ព័ត៌មានជាតិ

អាជ្ញាធរខណ្ឌកំបូល ចុះរៀបចំអនាម័យតាមដងផ្លូវ លើកកម្ពស់សោភ័ណភាព

បានផុស

៤ ខែ មុន

នៅ

ថ្ងៃចន្ទ ៩ មីនា ២០២៦

ដោយ

អាជ្ញាធរខណ្ឌកំបូល បានចុះសម្អាតបរិស្ថានចាប់ពីព្រំប្រទល់ខណ្ឌពោធិ៍សែនជ័យ រហូតដល់ខណ្ឌដង្កោ ឆ្លងកាត់ភូមិចំនួន ៨ ដើម្បីលើកកម្ពស់សោភ័ណភាពដងផ្លូវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងនារសៀលថ្ងៃទី ៩ ខែមីនា ឆ្នាំ ២០២៦ នេះ កម្លាំងសណ្ដាប់ធ្នាប់ខណ្ឌកំបូល បានចុះសម្អាតតាមដងផ្លូវទាំងអស់នៅក្នុងមូលដ្ឋាន។

លោក ទុយ សុជាតិ អនុប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ បានឲ្យដឹងថា លោកបានដឹកនាំអាជ្ញាធរសង្កាត់ និងភូមិពាក់ព័ន្ធ ចុះសម្អាតអនាម័យ បរិស្ថាន តាមបណ្ដោយផ្លូវមហាវិថីស៊ីជីនពីង អមសងខាងផ្លូវ ដើម្បីថែរក្សាអនាម័យក្នុងមូលដ្ឋាន ឲ្យមានសោភ័ណភាព បរិស្ថានល្អប្រសើរ ក៏ដូចជាជួយកាត់បន្ថយផលប៉ះពាល់សុខភាពប្រជាពលរដ្ឋរស់នៅក្បែរនោះផងដែរ។

លោកបានបន្តថា ការចុះសម្អាតនេះដែរ មន្ត្រីជំនាញ បានធ្វើចាប់ពីព្រំប្រទល់ខណ្ឌពោធិ៍សែនជ័យ រហូតដល់ព្រំប្រទល់ខណ្ឌដង្កោ ឆ្លងកាត់ភូមិចំនួន ៨ ក្នុងនោះ រួមមានភូមិកន្ទោកជើង ភូមិត្រាំស្លឹក ភូមិកប់ភ្លុក ភូមិព្រៃកី ភូមិគោកខ្សាច់(ជើង) ភូមិគោកខ្សាច់(ត្បូង) ភូមិគោកមាស និងភូមិតាំងរនាម ស្ថិតក្នុងសង្កាត់កន្ទោក សង្កាត់ភ្លើងឆេះរទេះ និងសង្កាត់ប្រទះឡាង ខណ្ឌកំបូល រាជធានីភ្នំពេញ។

លោកក៏បានអំពាវនាវដល់អ្នកធ្វើដំណើរ អ្នកប្រកបអាជីវកម្មចល័ត និងប្រជាពលរដ្ឋទាំងអស់ ត្រូវនាំគ្នាចូលរួមថែរក្សាអនាម័យឲ្យបានស្អាតជានិច្ច ជាពិសេសមិនត្រូវចោលសំរាមផ្ដេសផ្ដាសនោះឡើយ៕

អត្ថបទ ៖ រដ្ឋា