ហ្សេលេនស្គី ប្រាប់មហាសន្និបាត UN ថា បើមិនបញ្ឈប់ពូទីនបានទេ រុស្ស៊ីនឹងលុកលុយប្រទេសច្រើនទៀត

ថ្លែងនៅឯមហាសន្និបាតអង្គការសហប្រជាជាតិក្នុងទីក្រុងញូវយ៉ក សហរដ្ឋអាមេរិកកាលពីថ្ងៃពុធទី២៤ខែកញ្ញាឆ្នាំ២០២៥ ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានប្រាប់ថា រុស្ស៊ីនឹងបើកការលុកលុយប្រទេសជាច្រើនទៀត បើសម្ព័ន្ធមិត្តទាំងឡាយមិនរួបរួមនិងបង្កើនការគាំទ្រគ្នាទេនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខរដ្ឋាភិបាលទីក្រុងកៀវព្រមានថា ប្រសិនបើមិនបញ្ឈប់លោក វ្ល៉ាឌីមៀរ ពូទីន បានទេ គាត់នឹងពង្រីកសង្គ្រាមកាន់តែធំ។ អ៊ុយក្រែន គ្រាន់តែជាប្រទេសទីមួយប៉ុណ្ណោះ។

ទន្ទឹមនោះលោកហ្សេលេនស្គី និយាយថា ប្រទេសទាំងអស់ត្រូវបានគំរាមកំហែងដោយការប្រកួតប្រជែងសព្វាវុធជាសាកល ខណៈបច្ចេកវិទ្យាយោធាកាន់តែរីកចម្រើន។

មិនត្រឹមប៉ុណ្ណឹង លោកថែមទាំងរិះគន់ស្ថាប័នអន្តរជាតិនានាផងដែរ ដោយលើកឡើងថា ពួកគេខ្សោយណាស់ ដែលមិនហ៊ានផ្តល់ការធានាសន្តិសុខដល់អ៊ុយក្រែន។

សុន្ទរកថានេះធ្វើឡើងបន្ទាប់ពីប្រធានាធិបតីអាមេរិក ដូណាល់ ត្រាំ បង្ហាញជំនឿចិត្តថា អ៊ុយក្រែន អាចយកបានដីដែលធ្លាក់ទៅដៃរុស្ស៊ីចាប់តាំងពីឆ្នាំ២០២២ទាំងអស់មកវិញ។

ការអះអាងរបស់លោកត្រាំ បង្ហាញពីការផ្លាស់ប្តូរគោលនយោបាយ១៨០ដឺក្រេ ខុសពីដំបូងឡើយដែលប្រមុខសេតវិមានរូបនេះតែងសំណូមពរឲ្យអ៊ុយក្រែន ព្រមធ្វើសម្បទានដីជាមួយរុស្ស៊ី ជាថ្នូរនឹងកិច្ចព្រមព្រៀងសន្តិភាព។

លោកត្រាំលើកឡើងថា «បន្ទាប់ពីដឹងនិងយល់យ៉ាងច្បាស់អំពីស្ថានភាពយោធានិងសេដ្ឋកិច្ចអ៊ុយក្រែន/រុស្ស៊ី ហើយក្រោយឃើញបញ្ហាសេដ្ឋកិច្ចរបស់រុស្ស៊ី ខ្ញុំគិតថា អ៊ុយក្រែន ដោយមានការគាំទ្រពីសហភាពអឺរ៉ុប គឺស្ថិតក្នុងទីតាំងមួយដើម្បីប្រយុទ្ធ និងឈ្នះទឹកដីទាំងអស់ដូចទម្រង់ដើមវិញ៕

អត្ថបទ៖ សុខ សុវណ្ណ

ចុចអាន៖ ហ្សេលេនស្គី៖ ត្រាំ អាចបញ្ចុះបញ្ចូលមេ​ដឹក​នាំ​ចិន ឲ្យ​ផ្លាស់ប្តូរជំហរ​លើសង្រ្គាមនៅ​អ៊ុយក្រែន