លោក ជិន ម៉ាលីន ៖ ការ​​អនុវត្តច្បាប់របស់កម្ពុជា មិនសំខាន់​​អ្នកនោះ ជា​សកម្មជន​សិទ្ធិមនុស្ស ឬសកម្មជន​នយោបាយ​​​នោះទេ​​

លោក ជិន ម៉ាលីន អនុប្រធាន និងអ្នកនាំពាក្យគណៈកម្មាធិការសិទ្ធិមនុស្សកម្ពុជា ​បានថ្លែងប្រាប់កម្ពុជាថ្មី​នៅថ្ងៃនេះ ថា ការ​​អនុវត្តច្បាប់របស់កម្ពុជា មិនសំខាន់អ្នកនោះជា​សកម្មជន​សិទ្ធិមនុស្ស ឬសកម្មជននយោបាយ​​​នោះទេ ឲ្យតែបង្កសកម្ម​ភាព​បំពានច្បាប់ បង្កើតជាបទល្មើសតាមបញ្ញត្តិច្បាប់របស់កម្ពុជា ​គឺត្រូវតែទទួលខុសត្រូវតាមផ្លូវច្បាប់​។

ការលើកឡើង របស់មន្រ្តីជាន់ខ្ពស់គណៈកម្មាធិការសិទ្ធិមនុស្សកម្ពុជានេះ​ បាន​ធ្វើឡើងបន្ទាប់ពី​​​អ្នកជំនាញសិទ្ធិមនុស្ស ​​របស់អង្គការសហប្រជាជាតិ បាន​ធ្វើសេចក្តីថ្លែងការណ៍មួយ ​ស្នើឲ្យកម្ពុជា​បញ្ឈប់ការប្រើប្រាស់តុលាការ ដើម្បីផ្តន្ទាទោសលើអ្នកហ៊ាននិយាយអំពីសិទ្ធិមនុស្ស​ ហើយបើតាមរបាយការណ៍របស់​អ្នកជំនាញ​ទាំងនោះ ​​បាន​ផ្តោត​តែទៅលើ​សំណើរឿងមួយ​ចំនួន​ ដែលគេចាត់ទុកថា ក្រុមសកម្មជន​សិទ្ធិមនុស្ស ឬសកម្មជននយោបាយ ហើយត្រូវបាន​តុលាការធ្វើការចោទប្រកាន់ និងផ្តន្ទាទោសកាលពីថ្មីៗនេះ​។​

លោក ជិន ម៉ាលីន ​លើកឡើងថា ការវាយតម្លៃ និងចោទប្រកាន់​របស់អ្នកជំនាញសិទ្ធិមនុស្សរូបនេះ មិនខុស​អ្វី​ទៅនឹងការវាយតម្លៃ និងចោទប្រកាន់របស់ក្រុមអង្គការសង្គមស៊ីវិល ដែល​មាននិន្នាការប្រឆាំងរាជរដ្ឋាភិបាល នោះទេ។ មានន័យថា សម្រាប់ពួកគេការវាយតម្លៃ ដោយផ្អែកទៅលើទិដ្ឋភាពខាងក្រៅ គឺឲ្យតែសមត្ថកិច្ចអនុវត្តច្បាប់ ទៅលើក្រុមសកម្មជន​សិទ្ធិមនុស្ស ឬសកម្មជននយោបាយ ដែលជាគោលដៅ ដែលក្រុមពួកគេការពារ ពួកគេចាត់ទុកថា នោះគឺជា​ការរំលោភសិទ្ធិសេរីភាពប្រជាពលរដ្ឋ។

លើសពីនេះទៀត ពួកគេធ្វើការចោទប្រកាន់ថា ជាការធ្លាក់ចុះ នូវលំហប្រជាធិបតេយ្យ ឬលំហនយោបាយជាដើម។ ប៉ុន្តែពួកគេមិន​បានពិនិត្យ ទៅលើ​សកម្មភា​ព​របស់សកម្មជនទាំងនោះទេ​ថា ជាការអនុវត្តសិទ្ធិ​តាមបែបប្រជាធិបតេយ្យ ឬជាសកម្មភាពមួយ​បង្កើតជាបទល្មើសតាមច្បាប់​របស់កម្ពុជា គឺគាត់មិនបានពិចារណា ទៅលើ​ចំណុចទាំងអស់នោះទេ។

