃទី​២៧ ខែកក្កដា ដោយ​បញ្ចេញ​បរិមាណ​ទឹក​យ៉ាងច្រើន​។ មុននេះ ការព្រមានស្រដៀងគ្នានេះត្រូវបានធ្វើឡើងចំពោះទំនប់ ១, ២, និង ៣ នៅហ្លួងព្រះបាងផងដែរ។ ប្រជាពលរដ្ឋដែលរស់នៅក្បែរទន្លេ ត្រូវបានប្រាប់ឱ្យមានការប្រុងប្រយ័ត្ន និងចាត់វិធានការសុវត្ថិភាព។

ដោយសារខ្យល់ព្យុះនេះ ផ្លូវដែកឡាវ-ចិនក៏បានបញ្ឈប់រាល់សេវារថភ្លើងទាំងអស់នៅថ្ងៃទី ២៣ ខែកក្កដា ដោយសារហេតុផលសុវត្ថិភាព។ អ្នកដំណើរអាចលុបចោល ឬផ្លាស់ប្តូរសំបុត្ររថភ្លើងរបស់ពួកគេដោយឥតគិតថ្លៃ និងទទួលបានប្រាក់ទាំងអស់របស់ពួកគេត្រឡប់មកវិញ ប្រសិនបើពួកគេបិតក្នុងរយៈពេល ៣០ ថ្ងៃ។

គួរបញ្ជាក់ថា ព្យុះវីពផា បានប៉ះពាល់ដល់ប្រទេសផ្សេងទៀតនៅក្នុងតំបន់អាស៊ីផងដែរ។ នៅ​ប្រទេស​វៀតណាម មនុស្ស​រាប់​ពាន់​នាក់​ត្រូវ​ជម្លៀសចេញ ផ្លូវ​ថ្នល់​ខូច និង​កសិដ្ឋាន​ត្រូវ​ជន់​លិច។ ទោះបីព្យុះវីពផាចុះខ្សោយពេលបក់មកដល់ភាគខាងជើងវៀតណាមកដោយ ក៏ឥ​ទ្ធិពលរបស់វានៅតែបង្កឲ្យមានភ្លៀងធ្លាក់ខ្លាំងដែលអាចបង្កជាទឹកជំនន់ភ្លាមៗ៕

អត្ថបទ៖ ប៊ុន សុភាព