ទីតាំង​ធ្វើតេស្ត​រហ័ស​ចំនួន​៥​កន្លែង ​ក្នុង​ខេត្តស្ទឹងត្រែង​ បាន​រក​ឃើញ​អ្នក​ឆ្លង​ជំងឺ​កូ​វីដ ៣៥​នាក់​បន្ថែមទៀត​

ទីតាំង​ធ្វើតេស្ត​រហ័ស​ ចំនួន៥​កន្លែង​ ក្នុង​ខេត្តស្ទឹងត្រែង ត្រូវបាន​រដ្ឋបាលខេត្ត​ប្រកាស គិត​ត្រឹម​ម៉ោង​៥​ល្ងាច ថ្ងៃ​ទី​២៩ ខែ​មិថុនា​ឆ្នាំ ២០២១​នេះ បាន​រកឃើញ​អ្នក​ឆ្លង​ជំងឺ​កូ​វីដ​១៩​ ចំនួន៣៥​នាក់​បន្ថែម​ទៀត​។​

ទីតាំង​ចំនួន​៥ កន្លែង​ខាងលើ​មាន ទី​១-​មណ្ឌល​ច​ត្តា​ឡី​ស័ក​ក្រុង ក្នុងភូមិ​ស្រែ​ពោធិ៍ ទី​២-​មុខ​សាលាខេត្ត​ស្ទឹងត្រែង ក្នុង​ភូមិ​ត្រពាំង​ព្រីង ទី​៣-​ទីតាំង​អូរ​ពងមាន់ ក្នុងភូមិ​រាជា​នុ​កូ​ល ទី​៤-​ទីតាំង​អូ​ឬ​ស្សី​កណ្ដាល ក្នុងភូមិ​អូរ​ឬ​ស្សី​កណ្ដាល ទី​៥ -​ទីតាំង​សាលាបឋមសិក្សា​ច្រប់ ក្នុងភូមិ​ច្រប់​។​

ក្រុមគ្រូពេទ្យ​បានបញ្ជាក់​ថា ទីតាំង​ចំនួន៥កន្លែង​ខាងលើ ជាទី​តាំង​សម្រាប់​ប្រជាពលរដ្ឋ​ដែលមាន​ការពាក់ព័ន្ធ នឹង​អ្នក​វិជ្ជមាន​ជំងឺ​កូ​វីដ​១៩ ប៉ះពាល់​ដោយផ្ទាល់ ឬ​ប្រយោល​អាចមក​ពិនិត្យ​រក​មេរោគ​កូ​វីដ​១៩ ដើម្បី​សុខភាព​ផ្ទាល់ខ្លួន និង​ជៀសវាង​ការរីក​រាលដាល ឆ្លង​ដល់​អ្នក​ដទៃទៀត​។​

ដោយសារ​ស្ថានភាព​រយៈពេល​ចាប់ពី​ថ្ងៃ ២៤ ដល់​ថ្ងៃទី ២៩ មិថុនា​នេះ ជំងឺ​កូ​វីដ​១៩ មានការ​កើនឡើង និង​រីក​រាលដាល​ដល់ទី​ជនបទ ក្នុងភូមិ​មួយចំនួន ក្នុង​ខេត្តស្ទឹងត្រែង មិនមាន​ការ​ថមថយ អាជ្ញាធរខេត្ត បានរៀបចំ​ដាក់​ទីតាំង​ក្នុង​ក្រុង និង​នៅ​ទីជនបទ ជា​កន្លែង​ផ្ទុះ​កូ​វី​១៩ ងាយស្រួល​ដល់​អ្នកពាក់ព័ន្ធ​ផ្ទាល់ និង​ប្រយោល​ក្នុងការ​ធ្វើតេស្ត​រក​ជំងឺ​កូ​វីដ​ផងដែរ​។​

គិត​ត្រឹម​ម៉ោង​៥​ល្ងាច​ថ្ងៃទី ២៩​ខែមិថុនា ​ឆ្នាំ​២០២១​នេះ ខេត្តស្ទឹងត្រែង មាន​អ្នក​ឆ្លង​កូ​វីដ​១៩ មាន​ចំនួន​២៥៤​នាក់ ស្រី​១២៣​នាក់ ជាសះស្បើយ​១៦​នាក់ ស្លាប់​គ្មាន និង​អ្នក​កំពុង​សម្រាក​ព្យាបាល ២៣៨​នាក់ ស្រី​១១៦​នាក់​៕​

អត្ថបទ៖ ងិន​លីម​

សូមចុចអាន៖ បញ្ជូន​ទៅព្យាបាល​ភ្លាមៗ ​មន្ត្រីនគរបាល២រូប តេស្ត​មាន​​កូវីដ-១៩