អាជ្ញាធរខណ្ឌពោធិ៍សែនជ័យសំអាតស្ពានអាកាសថ្មើរជើង បន្ទាប់មានការរិះគន់ពីពលរដ្ឋ

បន្ទាប់ពីមានការរិះគន់ពីសំណាក់ប្រជាពលរដ្ឋអំពីការចោលសំរាម និងកាសសំណល់ជាច្រើននៅ​លើ​ស្ពានអាកាសថ្មើរជើងនៅផ្លូវជាតិលេខ៤នោះ នៅព្រឹកថ្ងៃទី៦ ខែមករា ឆ្នាំ២០២២នេះ កម្លាំង​អាជ្ញាធរសង្កាត់​ចោមចៅ​ទី​៣ ខណ្ឌ​ពោធិ៍សែន​ជ័យ បានធ្វើការបោសសំអាតដើម្បីលើក​សោភ័ណភាព​និសណ្ដាប់ធ្នាប់សាធារណៈ។

បើតាមព្រជាពលរដ្ឋបានបង្ហើបឲ្យដឹងថា ស្ពានអាកាសថ្មើរជើ​ង​នៅផ្លូវជាតិ​លេខ​៤ ស្ថិតក្នុង​ភូមិ​ជម្ពូ​វ័ន សង្កាត់​ចោមចៅ​ទី​៣ ជាជម្រក​ក្រុម​ជនអនាថា​និង​ជន​ញៀន​ថ្នាំ យក​សំរាម​រួច​ទាំង​សម្លៀកបំពាក់​ចាស់ៗ​ទៅ​បោះចោល​ទីនោះ​ ធ្វើ​ឱ្យ​ប៉ះពាល់​បរិស្ថាន​សោភ័ណភាពហើ​យ​ត្រូវបាន​មានការ​រិះគន់​ពី​សំណាក់​ប្រជាពលរដ្ឋ​តាម​បណ្តាញ​សង្គមផងដែរ​។​

ពលរដ្ឋ​បានបន្តថា ទីតាំង​ស្ពាន​អាកាស​ថ្មើ​រជើ​ង​ខាង​លើ​កន្លងមក​ នៅ​ពេលយប់​ស្ងាត់​គឺមាន​ក្រុម​ជនអនាថា​មក​បន្ទោបង់ ​និង​ចោល​សំរាម​នៅ​ខាង​លើ​ស្ពាន​ជា​ញឹកញាប់​ ធ្វើឱ្យមានសំរាម​ជាច្រើន​នៅរាយប៉ាយលើស្ពាននេះផងដែរ៕​

អត្ថបទ៖ សុខា​