ទេសចរ​អេស្ប៉ាញម្នាក់​ត្រូវ​ខ្លាឃ្មុំ​វាយប្រហារ ក្នុង​តំបន់​បេតិកភណ្ឌ​របស់ប្រទេសជប៉ុន

អ្នកទេសចរជនជាតិអេស្ប៉ាញម្នាក់បានរងរបួស បន្ទាប់ពីសត្វខ្លាឃ្មុំវាយប្រហារនៅ Shirakawa-go ដែលជាភូមិបេតិកភណ្ឌពិភពលោករបស់អង្គការយូណេស្កូ នៅកណ្តាលប្រទេសជប៉ុន។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី០៦​ ខែតុលា។

បុរសទេសចរជនជាតិអេស្ប៉ាញរូបនេះមានអាយុ ៤៤ ឆ្នាំរូបនេះបានរងរបួសដៃ ពេលដើរទៅចំណតឡានក្រុង ប៉ុន្តែត្រូវបានព្យាបាលនៅមន្ទីរពេទ្យ ហើយបានចេញពីមន្ទីរពេទ្យនៅថ្ងៃដដែលនោះ។ ចាប់តាំងពីពេលនោះមក អាជ្ញាធរជប៉ុនបានបិទផ្លូវក្នុងស្រុក និងបង្កើនការល្បាត។

គួរបញ្ជាក់ថាឧបទ្ទវហេតុនេះកើតឡើងបន្ទាប់ពីការវាយសម្លាប់យ៉ាងសាហាវរបស់សត្ខខ្លាឃុំនៅភាគខាងជើងប្រទេសជប៉ុនកាលពីសប្តាហ៍មុន ។ ទិន្នន័យរបស់រដ្ឋាភិបាលជប៉ុនបង្ហាញថា ការវាយប្រហាររបស់សត្វខ្លាឃ្មុំរាប់សិបក្បាលកើតឡើងជារៀងរាល់ឆ្នាំ ដែលជំរុញឱ្យប្រទេសជប៉ុនថ្មីៗនេះបន្ធូរបន្ថយច្បាប់ម៉ាញ់សត្វដើម្បីការពារសហគមន៍៕

អត្ថបទ៖ ប៊ុន សុភាព