ព័ត៌មានជាតិ

ក្នុង ១ ថ្ងៃ មានកុមារជាង ១ ២០០ នាក់ ទៅពិគ្រោះជំងឺក្រៅនៅមន្ទីរពេទ្យកុមារជាតិ ភាគច្រើនជាជំងឺរលាកផ្លូវដង្ហើម

បានផុស

១០ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

លោកវេជ្ជបណ្ឌិត ញឹប អង្គាបុស្ស នាយកមន្ទីរពេទ្យកុមារជាតិ បានមានប្រសាសន៍នៅព្រឹកថ្ងៃទី ៧ សីហា នេះថា ក្នុង ១ ថ្ងៃៗ មានកុមារជាង ១ ២០០ នាក់ បានទៅពិនិត្យ និងពិគ្រោះជំងឺក្រៅ នៅមន្ទីរពេទ្យកុមារជាតិ និងមានអ្នកជំងឺកំពុងសម្រាកពេទ្យប្រមាណ ៧០០ នាក់ ដែលភាគច្រើនជាជំងឺរលាកផ្លូវដង្ហើម។ បន្ទាប់មកទៀត ជំងឺប្រព័ន្ធរំលាយអាហារ ជំងឺគ្រុនឈាម ជំងឺទឹកនោមផ្អែម ជំងឺត្រចៀក ច្រមុះ បំពង់ក ជំងឺគ្រាប់ឈាម ជំងឺប្រព័ន្ធប្រសាទ ជំងឺភាពមិនប្រក្រតីពីកំណើត និងជំងឺផ្សេងៗ ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត បានបន្តថា គិតត្រឹមខែកក្កដា ឆ្នាំ ២០២៥ នេះ ចំនួនអ្នកជំងឺមកពិគ្រោះជំងឺក្រៅនៅមន្ទីរពេទ្យកុមារជាតិបានកើនឡើង ១០% បើធៀបទៅនឹងរយៈពេល ៧ ខែ ដូចគ្នា កាលពីឆ្នាំ ២០២៤។ ក្នុងនោះ មានអ្នកជំងឺចូលសម្រាកពេទ្យថ្មីមានប្រមាណ ១៤០ ទៅ ១៥០ នាក់ ក្នុង ១ ថ្ងៃ ហើយអ្នកជំងឺប្រភេទជំងឺគ្រុនឈាម ៥០ នាក់ កើនឡើងទ្វេដង។

លោកវេជ្ជបណ្ឌិត បន្តទៀតថា ក្នុងចំណោមអ្នកជំងឺមកពិគ្រោះជំងឺក្រៅ និងសម្រាកពេទ្យ ក្នុងនោះ អ្នកជំងឺបង់ថ្លៃសេវាធម្មតា ៥០% អ្នកជំងឺប្រើបណ្ណ ប.ស.ស ២៦% អ្នកប្រើបណ្ណមូលនិធិសមធម៌មាន ២០% អ្នកជំងឺ ៣ ទៅ ៤% មិនមានលទ្ធភាពបង់ប្រាក់ត្រូវបានមន្ទីរពេទ្យអនុគ្រោះ ឬលើកលែងផ្ទាល់។

គួរបញ្ជាក់ថា ឆ្នាំ ២០២៤ មន្ទីរពេទ្យ បានពិនិត្យពិគ្រោះជំងឺក្រៅចំនួន ២០៨,១៧៨ ករណី កើនឡើងចំនួន ១៥,៨១៤ ស្មើនឹង ៨% អ្នកជំងឺសម្រាកពេទ្យមាន ៣៨,៦៥២ ករណី កើនឡើងចំនួន ១,២៨៥ ស្មើនឹង ៣% អត្រាប្រើប្រាស់គ្រែនៅមន្ទីរពេទ្យមាន ១០៥% ដោយមានគ្រែសម្រាកអ្នកជំងឺ ៤០០ គ្រែ និងអត្រាមរណភាពក្នុងមន្ទីរពេទ្យ ឆ្នាំ ២០២៤ ថយមកនៅត្រឹម ០.៦៦% ខណៈឆ្នាំ ២០២៣ មាន ០.៦៩%៕

អត្ថបទ ៖ សំអឿន