លួច​លុយ​ជាង ២០ លាន​រៀល​ ដើរ​ស៊ីចាយ​បាន​មួយ​ថ្ងៃ​ ត្រូវ​ប៉ូលិស​ក្របួច​ជាប់

ជនសងស្ស័យម្នាក់ត្រូវបានប៉ូលីសស្រុកបាទី ចាប់ខ្លួននៅព្រឹកថ្ងៃទី១០ ខែមិថុនា ឆ្នាំ២០២១ ក្រោយចូលផ្ទះជនរងគ្រោះប្រមែប្រមូលយកលុយនិងមាសបានមួយចំនួនធំ និងដេីរស៊ីចាយបានមួយថ្ងៃ។

ប៉ូលីសស្រុកបាទីបញ្ជាក់ថា ហេតុការណ៍នេះកេីតឡេីងថ្ងៃទី០៩ ខែមិថុនា ឆ្នាំ២០២១ វេលាម៉ោង០៩និង១០នាទី នៅចំណុចផ្ទះឈ្មោះ សំរិត សាឡុង ភេទប្រុស អាយុ៤៨ឆ្នាំ ស្ថិតក្នុងភូមិស្មៅខ្ញី ឃុំត្រពាំងសាប ស្រុកបាទី ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយទទួលបានពាក្យបណ្តឹងពីជនរងគ្រោះ កម្លាំងជំនាញបានបេីកការស្រាវជ្រាវនិងសហការជាមួយកម្លាំងប៉ុស្តិ៍នគរបាលរដ្ឋបាលពាក់ព័ន្ធ ដោយមានការចូលរួមពីក្រុមគ្រួសារជនរងគ្រោះផង ទើបនៅព្រឹកថ្ងៃទី១០ ខែមិថុនា ឆ្នាំ២០២១ កម្លាំងជំនាញបានកំណត់មុខសញ្ញា និងឈានដល់ឃាត់ខ្លួនជនសង្ស័យម្នាក់ឈ្មោះ ឌឹម សុវណ្ណារ៉ា ភេទបុ្រស អាយុ២៣ឆ្នាំ មានទីលំនៅភូមិរលាំងគ្រើល ឃុំត្រពាំងសាប ស្រុកបាទី។

ដោយឡែកម្ចាស់ផ្ទះបានឲ្យដឹងដែរថា ទ្រព្យសម្បត្តិ៍ដែលចោរលួចយកទៅរួមមាន ប្រាក់ចំនួន២៧លានរៀល ខ្សែកមាស២ខ្សែទម្ងន់១តម្លឹង ខ្សែដៃមាស១ខ្សែទម្ងន់៥ជី ចិញ្ចៀនមាស២វង់ទម្ងន់៦ជី បន្តោងខ្សែកទម្ងន់៥ហ៊ុន (ទុកក្នុងទូរក្នុងបន្ទប់ដេកប្រហេសមិនបានចាក់សោរ) ។

ក្រោយចាប់ខ្លួន សមត្ថកិច្ចរកឃេីញវត្ថុតាងមានប្រាក់រៀលចំនួន១០៤៥០០០០រៀល (ដប់លាន សែសិបប្រាំម៉ឺនរៀល)
ខ្សែកមាស២ខ្សែទម្ងន់១តម្លឹង ខ្សែដៃមាស១ខ្សែទម្ងន់៥ជី ចិញ្ចៀនមាស២វង់ទម្ងន់៦ជី បន្តោងខ្សែកទម្ងន់៥ហ៊ុន ម៉ូតូ០១គ្រឿង ម៉ាក ឌូក ពាក់ផ្លាកលេខភ្នំពេញ 1CF-9374។

ជនសង្ស័យខាងលើបានសារភាពថា រូបខ្លួនពិតជាធ្វើសកម្មភាពលួចទ្រព្យសម្បត្តិនៅផ្ទះជនរងគ្រោះពិតប្រាកដមែន ដែលក្រោយធ្វើសកម្មភាព ជនសង្ស័យបានយកប្រាក់ទៅទិញម៉ូតូម០១គ្រឿង ដែលបានដកហូតមកស្រាប់ និងដើរស៊ីចាយអស់មួយចំនួន។

បច្ចុប្បន្នជនសង្ស័យត្រូវបានកម្លាំងជំនាញធ្វេីការសាកសួរ ដើម្បីកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី រីឯវត្ថុតាងពាក់ព័ន្ធបានប្រគល់ជូនជនរងគ្រោះវិញហេីយ៕

អត្ថបទ ៖ វីរៈ