ព័ត៌មានជាតិ

មេបញ្ជាការយោធភូមិភាគទី៥ ដាក់បទបញ្ជាឲ្យទប់ស្កាត់ការនាំចូលរថយន្តចង្កូតស្ដាំ តាមខ្សែបន្ទាត់ព្រំដែន

បានផុស

៤ years មុន

នៅ

ថ្ងៃសៅរ៍ ៤ កញ្ញា ២០២១

ដោយ

មេបញ្ជាការយោធភូមិភាគទី ៥ ដាក់បទបញ្ជាឲ្យបណ្តាកងឯកភាពទប់ស្កាត់ ការនាំចូលរថយន្តចង្កូតស្ដាំមកក្នុងប្រទេសកម្ពុជា ហើយក្នុងករណីយោធិនណាឃុបឃិតលួចនាំចូល មេបញ្ជាការកងឯកភាពនោះ នឹងត្រូវប្រឈមចំពោះមុខច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការដាក់បទបញ្ជានេះបានធ្វើឡើងបន្ទាប់ពីមានចំណារពីសម្តេចនាយករដ្ឋមន្ត្រី ហ៊ុន សែន តាមសំណើររបស់រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ឲ្យមេបញ្ជាការយោធភូមិភាគទី ៥ ទប់ស្កាត់ការនាំចូលរថយន្តចង្កូតស្ដាំមកក្នុងប្រទេសកម្ពុជា។

យោងតាមបទបញ្ជា ស្តីពីការទប់ស្កាត់ ការនាំចូលរថយន្តចង្កូតស្ដាំមកក្នុងប្រទេសកម្ពុជា ដែលទើបទទួលបាននៅថ្ងៃនេះ លោកឧត្តសេនីយឯក ឯក សំអូន មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ បានចេញបទបញ្ជាឲ្យគ្រប់បណ្តាកងឯកភាព ដែលឈរជើងនៅតាមខ្សែបណ្ដោយព្រំដែន ត្រូវសហការជាមួយបណ្តាកងឯកភាព និងបណ្ដាស្ថាប័នដែលមានការពាក់ព័ន្ធ ទប់ស្កាត់ឲ្យបានដាច់ខាត នូវការលួចនាំចូលរថយន្តចង្កូតស្តាំតាមច្រករបៀងនៅតាមខ្សែបណ្ដោយព្រំដែន។

លោក ឧត្តសេនីយឯកបានមានប្រសាសន៍ថា ក្នុងករណីមានយោធិនណាឃុបឃិតក្នុងការលួចនាំចូលរថយន្តចង្កូតស្កាំ តាមច្រករបៀងនៅតាមខ្សែបណ្ដោយព្រំដែន ល្មើសនឹងសេចក្តីសម្រេចនេះ មេបញ្ជាការកងឯកភាពនោះ នឹងត្រូវប្រឈមចំពោះមុខច្បាប់។

លោក ឧត្តសេនីយឯក បានណែនាំឲ្យមេបញ្ជាការប្រចាំទិសទី១ ទិសទី២ ទិសទី៣ នៅប៉ៃលិន-សំឡូត និងទិសទី៤ ត្រូវផ្សព្វផ្សាយបទបញ្ជានេះ ដល់មេបញ្ជាការគ្រប់កងឯកភាព ស្ថិតនៅក្នុងភូមិសាស្ត្រទទួលខុសត្រូវរបស់ខ្លួនឲ្យបានឆាប់បំផុត៕

អត្ថបទ៖សំអឿន

Related Topics:ការនាំចូល