ប៉ូឡូញ ចល័តទ័ពអាកាស បន្ទាប់ពីរុស្ស៊ីវាយប្រហារធំ​នៅ​ជិត​ព្រំដែន​របស់​ខ្លួន

ប្រទេសប៉ូឡូញ បានប្រមូល​ផ្ដុំ​កម្លាំងទ័ពអាកាសរបស់ខ្លួននៅព្រឹកថ្ងៃអាទិត្យ​ទី​៥​ខែ​តុលា បន្ទាប់ពីប្រទេសរុស្ស៊ីបានបើកការវាយប្រហារតាមអាកាសទ្រង់ទ្រាយធំទៅលើភាគខាងលិចអ៊ុយក្រែន រួមទាំងតំបន់ដែលនៅជិតព្រំដែនប៉ូឡូញ។

បញ្ជាការប្រតិបត្តិការ​យោធា​ប៉ូឡូញ បាននិយាយនៅក្នុងសេចក្តីថ្លែងការណ៍មួយនៅលើ​បណ្ដាញ​សង្គម X ថា «យន្តហោះប៉ូឡូញ និងសម្ព័ន្ធមិត្តកំពុងប្រតិបត្តិការនៅក្នុងដែនអាកាសរបស់យើង ខណៈពេលដែលប្រព័ន្ធការពារដែនអាកាស និងប្រព័ន្ធឈ្លបយកការណ៍លើដី ត្រូវបាន​ដាក់ឲ្យ​ដំណើរការ​ក្នុង​ស្ថានភាព​ត្រៀមខ្លួនខ្ពស់បំផុត»។

មន្ត្រីអ៊ុយក្រែនបានរាយការណ៍ថា មីស៊ីល និងយន្តហោះគ្មានមនុស្សបើក បានកំណត់គោលដៅលើតំបន់ Lviv ពេញមួយយប់ ដែលជាផ្នែក​មួយ​នៃរលក​វាយប្រហារ​ថ្មី​របស់រុស្ស៊ី។

សមាជិក​ភាគ​ខាងកើតរបស់​អង្គការ​ណាតូ ជាពិសេសប៉ូឡូញ បានប្រកាសអាសន្ន ចំពេលមានការសង្ស័យថាមានការរំលោភដែនអាកាសរុស្ស៊ី។ កាល​ពី​ខែ​កញ្ញា ប៉ូឡូញបាន​និយាយ​ថា ​ខ្លួន​បាន​បាញ់​ទម្លាក់​យន្តហោះ​គ្មាន​មនុស្ស​បើក​របស់​រុស្ស៊ី​ដែល​ឆ្លង​ចូល​ក្នុង​ទឹកដី​របស់​​ខ្លួន។ ការមើលឃើញយន្តហោះគ្មានមនុស្សបើកនៅទីក្រុង Copenhagen និង Munich ក៏បានជំរុញ​ឲ្យ​មានការរំខានដល់អាកាសចរណ៍បណ្តោះអាសន្ននៅទូទាំងទ្វីបអឺរ៉ុបផងដែរ។ យ៉ាង​ណា​មិញ ទីក្រុងមូស្គូបានបដិសេធមិនទទួលខុសត្រូវ​នោះ​ទេ៕

ដោយ៖ ឈាង