ព័ត៌មានអន្ដរជាតិ

លោក ត្រាំ ហៅការវាយប្រហាររបស់រុស្ស៊ីលើអ៊ុយក្រែនថាជា «រឿងគួរឲ្យខ្ពើមរអើម»

បានផុស

១២ ខែ មុន

នៅ

ថ្ងៃសុក្រ ១ សីហា ២០២៥

ដោយ

Chheang

ប្រធានាធិបតីអាមេរិក លោក ដូណាល់ ត្រាំ បានថ្កោលទោសយ៉ាងខ្លាំងចំពោះការទម្លាក់គ្រាប់បែកពីលើអាកាសរបស់រុស្ស៊ី ទៅលើរដ្ឋធានីអ៊ុយក្រែនកាលពីថ្ងៃព្រហស្បតិ៍ទី៣១ខែកក្កដា ដោយហៅវាថាជាទង្វើ«គួរឲ្យខ្ពើមរអើម» បន្ទាប់ពីមានសេចក្តីរាយការណ៍ថា ជនស៊ីវិល ១៥នាក់ត្រូវបានសម្លាប់នៅទីក្រុងកៀវ រួមទាំងកុមារអាយុ ៦ឆ្នាំម្នាក់ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារ ធ្វើឡើងពេញមួយយប់តាមរយៈយន្តហោះគ្មានមនុស្សបើក និងមីស៊ីលគ្រូស ហើយបានកំណត់គោលដៅលើសង្កាត់ជាច្រើនកន្លែងនៃទីក្រុងកៀវ ដែលផ្តោតលើអគារលំនៅដ្ឋាន និងហេដ្ឋារចនាសម្ព័ន្ធសាធារណៈ។ លោកប្រធានាធិបតី ត្រាំ បាននិយាយពីការិយាល័យរាងពងក្រពើ បានហៅការវាយប្រហារនេះថាជា «ការអាម៉ាស់» ហើយបានរំលឹកឡើងវិញថា សង្រ្គាម«គួរតែត្រូវបានបញ្ឈប់» ដោយសង្កត់ធ្ងន់ថា កងកម្លាំងទាំងសងខាងបាត់បង់ទាហានរហូតដល់ ៧ ០០០នាក់ជារៀងរាល់សប្ដាហ៍។ បន្ថែមពីនេះ លោកបានព្រមានពីការដាក់ទណ្ឌកម្មសេដ្ឋកិច្ច ប្រសិនបើរុស្ស៊ីបរាជ័យក្នុងការចរចាសន្តិភាពត្រឹមថ្ងៃទី៨ខែសីហា។

លោក ត្រាំ បាននិយាយថា «នេះគឺជាសង្រ្គាមរបស់(អតីតប្រធានាធិបតី Joe) Biden។ វាមិនមែនជាសង្រ្គាមរបស់ខ្ញុំទេ។ ប៉ុន្តែខ្ញុំបាននិយាយថា ប្រសិនបើខ្ញុំលូកដៃចូលហើយ ខ្ញុំនឹងព្យាយាម ហើយបញ្ឈប់រឿងនេះ។ ប៉ុន្តែខ្ញុំគិតថា អ្វីដែលរុស្ស៊ីកំពុងធ្វើគឺជារឿងសោកសៅ ប្រជាជនរុស្ស៊ីជាច្រើនកំពុងបាត់បង់ជីវិត។ ប្រជាជនអ៊ុយក្រែនក៏កំពុងបាត់បង់ជីវិត»។

មន្ត្រីអ៊ុយក្រែនបានបញ្ជាក់ថា ការវាយប្រហារដោយយន្តហោះគ្មានមនុស្សបើក និងមីស៊ីលរបស់រុស្ស៊ី បានវាយប្រហារយ៉ាងតិចលើ ២៧គោលដៅនៅទូទាំងរដ្ឋធានីកៀវ ដែលបណ្តាលឲ្យជនស៊ីវិលស្លាប់ និងរបួសយ៉ាងច្រើន។ ជាសរុប មនុស្ស ១៥៩នាក់បានរងរបួស ហើយក្រុមជួយសង្គ្រោះកំពុងបន្តស្វែងរកជនរងគ្រោះ ចំពេលអគារបានបាក់រលំ៕