​វិនិយោគ​ជាង ៣០ លាន​ដុល្លារ រោងចក្រ​​កែច្នៃដំឡូងមី​ក្នុងក្រុង​ក្រចេះ ​មួយថ្ងៃ​ផលិតម្សៅមីបានប្រមាណ ​២៤០ តោន

រោងចក្រកែច្នៃដំឡូងមីរបស់ក្រុមហ៊ុន Singsong Industrial (Cambodia) ដែលមានទីតាំងស្ថិតនៅសង្កាត់អូរឫស្សី ក្រុងក្រចេះ កំពុងដើរតួយ៉ាងសំខាន់ក្នុងវិស័យកសិឧស្សាហកម្មក្នុងតំបន់។

រោងចក្រនេះសាងសង់លើផ្ទៃដីជិត ២៣ ហិកតា ក្រោមទុនវិនិយោគប្រមាណ ៣០ លានដុល្លារអាមេរិកពីប្រទេសកូរ៉េ។ ​បច្ចុប្បន្នរោងចក្រមានបុគ្គលិក និងកម្មករសរុបចំនួន ៥៩នាក់ (ខ្មែរ ៥៤នាក់ និងបរទេស ៥នាក់)។

ប្រភពពីក្រុមហ៊ុន​បាន​បញ្ជាក់ថា ចំពោះសមត្ថភាពផលិតកម្ម រោងចក្រអាចផលិតម្សៅដំឡូងមីបានចំនួន ២៤០ តោនក្នុងមួយថ្ងៃ ដោយត្រូវការវត្ថុធាតុដើមជាដំឡូងមីស្រស់រហូតដល់ ៨៩០ តោនជារៀងរាល់ថ្ងៃ។ ចំពោះទីផ្សារវិញ ក្រុមហ៊ុនបាននាំចេញទៅកាន់ប្រទេសកូរ៉េចំនួន ២០% និងផ្គត់ផ្គង់ក្នុងស្រុកចំនួន ៨០%។ ​

រោងចក្រនេះ បានចាប់ផ្តើមដំណើរការកាលពីអំឡុងខែធ្នូ ឆ្នាំ២០១៧ បន្ទាប់ពីឆ្លងកាត់ការពិនិត្យនិងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA)។

ក្រុមហ៊ុន SINGSONG រំពឹងថានឹងក្លាយជាសហគ្រាសឈានមុខគេក្នុងខេត្តក្រចេះ តាមរយៈការប្រមូលទិញកសិផលពីប្រជាកសិករ បង្កើតឱកាសការងារ និងចូលរួមចំណែកក្នុងការការពារបរិស្ថានផងដែរ៕

អត្ថបទ៖ ប្រុញ វិធិន