ព័ត៌មានជាតិ

គិតត្រឹមថ្ងៃទី ២៤ ធ្នូ ខេត្តកោះកុង មានពលរដ្ឋភៀសសឹកជិត ២ ពាន់គ្រួសារ

បានផុស

៧ ខែ មុន

នៅ

ថ្ងៃព្រហស្បតិ៍ ២៥ ធ្នូ ២០២៥

ដោយ

អភិបាលខេត្តកោះកុង បង្ហាញថា គិតមកត្រឹមថ្ងៃទី ២៤ ខែធ្នូ ខេត្តកោះកុង មានជនភៀសសឹកសរុប ១.៩៨៣ គ្រួសារ ស្មើនឹងប្រជាពលរដ្ឋសរុប ៦.៨៧៣ នាក់ ដែលកំពុងស្នាក់នៅជាបណ្ដោះអាសន្នទីតាំងមានសុវត្ថិភាពល្អចំនួន ១១ កន្លែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ឈី វ៉ា អភិបាលខេត្តកោះកុង បានបន្តនៅថ្ងៃទី ២៥ ខែធ្នូ ឆ្នាំ ២០២៥ នេះថា ក្នុងចំណោមពលរដ្ឋភៀសសឹក គឺមានស្ត្រីចំនួន ៣.០០៧ នាក់។ ដោយឡែក ព្រះសង្ឃគង់នៅតាមវត្តអារាមក្នុងភូមិសាស្ត្រស្រុកមណ្ឌលសីមា និងក្រុងខេមរភូមិន្ទដែលស្ថិតនៅក្នុងតំបន់ហានិភ័យជាប់នឹងព្រំដែនកម្ពុជា-ថៃ បានភៀសព្រះកាយនិមន្តមកគង់នៅវត្តអារាមផ្សេងៗ មានសុវត្ថិភាពមានចំនួន ១៣៦ អង្គ។

ការថ្លែងទូលបង្គំជារបាយការណ៍ប្រគេនសម្តេចព្រះអភិសិរីសុគន្ធាមហាសង្ឃរាជាអធិបតី កិត្តិឧទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា លោកស្រីអភិបាលខេត្ត រំលេចឱ្យដឹងដែរថា ការគំរាមកំហែងបង្កសង្គ្រាមពីសំណាក់ក្រុមយោធាថៃកាលពីថ្ងៃទី ១៣ ខែធ្នូ ធ្វើឱ្យពលរដ្ឋក្មេងចាស់ប្រុសស្រី បង្ខំចិត្តចាកចោលផ្ទះសម្បែងមករកទីតាំងសុវត្ថិភាព។ ទោះយ៉ាងណាក្រុមការងាររដ្ឋបាលខេត្ត បានយកចិត្តទុកដាក់ខ្ពស់លើការរក្សាសន្តិសុខសណ្ដាប់ធ្នាប់សុវត្ថិភាព ផ្គត់ផ្គង់ស្បៀងអាហារគ្រប់គ្រាន់ និងផ្តល់សេវាសុខាភិបាលជាប្រចាំ ករណីមានជំងឺផ្សេងៗ សម្រាប់ជនភៀសសឹក។

ជាក់ស្ដែង ក្នុងកាលៈទេសៈនេះ បញ្ហាសន្តិសុខតានតឹង និងមានហានិភ័យ លោកស្រី ឈី វ៉ា អះអាងថា ទោះបីជាអាជ្ញាធរមិនទាន់បើកភ្លើងខៀវជូនពលរដ្ឋវិលត្រឡប់ទៅលំនៅឋានវិញក៏ដោយ ក៏មានប្រជាពលរដ្ឋមួយចំនួនខ្លះបានវិលត្រឡប់ទៅលំនៅឋានរបស់ពួកគាត់ដោយខ្លួនឯង។ ព្រោះតែការចាកចោលផ្ទះសម្បែងយូរថ្ងៃ បារម្ភពីសន្តិសុខផង និងទៅបន្តប្រកបមុខរបរចិញ្ចឹមជីវិតផង។

សម្តេចព្រះអភិសិរីសុគន្ធាមហាសង្ឃរាជាអធិបតី កិត្តិឧទេសបណ្ឌិត បួរ គ្រី សម្ដេចព្រះមហាសង្ឃរាជ នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ទ្រង់ព្រះសម្តែងនូវក្តីមេត្តាអាណិតអាសូរចំពោះព្រះសង្ឃ និងពលរដ្ឋដែលកំពុងភៀសសឹកមកទីតាំងសុវត្ថិភាព ព្រោះតែសកម្មភាពរំលោភបំពានឈ្លានពានរបស់យោធាថៃ មកលើបូរណភាពទឹកដីកម្ពុជា។

សម្តេចព្រះអភិសិរីសុគន្ធាមហាសង្ឃរាជាអធិបតី កិត្តិឧទេសបណ្ឌិត បួរ គ្រី មានព្រះបន្ទូលទៀតថា សូមព្រះសង្ឃ និងប្រជាពលរដ្ឋដែលកំពុងមានទុក្ខលំបាក ជឿជាក់លើការដឹកនាំរបស់រាជរដ្ឋាភិបាល និងកងទ័ពជួរមុខក្នុងការដោះស្រាយជម្លោះព្រំដែន។ និងរួបរួមកម្លាំងសាមគ្គីភាពឱ្យបានរឹងមាំ ដើម្បីមាតុភូមិកម្ពុជារបស់យើងបន្តទៀត៕

អត្ថបទ ៖ សិរីវឌ្ឍនៈ