ក្រសួងព្រមាន កុំ​ទិញឧបករណ៍តេស្តរក​​កូវីដ​តាមប្រព័ន្ធ​អនឡាញ

ភ្នំពេញ៖ ក្រសួងសុខាភិបាលបានហាមប្រាមដល់អ្នកប្រកបវិជ្ជាជីវៈសុខាភិបាល និងសាធារណជន កុំទិញឧបករណ៍តេស្តរកអង់ទីហ្សែនកូវីដ១៩ តាមប្រព័ន្ធអនឡាញព្រោះអាចប្រឈមឧបករណ៍​ដែល​មានគុណភាពមិន​ត្រឹមត្រូវ ឬអាចជាផលិតផលក្លែងបន្លំទៀតផង។

យោងតាមសារាចរណែនាំស្ដីពីការបែងចែកចាយ និងលក់ទៅរហ័សរកអង់ទីហ្សែនកូវីដ១៩ចុះថ្ងៃទី២៧ កក្កដា​ ក្រសួង​សុខាភិបាល​បាន​ណែនាំចំពោះគ្រឹះស្ថានអាហរ័ណនីហរ័ណឱសថ ត្រូវធ្វើការបែងចែកតេស្តរហ័សរកអង់ទីហ្សែនកូវីដ១៩ ដែលមានលេខបញ្ជិការពីក្រសួងសុខាភិបាលជូនដល់ឱសថស្ថានឱសថស្ថានរងមន្ទីរពេទ្យឯកជន មន្ទីរពហុព្យាបាលមន្ទីរសម្រាកព្យាបាលនិងគ្លីនិច។

ចំពោះឱសថស្ថានឱសថស្ថានរង ត្រូវទិញតែឧបករណ៍រកអង់ទីហ្សែនកូវីដ១៩ ដែលចុះបញ្ជិការពីក្រសួងសុខាភិបាល ហើយលក់ជូនអ្នកប្រកបវិជ្ជាជីវៈសុខាភិបាលនិងប្រជាជនទូទៅ ដើម្បីប្រើប្រាស់និងហាមដាច់ខាត​ការលក់ និងទិញឧបករណ៍តេស្តតាមប្រព័ន្ធអនឡាញគ្រប់ប្រភេទ។

ចំពោះអ្នកប្រកបវិជ្ជាជីវៈសុខាភិបាល និងប្រជាពលរដ្ឋត្រូវទិញតេស្តរហ័សអង់ទីសែនកូវីដ១៩ ដែលមានលេខបញ្ជិកាត្រឹមត្រូវពីឱសថស្ថានឱសថស្ថានរងស្របច្បាប់ ត្រូវចៀសវាងការទិញឧបករណ៍​តេស្តរហ័សនេះ​ពី​តាមប្រព័ន្ធអនឡាញគ្រប់ប្រភេទ ព្រោះឧបករណ៍​នេះតម្រូវឱ្យមានការទុកដាក់ត្រឹមត្រូវ និងត្រូវមានប្រភពច្បាស់លាស់ បើមិនដូច្នោះទេអាចប្រឈមតេស្តរហ័ស ដែលមានគុណភាពមិនត្រឹមត្រូវឬអាចជាផលិតផលក្លែងបន្លំទៀតផង៕

អត្ថបទ៖ សំអឿន