ព័ត៌មានអន្ដរជាតិ

នាយករដ្ឋមន្ត្រីស្តីទីថៃ រងការចោទប្រកាន់ពីបទប្រមាថរាជានិយម

បានផុស

១១ ខែ មុន

នៅ

ថ្ងៃព្រហស្បតិ៍ ៤ កញ្ញា ២០២៥

ដោយ

Chheang

នាយករដ្ឋមន្ត្រីស្តីទីថៃ លោក Phumtham Wechayachai កំពុងប្រឈមមុខនឹងការចោទប្រកាន់ពីសមាជិកសភាបក្សប្រឆាំង និងសកម្មជននយោបាយថា ធ្វើហួសពីអំណាច និងប្រព្រឹត្តទង្វើប្រមាថព្រះមហាក្សត្រ បន្ទាប់ពីបានដាក់រាជក្រឹត្យ ស្វែងរកការរំលាយសភាតំណាងរាស្រ្ត។ នេះបើយោងតាមការចុះផ្សាយរបស់កាសែត Bangkok Post និង Thai PBS កាលពីថ្ងៃទី៣ខែកញ្ញាឆ្នាំ២០២៥។

លោក Phumtham Wechayachai (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Suratin Pichan សមាជិកសភាមកពីគណបក្សប្រជាធិបតេយ្យថ្មី និងសកម្មជននយោបាយ Thaikorn Polsuwan បានដាក់ពាក្យបណ្តឹងនៅការិយាល័យស៊ើបអង្កេតកណ្តាលនៅទីក្រុងបាងកកកាលពីថ្ងៃពុធ។

លោក Thaikorn អះអាងថា មានតែនាយករដ្ឋមន្ត្រីដែលត្រូវបានតែងតាំងជាផ្លូវការទេ ទើបមានសិទ្ធិអំណាចរដ្ឋធម្មនុញ្ញក្នុងការរំលាយសភា។ លោកបានមានប្រសាសន៍ថា តាមរយៈការដាក់រាជក្រឹត្យសុំការអនុម័តពីព្រះមហាក្សត្រ លោក Phumtham អាចនឹងប្រើរបបរាជានិយមខុសថាជា«ឧបករណ៍នយោបាយ» ដែលអាចចាត់ទុកថាជាទង្វើប្រមាថព្រះមហាក្សត្រ។

កាសែត Bangkok Post បានរាយការណ៍ថា លោក Supachai Jaisamut ប្រធានក្រុមអ្នកច្បាប់សម្រាប់គណបក្សប្រឆាំង Bhumjaithai ក៏បានដាក់ញត្តិចោទប្រកាន់លោក Phumtham ពីបទរំលោភអំណាច និងរំលោភលើបទដ្ឋានរដ្ឋធម្មនុញ្ញផងដែរ។

ដោយឡែកសកម្មជននយោបាយ Srisuwan Janya បានជំរុញឲ្យគណៈកម្មាធិការជាតិប្រឆាំងអំពើពុករលួយស៊ើបអង្កេតថាតើសកម្មភាពរបស់លោក Phumtham ជាការបំពានធ្ងន់ធ្ងរដល់ក្រមសីលធម៌ និងច្បាប់រដ្ឋធម្មនុញ្ញឬអត់។

លោក Phumtham ដែលជាឥស្សរជនជាន់ខ្ពស់នៅក្នុងគណបក្សភឿថៃដែលកំពុងកាន់អំណាច មិនបានឆ្លើយតបជាសាធារណៈចំពោះការចោទប្រកាន់នោះទេ។

កាលពីព្រឹកថ្ងៃពុធ ភឿថៃបានបញ្ជាក់ថា លោក Phumtham បានដាក់រាជក្រឹត្យទៅព្រះបរមរាជវាំង ដើម្បីបញ្ចប់ភាពជាប់គាំងនយោបាយរបស់ប្រទេស។ ប្រសិនបើបានអនុម័ត ថៃនឹងត្រូវរៀបចំការបោះឆ្នោតថ្មីក្នុងរយៈពេល ៤៥ ទៅ ៦០ថ្ងៃ។

ប្រទេសថៃបានជាប់គាំងនៅក្នុងភាពចលាចលនយោបាយចាប់តាំងពីពាក់កណ្តាលខែមិថុនា នៅពេលដែលបែកធ្លាយការសន្ទនាតាមទូរសព្ទរវាងអតីតនាយករដ្ឋមន្ត្រី ផែថងថាន ស៊ីណាវ៉ាត្រ និងប្រធានព្រឹទ្ធសភាកម្ពុជាសម្ដេចតេជោ ហ៊ុន សែន ដែលបង្កឲ្យមានភាពចម្រូងចម្រាស។

តុលាការធម្មនុញ្ញបានព្យួរលោកស្រី ផែថងថាន ពីតំណែងកាលពីថ្ងៃទី១ខែកក្កដា និងដកលោកស្រីចេញជាផ្លូវការនៅថ្ងៃទី២៩ខែសីហា ដោយលើកឡើងពីការរំលោភលើក្រមសីលធម៌សេវាសាធារណៈ។ ចាប់តាំងពីពេលនោះមក លោក Phumtham បានធ្វើជានាយករដ្ឋមន្ត្រីស្តីទី រហូតដល់រដ្ឋាភិបាលថ្មីត្រូវបានជ្រើសរើស៕

ដោយ៖ ឈាង