លោកតាវ័យចំណាស់ ដើរវង្វេងបាត់ពីផ្ទះមួយយប់ ព្រឹកឡើងប្រទះឃើញដេកស្លាប់ ក្រោយធ្លាក់ពីលើភ្នំធំ

លោកតាវ័យចំណាស់ម្នាក់ ដើរវង្វេងបាត់ពីផ្ទះមួយយប់ ប្រជាពលរដ្ឋប្រទះឃើញសពដេកស្លាប់ ដោយសារធ្លាក់ពីលើភ្នំធំ នៅវេលាម៉ោង៥និង៣០នាទីព្រឹកថ្ងៃទី ៧ខែមិថុនា ស្ថិតនៅភូមិភ្នំធំជើង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ។ ជនរងគ្រោះ ឈ្មោះ ទៀង រ៉ុម អាយុ ៧១ឆ្នាំ រស់នៅភូមិ ឃុំ កើតហេតុ។

លោកវរសេនីយ៍ឯក ស៊ិន ណារ៉ាក់ អធិការនគរបាល ស្រុកមង្គលបូរី បានឱ្យដឹងថា ក្រុមគ្រួសារជនរងគ្រោះកើតជំងឺវង្វេងស្មារតី ហើយតែងតែដើរឡើងលើភ្នំធំនេះជាញឹកញាប់។

មុនថ្ងៃកើតហេតុជនរងគ្រោះបានបាត់ពីផ្ទះមួយយប់ លុះព្រឹកវេលាម៉ោង៥និង៣០នាទីព្រឹកប្រជាពលរដ្ឋបានប្រទះឃើញសព ស្លាប់នៅជើងភ្នំធំ។

ក្រោយពីកើតហេតុសមត្ថកិច្ចបានចុះមកដល់កន្លែងកើតហេតុក្រុមក្នុងនោះមាននគរបាលជំនាញបច្ចេកទេសវិទ្យា​សាស្ដ្រ​នគរបាលស្រុក នគរបាលប៉ុស្តិ៍ បុគ្គលិកបណ្ឌលសុខភាពឃុំ មេភូមិ ដើម្បីធ្វើកោសល្យវិច្ច័យលើសពដោយពិនិត្យឃើញថាសពពុំឃើញមានស្នាកស្នាមអំពើឃាតកម្មសពប្រាកដស្លាប់ធ្លាក់ពីលើកំពូលភ្នំដែលមានកំពស់៤០ម៉ែត្រ។សពជនរងគ្រោះត្រូវបានប្រគល់ជូនក្រុមការងាររៀបចំធ្វើបុណ្យតាមប្រពៃណី៕ អត្ថបទ៖ វ៉ាន់ ណាង