ថ្ងៃទី ២៥ ខែមីនា​នេះ ស្ពានឆ្លងទន្លេមេគ្គងខេត្តក្រចេះ បើកឲ្យពលរដ្ឋ​ឆ្លងកាត់ជា​ផ្លូវការ មិនបាច់ឆ្លងទូកដចម្លងទៀតទេ

ស្ពានមិត្តភាពចិន-កម្ពុជាក្នុងខេត្តក្រចេះ នឹងបើកឲ្យប្រជាពលរដ្ឋធ្វើដំណើរឆ្លងកាត់ជាផ្លូវការនៅថ្ងៃទី ២៥ ខែមិនា ឆ្នាំ២០២៦ ខាងមុខនេះ។ នេះបើ​តាមការលើកឡើងរបស់លោក វ៉ា ថន អភិបាលខេត្តក្រចេះ នាព្រឹកថ្ងៃទី១២ ខែមិនា ឆ្នាំ២០២៦ ក្នុងកិច្ចប្រជុំពិភាក្សាស្ដីអំពីការត្រៀមរៀបចំព្រឹត្តិការណ៍ បុណ្យទន្លេលើកទី១០ នៅសាលប្រជុំសាលាខេត្តក្រចេះ។

ទោះជាយ៉ាងណាក្តី ស្ពានឆ្លងទន្លេមេគង្គក្រចេះគឺ​នឹងសម្ពោធដាក់ឲ្យប្រើប្រាស់ជាផ្លូវការនាថ្ងៃទី១ ខែមេសា ឆ្នាំ២០២៦ ដដែលខុសគ្នាតែ ៦ ថ្ងៃប៉ុណ្ណោះ ខណៈ​នៅ​ថ្ងៃស្អែកនេះដែរ​គណៈប្រតិភូនៃក្រសួងសាធារណៈការ​និងដឹកជញ្ជូន ក៏ដូចជាក្រុមហ៊ុនទទួលអនុវត្តការងារស្ថាបនាសាងសងស្ពានផ្លូវ នឹងចុះពិនិត្យមើលអំពីវឌ្ឍនភាពសមិទ្ធផលនានាក្នុងខេត្ត។

លោកអភិបាលខេត្តបានបញ្ជាក់ថា ក្នុងឱកាស​នោះ​លោកក៏​នឹងជួបពិភាក្សា​ជាមួយគណៈប្រតិភូក្រសួងសាធារណៈការ និងដឹកជញ្ជូន ដើម្បីជជែកគ្នាអំពីបញ្ហាលើ​ការជំរុញ​អភិវឌ្ឍហេដ្ឋារចនាសម្ព័ន្ធក្នុង​ខេត្ត​ផង​ដែរ៕

អត្ថបទ៖ ប្រុញ វិធិន