អត្ថប្រយោជន៍ដ៏គួរឲ្យភ្ញាក់ផ្អើល ៦ យ៉ាង អំពីការធ្វើក្រចកដៃ និងជើងទៀងទាត់

ស្រីៗគ្នាយើងធ្វើក្រចកម្ដងៗមិនអស់តិចទេ ហេតុតែចង់ស្អាត ជួនកាលគេកាត់សាច់ឈាមទៀត ប៉ុន្តែនៅតែទ្រាំដើម្បីស្អាត។ បើនិយាយពីរឿងលុយវិញ តែងតែឮមាត់ករថា​ធ្វើ​អស់​តែ​លុយ​ស្អាត​មួយ​ភ្លែត​ខូច​ក្រចក​អស់ តាមពិត​មិនមែន​ចំណាយលុយ​ឥតប្រយោជន៍​ទេណា។ ថ្ងៃនេះ “កម្ពុជាថ្មី” នឹង​បកស្រាយ​អំពី​អត្ថប្រយោជន៍ ៦យ៉ាង​នៃ​ការ​ធ្វើ​ក្រចក​ទៀងទាត់​មក​ជូន​ប្រិយមិត្ត​អ្នកអាន ជាពិសេសស្រីៗតែម្ដង៖

១. ការពារការឆ្លងមេរោគ

ការផ្ដល់សំណើមដល់ស្បែកជាប្រចាំអាចបង្ការកុំឲ្យស្បែកដៃជើងប្រេះ ព្រោះថាស្បែកប្រេះងាយនឹងឆ្លងមេរោគតាមចន្លោះប្រេះណាស់។ ដូចដែរយើងបានដឹងកន្លងមកថាក្រចកវែងពេក ឬសម្អាតមិនស្អាតប្រាកដជាមានមេរោគតាមក្រចកជាមិនខាន។

២. ជួយឲ្យឈាមដើរស្រួល

អំឡុងពេលធ្វើក្រចក អ្នកនឹងទទួលសេវាកម្មម៉ាស្សាដៃ ជើង និងបាតជើងជាដើម។ សេវាកម្មនេះនឹងជួយសម្រួលលំហូរឈាម កាត់បន្ថយភាពនឿយហត់នៃសាច់ដុំបានយ៉ាងល្អ។

៣. ជួយសុខភាពក្រចកឲ្យប្រសើរឡើង

ធ្វើក្រចកជាទៀងទាត់អាចការពារអ្នកពីជំងឺផ្សិតក្រចកនិងជំងឺផ្សេងៗទាក់ទងនឹងក្រចក ម្យ៉ាងទៀតការជម្រុះកោសិកាពេលធ្វើក្រចកនឹងជួយបណ្ដុះកោសិកាថ្មីធ្វើឲ្យក្រចកយើងដុះមកមានសុខភាពល្អនិងរឹងមាំ។

៤. សម្រួលបញ្ហាឈឺខ្នង

ប្រសិនបើអ្នកមានក្រិននៅបាតជើង ក្រៅពីអត់ស្អាតហើយថែមទាំងឈឺទៀត ចំណុចនេះអាចប៉ះពាល់ដល់ការទ្រទម្ងន់របស់អ្នកដែលបណ្ដាលឲ្យឈឺខ្នង។ ការធ្វើក្រចកបូករួមទាំងការជម្រុះកោសិកាជួយសម្អាតស្បែកជើងយើង ការពារភាពក្រិន និងបំបាត់ការឈឺចាប់។

៥. ជួយឲ្យស្បែកដៃ និងជើងមើលទៅក្មេងជាងវ័យ

​លំហូរ​ឈាម​មាន​សារៈ​សំខាន់ណាស់​ក្នុង​ការ​កាត់​បន្ថយ​ក្រិន រឹតបន្តឹង​ស្បែក និង​ពង្រឹង​សាច់ដុំ​របស់​អ្នក ដែល​ទាំង​អស់​នេះ​អាច​កែ​លម្អ​រូបរាង​ដៃ និង​ជើង​របស់​អ្នក​ឱ្យ​កាន់​តែ​ក្មេងស្អាត។

៦. ពង្រឹងផ្លូវចិត្តឲ្យស្រស់ថ្លា

មិនត្រឹមតែជួយសម្រស់នោះទេ ការធ្វើក្រចកអាចជួយឲ្យអ្នកដែលមានអារម្មណ៍ធុញថប់បានធូរស្រាលពីការនឿយហត់មានអារម្មណ៍ថាស្បើយពីការងារ។

ទោះជាយ៉ាងណាក្ដី ការធ្វើក្រចកនៅកន្លែងដែលគ្មានជំនាញមិនអាចផ្ដល់អត្ថប្រយោជន៍ខាងលើឲ្យអ្នកទាំងអស់នោះទេ ពេលខ្លះអ្នកអាចនឹងឆ្លងមេរោគពីកន្ត្រៃដែលហាងលាងមិនស្អាតទៀតផង៕

ប្រែសម្រួលដោយ៖ វារី

ចុចអាន៖ឆ្នូតពណ៌ខ្មៅ ឬត្នោតនៅលើក្រចកដៃ បណ្តាលមកពីអ្វី?

ចុចអាន៖ចេះតែឈឺមិនជា ដោយសារតែមិនកាត់ក្រចកដៃឲ្យខ្លីៗ ទុកឲ្យបាក់តេរីនិងផ្សិតតោងជាប់