ប្រយ័ត្ន! អូមីក្រុង រស់នៅលើផ្ទៃប្លាស្ទិក និងស្បែកយូរជាង វីរុសបំប្លែងខ្លួន ទាំងអស់

ការស្រាវជ្រាវថ្មីរបស់អ្នកវិទ្យាសាស្ត្រមកពីសាកលវិទ្យាល័យវេជ្ជសាស្ត្រជប៉ុន Kyoto Prefectural University of Medicine បានរកឃើញថា អូមីក្រុងអាចរស់នៅលើផ្ទៃប្លាស្ទិក និងស្បែកមនុស្សបានយូរជាងវីរុសកូវីដបំប្លែងខ្លួនមុនៗ បន្ទាប់ពីការធ្វើតេស្តមន្ទីរពិសោធន៍ជាបន្តបន្ទាប់ ។

អ្នកនិពន្ធនៃការសិក្សានេះបានសរសេរថា “នៅលើផ្ទៃប្លាស្ទិក និងស្បែក វីរុសបំប្លែងខ្លួនទាំង ៤ ដូចជា អាល់ហ្វា, បេតា, ដែលតា និងអូមីក្រុងបង្ហាញរយៈពេលរស់រានមានជីវិតបានយូរជាងកូវីដប្រភេទដើមដែលរកឃើញនៅទីក្រុងអ៊ូហានដល់ទៅ ២ ដង និងរក្សាការឆ្លងលើផ្ទៃស្បែកលើសពី ១៦ ម៉ោង” ។

នៅលើផ្ទៃប្លាស្ទិក រយៈពេលនៃការរស់រានមានជីវិតជាមធ្យមនៃវីរុសកូវីដដើមគឺ ៥៦ ម៉ោង, វីរុសបំប្លែងខ្លួនអាល់ហ្វា ១៩១.៣ ម៉ោង, បេតា ១៥៦.៦ ម៉ោង, ហ្គាម៉ា ៥៩.៣ ម៉ោង និងដែលតា ១១៤ ម៉ោង បើប្រៀបធៀបទៅនឹង ១៩៣.៥ ម៉ោងស្មើនឹង ៨ ថ្ងៃចំពោះអូមីក្រុង ។

ចំណែកនៅលើផ្ទៃស្បែកវិញ រយៈពេលនៃការរស់រានមានជីវិតរបស់វីរុសកូវីដដើមជាមធ្យមគឺ ៨.៦ ម៉ោង, ១៩.៦ ម៉ោងសម្រាប់វីរុសអាល់ហ្វា, ១៩.១ ម៉ោងសម្រាប់បេតា, ១១ ម៉ោងសម្រាប់វីរុសហ្គាម៉ា, ១៦.៨ ម៉ោងសម្រាប់ដែលតា និង ២១.១ ម៉ោងសម្រាប់អូមីក្រុង ។

បច្ចុប្បន្នវីរុសបំប្លែងខ្លួនអូមីក្រុងបានក្លាយជាក្ដីកង្វល់ដ៏ធំជុំវិញពិភពលោក ដោយពេលនេះវាមានវត្តមាននៅក្នុងប្រទេសសហភាពអឺរ៉ុបទាំងអស់ ក៏ដូចជាប្រទេសជាច្រើនផ្សេងទៀត រួមទាំងកម្ពុជាផងដែរ ។

ទោះវីរុសបំប្លែងខ្លួនជាទូទៅមានភាពធន់នឹងជាតិអេតាណុលជាងវីរុសកូវីដដើមក៏ដោយ ប៉ុន្តែវីរុសទាំងអស់គឺអសកម្មទាំងស្រុងលើផ្ទៃស្បែក បន្ទាប់ពីការប៉ះពាល់នឹងទឹកលាងដៃដែលមានជាតិអាល់កុលរយៈពេល ១៥ វិនាទី ហើយគួរបាញ់អាល់កុល មុនកាន់ផ្ទៃប្លាស្ទិកទាំងនោះ ៕

ប្រែសម្រួលដោយ ៖ ជីវ័ន្ត

ប្រភព ៖ Euronews

ចុចអាន ៖ ត្រូវតាមដាន! ករណី អូមីក្រុង ភាគច្រើននៅ វៀតណាម មិនបង្ហាញ រោគសញ្ញាឡើយ (មានវីដេអូ)