កំណាត់ផ្លូវ ៣២២ ចាប់ផ្ដើមកើតមានជង្ហុកឡើងវិញ ពលរដ្ឋស្នើអាជ្ញាធរពន្លឿនការជួសជុល

ប្រជាពលរដ្ឋស្នើសុំឲ្យអាជ្ញាធរមូលដ្ឋានសង្កាត់បឹងកេងកង ១ ពិនិត្យមើលកំណាត់ផ្លូវ ៣២២ ពេលនេះចាប់ផ្ដើមកើតមានជង្ហុក ទឹកដក់នៅលើចិញ្ចើមផ្លូវឡើងវិញ ក្រោយជួសជុលប្រើប្រាស់បានមួយកំណាត់ នៅសល់មួយកំណាត់ទៀត។

ជាក់ស្ដែងកំណាត់ផ្លូវដែលកំពុងកើតមានជង្ហុកឡើងវិញនេះ ស្ថិតនៅតាមបណ្ដាយផ្លូវលេខ ៣២២ កែងផ្លូវត្រសក់ផ្អែម សង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ។

បើតាមការសាកសួរជាមួយលោក វណ្ណា ជារត់កង់ដែលតែងតែចាំភ្ញៀវនៅលើកំណាត់ផ្លូវនោះបានអោយដឹងថាលោកសង្កេតឃើញថាជង្ហុកទាំងនេះ ដំបូងឡើងមាន បន្តិចបន្តួចនោះទេ តែដោយសារ មិនជួលជុលទុកអោយជ្ហុកទាំងនោះទៅជាធំទៅៗ ពេលខ្លះឃើញមានម្ចាស់ផ្ទះ បានយកកំទេចថ្មមកចាក់បំពេញជង្ហុក ជៀសវាងមានអ្នកធ្វើដំណើរជិះធ្លាក់ជង្ហុកគ្រោះថ្នាក់ជាយថាហេតុ ។ 

ពាក់ព័ន្ធបញ្ហានេះ លោក ហេង ពិសិដ្ឋ អភិបាលរងខណ្ឌបឹងកេងកង បានប្រាប់កម្ពុជាថ្មី ឲ្យដឹងថា ចំពោះផ្លូវនេះអាជ្ញាធរសង្កាត់ បានលើកជាគម្រោងរួចរាល់ហើយ និង ធើ្វការស្ថាបនាឡើងវិញនៅឆ្នាំក្រោយ ដោយប្រើប្រាស់ថិវិកាអភិវឌ្ឍន៍សង្កាត់។ ចំពៅះផ្លូវនេះនៅសល់តែមួយកំណាត់តែប៉ុណ្ណាះ ចាប់ពីផ្លូវលេខ ៣២២ កែង ៦៣។

លោកអភិបាលរង ក៏បានសូមឲ្យប្រជាពលរដ្ឋដែលធើ្វដំណើរឆ្លងកាត់ផ្លូវខាងលើ មេត្តាអធ្យាស្រ័យដល់ការយឺតយ៉ាវក្នុងការជួសជុលឡើងវិញផង។

គួររំលឹកផងដែរថា កន្លងមកប្រជាពលរដ្ឋរស់នៅក្នុងមូលដ្ឋាន បានរៀបរាប់ពីការលំបាកក្នុងការធើ្វដំណើរ និងសំណូមពរទៅកាន់អាជ្ញាធរពីបញ្ហាផ្លូវនេះផងដែរ ដោយផ្លូវខាងលើនេះចាប់ផ្តើមខូចខាតកាន់តែខ្លាំងទៅៗ ដោយសារមានភ្លៀងធ្លាក់ទឹកហូរច្រោះ បង្កឲ្យកើតមាននូវជង្ហុកសំបុកមាន់កាន់តែច្រើនស្ទើរតែជិះមិនកើតតែម្តង ដែលខូចខាតប្រវែងជិត ១០០ ម៉ែត្រ។៕

អត្ថបទ ៖ ម៉េង