ព័ត៌មានជាតិ

សមត្ថកិច្ចចុះរឹតបន្តឹងសណ្តាប់ធ្នាប់ ព្រមទាំងណែនាំដល់ពលរដ្ឋ នៅស្រុកសូទ្រនិគម និងស្រុកជីក្រែង ពីជំងឺកូវីដ១៩

បានផុស

៥ years មុន

នៅ

ថ្ងៃពុធ ៩ មិថុនា ២០២១

ដោយ

បន្ទាប់ពីមានករណីផ្ទុះជំងឺកូវីដ១៩ជាច្រើននាក់ នៅស្រុកសូទ្រនិគម និងស្រុកជីក្រែង កម្លាំងនគរបាលចម្រុះនៃខេត្តសៀមរាប ចុះល្បាត និងរឹតបន្តឹងការងារសន្តិសុខសណ្តាប់ធ្នាប់ ព្រមទាំងណែនាំដល់ពលរដ្ឋឲ្យចេះការពារកូវីដ១៩ នៅក្នុងភូមិសាស្ត្រនៃស្រុកសូទ្រនិគម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តសៀមរាប បានមានប្រសាសន៍ឲ្យដឹងនៅព្រឹកថ្ងៃទី០៩ ខែមិថុនា ឆ្នាំ២០២១នេះថា សកម្មភាពកម្លាំងក្រុម១ នៃការិយាល័យនគរបាលព្រហ្មទណ្ឌកម្រិតធ្ងន់ ដោយបានសហការជាមួយកម្លាំងនគរបាលការិយាល័យអន្តរាគមន៍, កម្លាំងអាវុធហត្ថ និងកម្លាំងនគរបាលប៉ុស្តិ៍ បានចុះល្បាតក្នុងភូមិសាស្ត្រស្រុកសូទ្រនិគម។ លោកបន្តថា កម្លាំងចម្រុះបានធ្វើការអប់រំណែនាំដល់ប្រជាពលរដ្ឋ ដែលបំពានបម្រាមរបស់រាជរដ្ឋាភិបាល គឺប្រមូលផ្តុំជួបជុំផឹកស៊ីចំនួន៣កន្លែង មានមនុស្ស ១៤នាក់ (ប្រុស ១១នាក់ /ស្រី ៣នាក់)។ ក្នុងនោះក៏បានអប់រំម្ចាស់តូបចាប់ហួយឲ្យផ្អាកលក់គ្រឿងស្រវឹងចំនួន៣ទីតាំង។

ពាក់ព័ន្ធនឹងករណីនេះដែរលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានមានប្រសាសន៍ថា ចាប់ពីថ្ងៃទី០៥ដល់ថ្ងៃទី០៩ ខែមិថុនា ឆ្នាំ២០២១នេះ អាជ្ញាធរបានរកឃើញអ្នកវិជ្ជមានកូវីដ១៩ នៅស្រុកសូទ្រនិគម និងស្រុកជីក្រែងចំនួន៧០នាក់ហើយ។ ក្នុងនោះសមត្ថកិច្ចកំពុងមានវិធានការទប់ស្កាត់បន្ថែមទៀត។

សូមរម្លឹកថា បន្ទាប់ពីកម្លាំងនគរបាល ពលរដ្ឋ និងគ្រូពេទ្យបានឆ្លងជំងឺកូវីដ១៩ កាលពីថ្ងៃទី០៥ ខែមិថុនា ឆ្នាំ២០២១ អាជ្ញាធរខេត្តសៀមរាប បានបញ្ជូនកម្លាំងសមត្ថកិច្ចជំនាញចុះមកពង្រឹងការងារផ្សេងៗនៅក្នុងស្រុកសូទ្រនិគម ឲ្យមានភាពល្អប្រសើរឡើងវិញ៕

អត្ថបទ៖ កុសល