លោកបានគូសបញ្ជាក់ថា «​តាមច្បាប់កម្ពុជា មិនសំខាន់​អ្នកនោះ ជាសកម្មជន ឬមិនសកម្មជននោះទេ ឲ្យតែសកម្ម​ភាពទាំងនោះ ធ្វើឲ្យប៉ះពាល់ដល់សន្តិសុខសង្គម សន្តិសុខជាតិ បំពានច្បាប់ បង្កើតជាបទល្មើសតាមបញ្ញត្តិច្បាប់របស់កម្ពុជា ហើយមានមូលដ្ឋាន ភស្តុតាង សក្ខីកម្ម ផ្លូវច្បាប់រឹងមាំ ក្នុងការចោទប្រកាន់ និងនីតិវិធីផ្លូវច្បាប់ តាមផ្លូវតុលាការ អ្នកនោះត្រូវតែទទួលខុសត្រូវតាមផ្លូវច្បាប់ ចំពោះអំពើល្មើសរបស់ខ្លួន។ ទោះបីជាអ្នកនោះ ជាសកម្មជន ឬមិនសកម្មជន​ក៏ដោយ នេះគឺជាមូលដ្ឋាន នៃការអនុវត្តច្បាប់របស់សមត្ថកិច្ច។ មិនផ្អែកទៅលើរូបភាព ឬមិនផ្អែកទៅលើក្រុមមនុស្សណានោះទេ​ គឺផ្អែកទៅលើទិដ្ឋភាពច្បាប់របស់កម្ពុជា»។

បើតាមលោក ជិន ម៉ាលីន សម្រាប់សមត្ថកិច្ច ក៏ដូចជារាជរដ្ឋាភិបាល ការអនុវត្តច្បាប់ ត្រូវធ្វើជាទូទៅមិនចំពោះ អ្នកនោះជាសកម្មជន ឬមិនសកម្មជននោះទេ ឲ្យទៅធ្វើសកម្មភាព បង្កើតជាបទល្មើសតាមច្បាប់ របស់កម្ពុជា អ្នកទាំងនោះ នឹងត្រូវប្រឈមមុខចំពោះផ្លូវច្បាប់ដូចគ្នា។

ចំពោះ​​ការប្រើប្រាស់​យន្តការតុលាការ ដើម្បីទប់ស្កាត់បទល្មើស ដោយផ្អែកទៅលើមូលដ្ឋានច្បាប់​ និងទិដ្ឋភាពច្បាប់ ​​គឺជា​វិធានការ​តែមួយ​ នៅក្នុងសង្គមប្រជាធិបតេយ្យ ក្នុងការលើកស្ទួយសិទ្ធិមនុស្ស និងនីតិរដ្ឋ មិនមែនជាយន្តការក្នុងការកៀបសង្កត់, ធ្វើទុកបុកម្នេញ ឬក៏រឹតត្បិតសិទ្ធិសេរីភាព នោះទេ។

លោកថា ការអនុវត្តសិទ្ធិ សេរីភាព​​តាមផ្លូវច្បាប់ គឺ​ត្រូវតែទួតទទួលបានការការពារតាមផ្លូវច្បាប់។ ក៏ប៉ុន្តែការប្រព្រឹត្តអំពើល្មើសនឹងច្បាប់ ​ក៏ត្រូវតែប្រឈមមុខ នឹងទទួលខុស​ត្រូវចំពោះមុខច្បាប់ផងដែរ មិនអាចយកលេស ឬរូបភាព នៃការអនុវត្តសិទ្ធិមកបិទបាំងអំពើល្មើស ដើម្បីឲ្យរួចផុតពីការចោទប្រកាន់ នោះទេ៕

អត្ថបទ៖ កោះកែវ