ការសិក្សា៖ អ្នកជាសះស្បើយពីកូវីដម្នាក់ក្នុងចំណោម៣នាក់រងបញ្ហាប្រព័ន្ធប្រសាទ

មនុស្សម្នាក់ក្នុងចំណោម ៣ នាក់ ទទួលរងសម្ពាធផ្លូវចិត្តឬបញ្ហាផ្នែកសរសៃប្រសាទរយៈពេល ៦ ខែ ក្រោយជាសះស្បើយពីកូវីដ-១៩ ។ នេះបើយោងតាមការស្រាវជ្រាវដែលចេញផ្សាយដោយអ្នកស្រាវជា្រវជនជាតិបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្រាវជ្រាវមួយដែលបោះពុម្ពផ្សាយក្នុងទស្សនាវដ្តី The Lancet Psychiatry បង្ហាញថា អ្នកជំងឺជាពីកូវីដទំនងមានស្ថានភាពខួរក្បាលធ្ងន់ធ្ងរជាងអ្នកដែលរងជំងឺផ្លូវដង្ហើមដទៃទៀត។

ការសិក្សាទៅលើអ្នកជំងឺជាង ២៣០,០០០ នាក់ដែលបានជាសះស្បើយពី Covid-19 រកឃើញថា មនុស្ស ៣៤% ត្រូវបានគេធ្វើរោគវិនិច្ឆ័យមានបញ្ហាសរសៃប្រសាទរយៈពេលប្រាំមួយខែ បន្ទាប់ពីសម្រាកព្យាបាល។

ក្នុងនោះស្ថានភាពអ្នកជួបបញ្ហាថប់បារម្ភមាន ១៧%  អារម្មណ៍មិនល្អ ១៤%  និងបញ្ហាផ្លូវចិត្ត ១៣ %។ បន្ថែមពីលើនេះ ពួកគេរងផលប៉ះពាល់ផ្សេងទៀតរួមមាន ជំងឺគាំងបេះដូង ០.៦% ជំងឺដាច់សរសៃឈាមខួរក្បាល ២.១% និងជំងឺវង្វេង ០.៧%​។

ដោយឡែក ក្រុមអ្នកស្រាវជ្រាវក៏បានសិក្សាទៅលើអ្នកជំងឺជាង ១០០,០០០ នាក់ដែលមានជំងឺផ្តាសាយ និងអ្នកជំងឺរលាកផ្លូវដង្ហើមជាង ២៣៦,០០០ នាក់ផងដែរ ដើម្បីធ្វើការប្រៀបធៀបគ្នា។

ពួកគេបានរកឃើញថា អ្នកជំងឺផ្ដាសាយមានហានិភ័យប្រព័ន្ធសរសៃប្រសាទតិចជាងអ្នកជំងឺកូវីដ ៤៤%  ខណៈអ្នកផ្លូវដង្ហើមផ្សេងៗប្រឈមហានិភ័យតិចជាង ១៦%។

ភ្ជាប់ជាមួយករណីខាងលើ លោក Paul Harrison អ្នកនិពន្ធអត្ថបទវេជ្ជសាស្ត្រមកពីសាកលវិទ្យាល័យ Oxford និយាយថា ហានិភ័យប្រព័ន្ធសរសៃប្រសាទបណ្ដាលមកពី Covid-19 ភាគច្រើនកើតឡើងចំពោះអ្នកជំងឺរ៉ាំរ៉ៃ។

មិនត្រឹមតែប៉ុណ្ណោះ ទិន្នន័យបង្ហាញថា ២.៧% នៃអ្នកជំងឺរ៉ាំរ៉ៃដែលបានឆ្លងកូវីដ ទទួលរងនូវការកកឈាមក្នុងខួរក្បាល ហើយជិត ៧% នៃអ្នកចូលបន្ទប់ ICU រងនូវជំងឺដាច់សរសៃឈាមខួរក្បាល។ មួយវិញទៀត ពួកគេប្រឈមខ្ពស់ក្នុងការវិវត្តជំងឺរយៈពេលវែងថែមទៀត៕

ប្រែសម្រួល៖ សន្យា

ប្រភព៖ Bangkok post

ចុចអាន៖ ការសិក្សា ៖ អ្នក​ជំងឺ​កូវីដ​ធ្ងន់ធ្ងរ​ភាគច្រើន​ដែល​កំពុង​សម្រាក​ព្យាបាល​នៅ​មន្ទីរពេទ្យ ប្រឈម​ហានិភ័យ​ស្លាប់​ខ្ពស់

ចុចអាន៖ ៣ សំណួរពាក់ព័ន្ធអ្នកជំងឺទឹកនោមផ្អែមនិងការចាក់វ៉ាក់សាំងកូវីដ-១៩