រដ្ឋអាមេរិកមួយទៀត ប្រកាសអាសន្ន ជំងឺអុតស្វា

កាលពីថ្ងៃទី០១ខែសីហា អភិបាលរដ្ឋកាលីហ្វ័រញ៉ា លោក Gavin Newsom បានប្រកាសដាក់រដ្ឋក្នុងភាពអាសន្ន ជុំវិញការផ្ទុះឡើងនូវជំងឺអុតស្វា ដែលនេះជាវិធានការមួយ មានគោលបំណងជំរុញកិច្ចខិតខំប្រឹងប្រែងចាក់ថ្នាំបង្ការ ដើម្បីកាត់បន្ថយការរីករាលដាលនៃមេរោគដែលបានឆ្លងដល់ជនជាតិអាមេរិកជាង ៥៨០០នាក់ ហើយ។

កាលីហ្វ័រញ៉ា ដែលជារដ្ឋមានប្រជាជនច្រើនជាងគេបំផុតរបស់អាមេរិក បានបញ្ជាក់ពីករណីជំងឺអុតស្វាចំនួន ៨២៧ករណី គិតត្រឹមថ្ងៃចន្ទទី០១ខែសីហា ពោលគឺជារដ្ឋ ដែលមានការឆ្លងមេរោគអុតស្វាច្រើនលំដាប់ទី២ បន្ទាប់ពី ញូវយ៉ក ដែលបានរាយការណ៍ការឆ្លងសរុប ១៣៩០ករណី ហើយប្រកាសភាពអាសន្ន កាលពីថ្ងៃសៅរ៍ទី៣០ ខែកក្កដា។

ករណីដំបូងនៃជំងឺអុតស្វានៅសហរដ្ឋអាមេរិក ត្រូវបានបញ្ជាក់ក្នុងរដ្ឋ Massachusetts កាលពីថ្ងៃទី ២០ ខែឧសភា ខណៈករណីដំបូងនៅរដ្ឋកាលីហ្វ័រញ៉ា គឺជាមនុស្សម្នាក់ដែលឆ្លងមេរោគនៅក្រៅប្រទេស ហើយត្រូវបានបញ្ជាក់នៅប្រាំថ្ងៃក្រោយមក។

ការប្រកាសរបស់លោក Newsom បានកើតឡើងរយៈពេលប្រាំបួនថ្ងៃ បន្ទាប់ពី WHO ប្រកាសភាពអាសន្នសុខភាពជាសកល ដែលជាកម្រិតនៃការប្រុងប្រយ័ត្នខ្ពស់បំផុតរបស់ទីភ្នាក់ងារនេះ ជុំវិញមេរោគដែលកំពុងរីករាលដាលយ៉ាងឆាប់រហ័ស។

គួរបញ្ជាក់ថា ប្រទេសប្រហែល៧០ ដែលមេរោគអុតស្វាមិនត្រូវបានចាត់ទុកថាជាជំងឺឆ្លងតាមតំបន់ គឺបានរាយការណ៍អំពីការផ្ទុះឡើង ដោយករណីទូទាំងពិភពលោកបានកើនលើស ២២ ១០០៕

ប្រែសម្រួល៖ Vann Vann

ប្រភព៖ CNA

ចុចអាន៖ អេស្ប៉ាញ មានអ្នកស្លាប់ម្នាក់ទៀតហើយ ដោយសារ ជំងឺអុតស្វា