លោកស្រី ឱ វណ្ណឌីនៈ មើលព័ត៌មានបំភ័យ និងប្រឌិតជាប្រចាំនាំឱ្យកើតជំងឺផ្លូវចិត្ត

លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានប្រាប់កុំឱ្យប្រជាពលរដ្ឋចំណាយពេលវេលាទៅមើលព័ត៌មានរន្ធត់ ព័ត៌មានប្រឌិត ដែលវាអាចបណ្តាលឱ្យកើតជំងឺផ្លូវចិត្តមិនដឹងខ្លួន ក្នុងពេលកើតមានវិបត្តិ​កូវីដ១៩។

លោកស្រីថ្លែងថា “ក្នុងមួយថ្ងៃប្រសិនបើយើងចំណាយពេល២ម៉ោង ក្នុងការអាន ឬមើលព័ត៌​មានដែលរន្ធត់ ព័ត៌មានដែលមិនពិត ព័ត៌មានដែលប្រឌិត ធ្វើឱ្យយើងខ្វាយខ្វល់ យើងរន្ធត់ពេក បើសិនជាយើងមើលបែបហ្នឹង ក្នុងរយៈពេល ២ ម៉ោង ក្នុងរយៈពេល ២សប្តាហ៍ លោកអ្នកនឹងមានជំងឺផ្លូវចិត្ត”។

បើតាមលោកស្រី ឱ វណ្ណឌីន នៅក្នុងបរិបទនៃការប្រយុទ្ធនឹងជំងឺកូវីដ១៩ គេក៏សង្កេតឃើញ​ថាមានបងប្អូនមួយចំនួន ក៏មានបញ្ហាផ្លូវចិត្ត ដូច្នេះគេធ្វើការសិក្សា​ទៅថាតើបញ្ហា​ផ្លូវចិត្ត​ហើយរកឃើញថាបញ្ហាផ្លូវចិត្តក៏កើតចេញមកពីការអានព័ត៌​មានឥតប្រយោជន៍នេះដែរ។

លោកស្រី ឱ វណ្ណឌីនបញ្ជាក់ថា “ឥឡូវយើងមាន អ្នកមួយចំនួន ក៏កំពុងតែស្ថិតក្នុងស្ថានភាពនេះដែរ អញ្ចឹងសំខាន់ណាស់ ដើម្បីកុំឱ្យខ្លួនយើងធ្លាក់ទៅលើបញ្ហាផ្លូវចិត្ត កុំទៅមើលអារព័ត៌មានណាចេញតែផ្តេសតែផ្តាស់រុញវាចោល លុបវាចោលទៅ”៕

អត្ថបទ៖ ឡេង ដេត