«គម្រោងប្លាស្ទិកដូរយកអង្ករ» ជួយកាត់បន្ថយ​ការបំពុលដោយប្លាស្ទិកប្រមាណ ១០០តោន​ក្នុង១ឆ្នាំនៅបឹងទន្លេសាប

នៅក្នុងឱកាសចុះពិនិត្យ«គម្រោងប្លាស្ទិកដូរយកអង្ករ»អនុវត្តដោយមូលនិធិទំពាំងស្នង ឫស្សី គាំទ្រដោយក្រសួងបរិស្ថាន នៅថ្ងៃទី៩ ខែធ្នូ ឆ្នាំ២០២១ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានវាយតម្លៃខ្ពស់ថា គម្រោងប្លាស្ទិកដូរយកអង្ករ ដែលបានអនុវត្តតាំងពីឆ្នាំ២០១៨ នៅលើបឹងទន្លេសាបក្នុងភូមិសាស្ត្រខេត្តសៀមរាប ជាមួយពលរដ្ឋតាមសហគមន៍នានាបានជួយកាត់បន្ថយការបំពុលបឹងទន្លេសាបដោយប្លាស្ទិក ព្រមទាំងបានចូលរួមការពារបរិស្ថាននិងចូលរួមការពារជីវៈចម្រុះនៅបឹងទន្លេសាប ដែលជាបឹងទឹកសាបដ៏ធំជាងគេនៅអាស៊ីអាគ្នេយ៍។

លោក នេត្រ ភក្រ្តា បានគូសបញ្ជាក់ថា ក្នុងមួយឆ្នាំៗ គម្រោងនេះបានកាត់ បន្ថយការបំពុលដោយប្លាស្ទិកប្រមាណ ១០០តោនទាំងប្លាស្ទិកសើម និងស្ងួត មិនឱ្យបំពុលបឹងទន្លេសាប។

បច្ចុប្បន្នក្រសួងបរិស្ថាន កំពុងតែយកចិត្តទុកដាក់ និងជំរុញការញែកសំរាមតាមប្រភេទ ដូចជា ញែកសំរាមសរីរាង្គ ដើម្បីយកវាទៅធ្វើជាជីកំប៉ុស និងញែកសំណល់ប្លាស្ទិក ដើម្បីយកទៅកែច្នៃបន្ត ។ ហើយក្រសួងក៏កំពុងជំរុញដល់ការអនុវត្តិគោលការ៤ R ផងដែរ គឺកាត់បន្ថយការប្រើប្រាស់ប្លាស្ទិកកែច្នៃឡើងវិញ ការប្រើប្រាស់ឡើងវិញ និងការបដិសេធការប្រើប្លាស្ទិកតែម្ដង៕ ទួន សុផល