ព័ត៌មានជាតិ

សម្តេចចៅហ្វាវាំង គង់ សំអុល បាននាំយកព្រះរាជទ្រព្យជាព្រះរាជទានដ៏ថ្លៃថ្លារបស់សម្តេចព្រះមហាក្សត្រី ១០ ម៉ឺនដុល្លារអាមេរិក ទៅប្រគល់ជូនមន្ទីរពេទ្យគន្ធបុប្ផា

បានផុស

៤ years មុន

នៅ

ថ្ងៃពុធ ១២ មករា ២០២២

ដោយ

នៅថ្ងៃទី ១២ ខែមករា ឆ្នាំ ២០២២ តាមព្រះរាជតម្រិះដ៏ខ្ពង់ខ្ពស់បំផុតរបស់សម្តេចព្រះមហាក្សត្រី ព្រះវររាជមាតាជាតិខ្មែរ នៃព្រះរាជាណាចក្រកម្ពុជា សម្តេចចៅហ្វាវាំង គង់ សំអុល បាននាំយកព្រះរាជទ្រព្យជាព្រះរាជទានដ៏ថ្លៃថ្លារបស់សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ចំនួន ១ សែនដុល្លារអាមេរិក ទៅប្រគល់ជូនមន្ទីរពេទ្យគន្ធបុប្ផា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលិខិតមានអត្ថន័យថា៖ បពិត្រសម្តេចព្រះមហាក្សត្រី ជាទីគោរពសក្ការៈដ៏ខ្ពង់ខ្ពស់បំផុត!

តាមព្រះរាជតម្រិះដ៏ខ្ពង់ខ្ពស់បំផុតរបស់ សម្តេចព្រះមហាក្សត្រី ព្រះវររាជមាតាជាតិខ្មែរ នៃព្រះរាជាណាចក្រកម្ពុជា។ សម្ដេចចៅហ្វាវាំងវរវៀងជ័យអធិបតីស្រីង្គារ គង់ សំអុល ឧបនាយករដ្ឋមន្ត្រី និងជា

រដ្ឋមន្ត្រីក្រសួងព្រះបរមរាជវាំង បាននាំយកព្រះរាជទ្រព្យ ជាព្រះរាជទានដ៏ថ្លៃថ្លា របស់ សម្ដេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ចំនួន ១០ ម៉ឺនដុល្លារអាមេរិក ប្រគល់ជូនមន្ទីរពេទ្យគន្ធបុប្ផា ។

ទូលបង្គំ ខ្ញុំម្ចាស់ យើងខ្ញុំ ជាកូនចៅ ចៅទួតទាំងអស់គ្នា សូមព្រះបរមរាជានុញ្ញាត ក្រាបបង្គំថ្វាយ នូវកតញ្ញូតាធម៌ និងអរព្រះរាជគុណ ដ៏ជ្រាលជ្រៅជាទីបំផុត ចំពោះព្រះរាជ ហឫទ័យដ៏ឧត្តុង្គឧត្តមថ្លៃថ្លាខ្ពង់ខ្ពស់ជាទីបំផុត របស់សម្ដេចព្រះមហាក្សត្រី ព្រះវររាជមាតា ជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ដែលជានិច្ចកាល ព្រះអង្គតែងតែគិតគូរ យកព្រះទ័យទុកដាក់ ដល់សុខុមាលភាពរបស់កូនចៅ ចៅទូតរបស់ព្រះអង្គ ។

ទូលព្រះបង្គំយើងខ្ញុំទាំងអស់គ្នា សូមលើកអញ្ជលីប្រណមបួងសួងដល់គុណបុណ្យ ព្រះរតនត្រ័យ គុណកែវទាំងបី អធិដ្ឋានដល់ព្រះបារមីនៃទេវតាថែរក្សាព្រះមហាស្វេតច្ឆត្រ និង ព្រះឫទ្ធានុភាពនៃព្រះវិញ្ញាណក្ខន្ធ អតីតព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ ព្រម ទាំងវត្ថុស័ក្ដិសិទ្ធិក្នុងលោក ជាពិសេសសូមដួងព្រះវិញ្ញាណក្ខន្ធ ព្រះករុណាព្រះបាទសម្ដេច នរោត្តម សីហនុ ព្រះមហាវីរៈក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាព ជាតិខ្មែរ «ព្រះបរមរតនកោដ្ឋ» សូមតាមជួយទ្រទ្រង់ថែរក្សាការពារ សម្តេចព្រះមហាក្សត្រី ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត សូមព្រះអង្គមានព្រះរាជសុខភាព ល្អបរិបូរណ៍ ព្រះជន្មាយុយឺនយូរ ព្រះកាយពលមាំមួន ព្រះបញ្ញាញាណភ្លឺថ្លា ដើម្បីទ្រង់គង់ប្រថាប់ ជាម្លប់ដ៏ត្រជាក់ត្រជំ ដល់ប្រជារាស្ត្រខ្មែរ លើទឹកដីនៃព្រះរាជាណាចក្រកម្ពុជា សម្បូរសប្បាយថ្កុំថ្កើង រុងរឿងជានិច្ចនិរន្តរតរៀងទៅ។ សេចក្តីគួរពុំគួរ សូម សម្ដេចព្រះមហាក្សត្រី ព្រះវររាជមាតាជាតិខ្មែរ ទ្រង់ព្រះមេត្តាប្រោស៕