៤ សង្កាត់នៅ​ក្រុង​តាខ្មៅ កំពុង​ខ្វះខាតទឹកស្អាត​ប្រើប្រាស់

លោក គង់ សោភ័ណ្ឌ អភិបាល នៃគណៈអភិបាលខេត្តកណ្ដាលស្នើដល់រដ្ឋករទឹកស្វយ័តក្រុងភ្នំពេញជួយផ្គត់ផ្គង់ទឹកបន្ថែមទៀតនៅក្រុងតាខ្មៅឱ្យធានាបាននូវការប្រើប្រាស់គ្រប់គ្រាន់ និងមាននិរន្តភាព។

ការស្នើសុំរបស់លោកអភិបាលខេត្តកណ្តាលនេះបានធ្វើឡើងនៅព្រឹកថ្ងៃទី០២ខែវិច្ឆិកាឆ្នាំ២០២១ ក្នុងឱកាសអនុញ្ញាតឱ្យប្រតិភូរដ្ឋាករទឹកស្វយ័តក្រុងភ្នំពេញ ក្រោម​ការ​ដឹកនាំដោយលោកឡុង ណារ៉ូ អគ្គនាយករដ្ឋករទឹកស្វយ័តក្រុងភ្នំពេញចូលជួបសំដែងការគួរសមនៅសាលាខេត្តកណ្ដាល។

លោក អភិបាលខេត្តបានមានប្រសាសន៍ថា « បច្ចុប្បន្ននេះក្រុងតាខ្មៅមានសង្កាត់ចំនួន៤ ដែលទើបកាត់មកពីស្រុកស្អាង នៅមិនទាន់មានទឹកប្រើប្រាស់គ្រប់គ្រាន់នៅឡើយទេ ដូច្នេះខ្ញុំស្នើសុំដល់រដ្ឋករទឹកស្វយ័តក្រុងភ្នំពេញ សូមជួយសិក្សាបន្ថែម និងរកដំណោះស្រាយធ្វើយ៉ាងណាឱ្យប្រជាពលរដ្ឋនៅសង្កាត់ចំនួន៤ ដែលទើបកាត់មកពីស្រុកស្អាង ឱ្យមានទឹកស្អាតប្រើប្រាស់គ្រប់គ្រាន់ និងធានាដល់និរន្តភាពផងដែរ»។

ក្នុងជំនួបនេះដែរ លោក ឡុង ណារ៉ូ អគ្គនាយករដ្ឋករទឹកស្វយ័តក្រុងភ្នំពេញ បានជម្រាបជួនលោកអភិបាលខេត្តកណ្តាលពីគម្រោងក្នុងការផ្គត់ផ្គង់ទឹក សម្រាប់ក្រុងតាខ្មៅទាំងមូល នៅក្នុងផែនការឆ្នាំ២០២៤ និងទិសដៅឆ្នាំ២០៣០ ខាងនេះ។

លោកឡុង ណារ៉ូ បានលើកឡើងថា នៅក្នុងឆ្នាំ២០២៤ ខាងមុខនេះ រដ្ឋាករទឹកស្វយ័តភ្នំពេញ នឹងអាចផលិតទឹកបន្ថែមបាន ៣ម៉ឺនម៉ែត្រគីបបន្ថែមទៀត សម្រាប់ប្រើប្រាស់នៅក្រុងតាខ្មៅ និងនៅឆ្នាំ២០៣០ ហើយរដ្ឋាករស្វយ័តក្រុងភ្នំពេញ គ្រោងនឹងបង្កើតរោងចក្របន្ថែមក្នុងក្រុងតាខ្មៅ ដែលអាចផលិតទឹកបាន ៦ម៉ឺនម៉ែត្រគីបបន្ថែមទៀត ដែលអាចផ្គត់ផ្គង់បាននៅទូទាំងក្រុងតាខ្មៅ ពិសេសបានពង្រីកនូវវិសាលភាព ប្រើប្រាស់បានគ្រប់គ្រាន់ នៅក្នុងព្រលានយន្តហោះអន្តរជាតិភ្នំពេញថ្មីផងដែរ។

ទន្ទឹមនឹងនោះផងដែរ លោកអគ្គនាយក បានបន្ថែមថា រដ្ឋាករទឹកស្វយ័តភ្នំពេញ និងពង្រីកវិសាលភាពរបស់ខ្លួន សម្រាប់ភូមិសាស្រ្តខេត្តដែលជាប់ព្រំប្រទល់រាជធានីភ្នំពេញ ឱ្យមានទឹកប្រើប្រាស់គ្រប់គ្រាន់ និងមានតម្លៃដូចនៅរាជធានីភ្នំពេញផងដែរ។

លោកអគ្គនាយកបានបញ្ជាក់ថាក្នុងនោះដែរ ក្នុងក្រុងតាខ្មៅនឹងមានការពង្រាយទីយោទឹកទំហំ ៦០សង់ទីម៉ែត្រ នៅត្រង់ផ្លូវជាតិលេខ២១ និងផ្លូវជាតិលេខ ២ ឆ្ពោះទៅព្រែកហូរ ។

លោកអគ្គនាយក បានស្នើដល់អាជ្ញាធរគ្រប់ជាន់ថ្នាក់ ពិសេសរដ្ឋបាលខេត្ត សូមជួយសហការ និងគាំទ្រនូវការអនុវត្តគម្រោងនេះ ដើម្បីឱ្យទទួលបាននូវលទ្ធផលល្អផងដែរ៕

អត្ថបទ៖ សំអឿន