ព័ត៌មានជាតិ

ការវះកាត់ព្យាបាលភ្នែកកូនប្រុស យឿន ពិសី ត្រូវពន្យារពេលទៅខែក្រោយ

បានផុស

៥ years មុន

នៅ

ថ្ងៃសុក្រ ១០ កញ្ញា ២០២១

ដោយ

ទើបតែសម្រាលចេញពីផ្ទៃម្តាយមិនទាន់បានប៉ុន្មានខែផង កូនប្រុសរបស់តារាចម្រៀង និងម្ចាស់ពានរង្វាន់Cambodia’s Got Talent រដូវកាលទី១ យឿន ពិសី ក៏ស្រាប់តែឮដំណឹងថា ត្រូវចូលពេទ្យដើម្បីវះកាត់ព្យាបាលភ្នែកទាំងវ័យក្មេង។

នៅលើទំព័រហ្វេសប៊ុករបស់ យឿន ពិសី កាលពីម្សិលមិញបានលើកឡើងថា«សង្ឃឹមថាការវះកាត់ព្យាបាលភ្នែកនៅថ្ងៃស្អែកនេះ កូនសម្លាញ់នឹងទទួលបានជោគជ័យរហូតតទៅណាកូនសម្លាញ់(យឿន វីរៈបុត្រ)» ។ដំ ណឹងនេះ បានធ្វើឲ្យមហាជនព្រួយបារម្ភនិងជួនពរគ្រប់គ្នា។

ដោយឡែក បើតាមការបញ្ជាក់ឲ្យដឹងពីតារាចម្រៀងវ័យក្មេង យឿន ពិសី តាមរយៈកម្ពុជាថ្មីនៅរសៀលថ្ងៃទី១០ ខែកញ្ញា ឆ្នាំ២០២១នេះបាននិយាយថា ការវះកាត់ភ្នែកកូនប្រុសសំណព្វចិត្តរបស់ខ្លួន ត្រូវបានលើកពេលវិញហើយ គឺកំណត់ទៅខែក្រោយវិញ (តុលា)។

ពិសី ក៏បានលើកឡើងហេតុផល បន្ទាប់ពីពិគ្រោះជាមួយក្រុមគ្រូពេទ្យជំនាញផ្នែកវះកាត់ភ្នែកថា មូលហេតុ ដោយសារកូនប្រុសលោកនៅខ្ចីខែពេក ព្រោះមកទល់ពេលទើបសម្រាលបាន២ខែ ដូច្នេះមិនទាន់គ្រប់គីឡូ ដែលត្រូវវះកាត់ឡើយ។ លោកថា ការវះកាត់ត្រូវប្រើថ្នាំសណ្ដំ(ថ្នាំសន្លប់) ប៉ុន្តែកូនប្រុសខ្លួនមិនទាន់អាចគ្រប់គីឡូ ដែលប្រើថ្នាំនេះបានទេ។

តារាចម្រៀង យឿន ពិសីបានបន្ថែមថា ក្នុងនាមលោកជាឪពុកពិតជាមានក្តីព្រួយបារម្ភខ្លាំង ចំពោះសុខភាពកូន ដោយហេតុថា ណាមួយខ្លាចហួសពេល ព្រោះភ្នែកទាំងសងខាងរបស់កូន គឺមានសភាពឡើងបាយ តែបន្ទាប់ពីពិគ្រោះជាមួយគ្រូពេទ្យជំនាញ ទើបធ្វើឲ្យមានការរំសាយចិត្តខ្លះ៕

អត្ថបទ៖ ចាន់រ៉ា