សភា​ថៃ​នឹង​បោះឆ្នោត​ជ្រើសរើស​នាយករដ្ឋមន្ត្រី​ថ្មី​នៅ​ថ្ងៃ​ទី៥​ខែ​កញ្ញា

សភាតំណាងរាស្រ្តថៃ បានកំណត់ពេលបោះឆ្នោតនៅថ្ងៃទី​៥​ខែកញ្ញា ដើម្បីជ្រើសរើសនាយករដ្ឋមន្ត្រីថ្មីបន្ទាប់ពីការដកលោកស្រី ផែថងថាន ស៊ីណាវ៉ាត្រ។

ប្រធានសភាលោក Wan Muhamad Noor Matha បាននិយាយនៅក្នុងសេចក្តីជូនដំណឹងបន្ទាន់មួយទៅកាន់សមាជិកសភាកាលពីល្ងាចថ្ងៃអង្គារថា «សភានឹងបោះឆ្នោតជ្រើសរើសនាយករដ្ឋមន្ត្រីថ្មីនៅថ្ងៃទី​៥​ខែកញ្ញា» ដោយបន្ថែមថា របៀបវារៈលម្អិតនឹងត្រូវបានចេញផ្សាយនៅពេលក្រោយ។

សេចក្តីប្រកាសនេះ បានធ្វើឡើងបន្ទាប់ពីប្រព័ន្ធផ្សព្វផ្សាយថៃបានរាយការណ៍ថា ក្រុមប្រឹក្សាឯកជនបានប្រគល់មកវិញនូវឯកសារ​ស្វែងរកការយល់ព្រមពីព្រះមហាក្សត្រដើម្បីរំលាយសភាដែលបានដាក់ជូនកាលពីមួយថ្ងៃមុនដោយនាយករដ្ឋមន្ត្រីស្តីទី Phumtham Wechayachai។ ក្រុមប្រឹក្សាបាននិយាយថា ចំណាត់ការរបស់លោក Phumtham មិនបានអនុវត្តតាមនីតិវិធីត្រឹមត្រូវទេ ហើយបានកត់សម្គាល់ពីវិវាទជុំវិញថាតើមេដឹកនាំស្តីទីមានសិទ្ធិអំណាចក្នុងការស្នើសុំរំលាយសភា​ដែរ​ឬ​ទេ។ តាមទម្លាប់ មានតែនាយករដ្ឋមន្ត្រីផ្លូវការ​ប៉ុណ្ណោះ ទើបមានអំណាចនោះ។

បេក្ខជន​នាយករដ្ឋមន្ត្រី​ត្រូវ​ទទួល​បាន​ការ​គាំទ្រ​ពី​សមាជិក​សភា​យ៉ាង​ហោច​៥០​រូប​ ដើម្បី​ឈរ​ឈ្មោះ​បោះ​ឆ្នោត​ក្នុង​សភា​តំណាងរាស្រ្ត។ ដើម្បីក្លាយជានាយករដ្ឋមន្ត្រី បេក្ខជនត្រូវទទួលបានសំឡេងភាគច្រើន ស្មើនឹងជាង ២៤៧សំឡេង ក្នុងចំណោមសមាជិកសភាសរុប ៤៩២នាក់ នៅក្នុងសភាតំណាងរាស្រ្តថៃ។

ប្រសិនបើបេក្ខជនបរាជ័យ សភាតំណាងរាស្រ្តថៃនឹងបន្ត​ដំណើរការនេះឡើងវិញ រហូតដល់នាយករដ្ឋមន្ត្រីថ្មីត្រូវបានជ្រើសរើស។ មិនមានកំណត់ពេលវេលាសម្រាប់ដំណើរការនេះទេ។

កាលពីថ្ងៃអង្គារ លោក Anutin Charnvirakul មេដឹកនាំគណបក្ស Bhumjaithai បានប្រកាសថា លោកបានទទួលការគាំទ្រជាចាំបាច់ ដោយមានការគាំទ្រពីគណបក្សប្រឆាំង។ មេដឹកនាំគណបក្ស​ប្រជាជន លោក Natthaphong Ruengpanyawut បាននិយាយថា សមាជិកសភាចំនួន ១៤៣​រូបរបស់ខ្លួនអាចជួយផ្តល់សំឡេងភាគច្រើនសម្រាប់លោក Anutin ប្រសិនបើនាយករដ្ឋមន្ត្រីថ្មីយល់ព្រមរំលាយសភា និងរៀបចំការបោះឆ្នោតថ្មីក្នុងរយៈពេល ៤​ខែបន្ទាប់។ លោក​បាន​បន្ថែម​ថា គណបក្ស​ប្រជាជន​នឹង​នៅ​តែ​ជា​បក្ស​ប្រឆាំង ហើយ​មិន​ចូល​រួម​ជាមួយ​រដ្ឋាភិបាល​ចម្រុះ​ឡើយ៕

ដោយ៖ ឈាង

ចុចអាន៖ នាយក​រដ្ឋមន្ត្រី​ស្តីទី​ថៃ ​រង​ការ​ចោទ​ប្រកាន់​ពី​បទប្រមាថ​រាជានិយម