មន្ទីរពេទ្យគន្ធបុប្ផាសៀមរាប បាននិងកំពុងយកចិត្តទុកដាក់ផ្ដល់សេវាសុខាភិបាលជូនគ្រួសារយោធិន និងជនភៀសសឹកជិត៣រយនាក់​

មូលនិធិគន្ធបុប្ផាកម្ពុជាបានឱ្យ ដឹងនៅថ្ងៃទី១៦ ខែធ្នូ ឆ្នាំ២០២៥ ថា ស្រ្តីមានផ្ទៃពោះ និងកុមារនៃគ្រួសារជនភៀសសឹក និងគ្រួសារវីរកងកម្លាំងកម្ពុជាជិត៣រយនាក់ បាន និងកំពុងទទួលបានការថែទាំ និងយកចិត្តទុកដាក់ខ្ពស់ពីក្រុមគ្រូពេទ្យនៃមន្ទីរពេទ្យគន្ធបុប្ផាសៀមរាប។  តាមរបាយការណ៍គិតត្រឹមថ្ងៃទី១៦ ខែធ្នូ  ស្រ្តីមានផ្ទៃពោះ និងកុមារមកពីគ្រួសារភៀសសឹក និងគ្រួសារយោធិនទប់ស្កាត់ការឈ្លានពានរបស់ថៃចំនួន ២៩៥ នាក់ ក្នុងនោះមានស្រ្តីមានផ្ទៃពោះជិតសម្រាល និង សម្រាលរួចចំនួន៨៧ នាក់ និងកុមារជាង២រយនាក់កំពុងទទួលបានការយកចិត្តទុកដាក់។

ប្រធានមន្ទីរពេទ្យគន្ធបុប្ផាសៀមរាប សាស្រ្តាចារ្យ យ៉ៃ ចន្ទនា ឱ្យដឹងថា សមាជិកគ្រួសារភៀសសឹក និងគ្រួសារវីរកងកម្លាំងកម្ពុជា មកទទួលសេវាព្យាបាលនៅមន្ទីរពេទ្យគន្ធបុប្ផាសៀមរាប ភាគច្រើនមកទទួលពិនិត្យផ្ទៃពោះ និងសម្រាល និងកុមារមកទទួលការវះកាត់ ព្យាបាល និងជំងឺទូទៅ ប៉ុន្តែជំងឺទាំងនោះមិនទាន់ចេញជាសញ្ញានៃជំងឺរាតត្បាតណាមួយឡើយ។ លោកប្រធានមន្ទីរពេទ្យបានបន្តថា ក្រុមគ្រូពេទ្យនៃមន្ទីរពេទ្យគន្ធបុប្ផានឹងប្រឹងប្រែងឱ្យអស់ពីលទ្ធភាព ដើម្បីពិនិត្យ និងព្យាបាល ព្រមទាំងផ្តល់ភាពកក់ក្តៅ ដល់ទារក និងកុមារទាំងអស់ ជាពិសេសគ្រួសារភៀសសឹក និងគ្រួសារវីរកងកម្លាំង។

ក្នុងស្មារតីខ្មែរជួយខ្មែរ នាយកប្រតិបត្តិនៃមូលនិធិគន្ធបុប្ផាកម្ពុជា លោក ចន ណារិទ្ធ អំពាវនាវដល់ពលរដ្ឋដែលជាសមាជិកគ្រួសារកំពុងភៀសសឹក និងគ្រួសារវីរកងកម្លាំងកម្ពុជា ជាស្រ្តីមានផ្ទៃពោះ និងកុមារដែលកំពុងមានតម្រូវការពិនិត្យ ព្យាបាល និងសម្រាល ទៅទទួលការព្យាបាល ពិនិត្យជំងឺនានា នៅមន្ទីរពេទ្យគន្ធបុប្ផា ដើម្បីទទួលបានសេវាដោយមិនគិតថ្លៃ និងប្រកបដោយគុណភាព គ្មានការរើសអើង។

បណ្ឌិត ចន ណារិទ្ធ ក៏បានថ្កោលទោសដាច់អហង្ការចំពោះការឈ្លានពានវាយប្រហាររបស់ប្រទេសថៃមកលើអធិបតេយ្យភាពរបស់កម្ពុជា ដោយប្រើយន្តហោះ អាវុធធុនធ្ងន់ និងផ្សែងពុល ចូលក្នុងភូមិសាស្រ្តរបស់ពលរដ្ឋ ដែលបណ្តាលឱ្យស្លាប់ជនស្លូតត្រង់ ជាពិសេសស្រ្តី និងទារក ផងដែរ ដែលជាទង្វើឈ្លានពានកម្ពុជាយ៉ាងធ្ងន់ធ្ងរដែលមិនអាចទទួលយកបាន។

រដ្ឋលេខាធិការក៏បានដឹកនាំក្រុមការងារមូលនិធិគន្ធបុប្ផាកម្ពុជា និងអគ្គលេខាធិការក្រុមប្រឹក្សាជាតិគាំពារសង្គម រួមនិងទីភ្នាក់ងារជាតិបញ្ជាក់ចំណាយ បរិច្ចាគឈាម ដើម្បីត្រៀមជូនវីរកងកម្លាំងជួរមុខដ៏ក្លាហានកម្ពុជា ដែលកំពុងការពារបូរណភាពដែនដីនៃអធិបតេយ្យកម្ពុជាផងដែរ៕