ប្រលោមលោកមនោសញ្ចេតនាបែបអភិនីហារ​ ស្នេហាចាំជាតិ​រវាងមនុស្សប្រុស​ និងមនុស្សប្រុស ឬ BL ត្រៀមខ្លួនបង្ហាញវត្តមានសម្រាប់មិត្តអាននៅខែមិថុនានេះហើយ។

រឿង “មកតាមសន្យា” ត្រូវបានអ្នកនិពន្ធ ពៅ មករា ដែលជាម្ចាស់ស្នាដៃប្រាប់ថា នឹងចេញផ្សាយនៅក្នុងខែមិថុនា ឆ្នាំ ២០២១នេះ ជាមួយសាច់រឿងថ្មី ប្លែក ខ្លឹមសារបង្កប់ដោយគុណតម្លៃបុណ្យបាប និងបញ្ហាសង្គមជាក់ស្ដែង។

ទាំងនេះជាចំណុចពិសេសៗទម្រាំរឿង “មកតាមសន្យា” ប្រសូតចេញ៖

១. ការបំផុសគំនិតអំពីតួអង្គនាគ

មុនពេលចាប់ផ្ដើមតាក់តែងប្រលោមលោកនេះ លោក ពៅ មករា បានប្រាប់ថា ទាំងតួអង្គ និងសាច់រឿងជាការបំផុសគំនិតមកពីស្រុកកំណើតរបស់លោកនៅឯខេត្តព្រះសីហនុ  ដែលទីនោះជាដែនសមុទ្រ និងជាប្រភពទឹកសត្វនាគដែលដូនតាធ្លាប់តែតំណាល។ មួយវិញទៀត ដោយសារខ្មែរមានព្រេងនិទានរឿង​ ព្រះថោងនាងនាគ ផងនោះ ទើបបានជា ប្រលោមលោក “មកតាមសន្យា” មានតួអង្គនាគ។

២. ពេលវេលានៃការសរសេរ

ប្រលោមលោកនេះ ចាប់ផ្ដើម​រៀបចំឆ្អឹងរឿង​និងសរសេរតាំងពីខែមករា រហូតដល់​ដើមខែមិថុនា​ ឆ្នាំ២០២១ ពោលគឺប្រើពេលប្រមាណ ៥ ​ខែឯណោះ។

ក្នុងនោះអ្នកនិពន្ធជាបុគ្គលិកពេញម៉ោងនៅស្ថានីយទូរទស្សន៍មួយ​ ដូច្នេះការញែកពេលសម្រាប់បញ្ចប់រឿងសុទ្ធសឹងជួបការលំបាក។ លោក ពៅ មករា និយាយថា ព្រោះរវល់ការងារ ជួនកាលដាច់អារម្មណ៍សរសេរ ​ធ្វើឱ្យឈុតខ្លះត្រូវដកចោល​និងលុបចោលសរសេរឡើងវិញ២ទៅ៣ដង។ ចំណែកពេលដែលអាចឆ្លៀតបាន​ គឺមានតែពេលយប់ឬថ្ងៃអាទិត្យប៉ុណ្ណោះ។

ទោះយ៉ាងណា អ្នកនិពន្ធថា នៅដោយសារសាច់រឿងនេះដក់ក្នុងបេះដូងលោក វាក៏ក្លាយជាកម្លាំងជំរុញរហូតរឿង “មកតាមសន្យា” អាចសរសេរចប់ទៅសព្វគ្រប់។

៣. បញ្ហាកម្មផលដែលជាគុណតម្លៃនៃរឿង

ម្ចាស់ស្នាដៃបានឱ្យដឹងថា រឿងនេះផ្តោតធំទៅលើកម្មពៀររបស់មនុស្សកសាងពីជាតិមុនដែលនឹងទទួលផលនៅជាតិនេះ។ ដូចបុរាណពោលថា “ធ្វើអី បានហ្នឹង” ។

លើសពីនោះទៀត ត្បិតរឿងនេះជាប្រភេទ BL ក៏ពិតមែន​ ប៉ុន្តែខ្លឹមសារមានចំណុចតថភាពសង្គមនៃមនុស្សស្រលាញ់ភេទដូចគ្នាមួយចំនួនផងដែរ។ ទោះនៅក្នុងសង្គមកម្ពុជាមិនទាន់ទទួលស្គាល់ស្នេហាភេទដូចគ្នា ប៉ុន្តែស្នេហាបែបនេះមិនបានបង្កការឈឺចាប់ដល់អ្នកដទៃ ឬបំផ្លាញប្រយោជន៍បុគ្គលណានោះទេ។ ដូច្នេះ ការរើសអើងមនុស្សស្រឡាញ់ភេទដូចគ្នា មិនគួរបន្តទៀតឡើយ។

ចុងក្រោយ អ្នកនិពន្ធ ពៅ មករា ក៏បានលើកឡើងពីកំហុសឆ្គងរបស់ខ្លួននិងស្នើសុំឱ្យមានការយោគយល់ចំពោះលោកផងដែរ។ លោកថ្លែងដូច្នេះ “ខ្ញុំដឹងថា ទោះស្នាដៃមួយនេះសរសេរឡើងដោយបេះដូង​ ឬប្រើអស់កម្លាំងកាយយ៉ាងណា ក៏នៅតែមានចំណុចខ្វះខាតតិចឬច្រើន​ តែខ្ញុំនៅតែរីករាយក្នុងការទទួលយកមតិរិះគន់​ កែលម្អពីបងប្អូនមិត្តអ្នកអានដើម្បីជំរុញស្នាដៃខ្ញុំក្រោយៗឱ្យល្អជាងនេះផងដែរ”៕

អត្ថបទ៖ សន្យា

ចុចអាន៖ “សំណុំឯកសារ Z22” ក្លាយជារឿងមានអ្នកអានច្រើនជាងគេក្នុងចំណោមសំណុំក្ដីរបស់ សុភាប្រុស

ចុចអាន៖ ចាយ គឹមហ៊ាង៖ រាល់​ប្រលោម​លោក​​របស់អ្នកនិពន្ធ ​ម៉ីសន សុធារី ខ្ញុំ​អាន​មិន​តិច​ជាង៣ដងទេ