ដើមទំពាំងព្រិច​ គេ​យក​មក​ធ្វើ​ម្ហូប​មាន​រស​ជាតិឆ្ងាញ់​ពិសេស

រុក្ខជាតិព្រៃមួយប្រភេទ ដែលគេហៅថា ទំពាំងព្រិចនៅប៉ុន្មានថ្ងៃមកនេះ មានភ្លៀងកក់ខែ វាបានចាប់ផ្តើមដុះ ត្រូវបានអ្នកស្រុក កាត់យកមកធ្វើម្ហូប និងលក់នៅលើទីផ្សារខេត្តស្ទឹងត្រែង។

អ្នកភូមិបាននិយាយថា ជាច្រើនឆ្នាំកន្លងមកគេហាក់បីដូចមិនចាប់អារម្មណ៍ពីបន្លែព្រៃមួយមុខនេះទេ តែពេលនេះទំពាំងព្រិច បានក្លាយជាម្ហូបអាហារដ៏ពិសេសលក់នៅលើទីផ្សារ។

ទំពាំងព្រិចត្រូវបានគេប្រទះឃើញដុះតាមព្រៃព្រិចព្រៃរបោះ ក្នុងខេត្តសម្បូរព្រៃឈើ ដូចជាខេត្តស្ទឹងត្រែង រតនគិរី មណ្ឌលគិរី ជាដើម។

អ្នកភូមិបាននិយាយបន្តទៀតថា នៅនៅពេលមានភ្លៀងកក់ខែ ឬដើមខែវស្សាមានភ្លៀងធ្លាក់ម្ដងពីរដងនៅក្នុងព្រៃ ធ្វើឱ្យធនធានធម្មជាតិ ជីវៈចម្រុះ លូតលាស់ ស្រស់បំព្រង។

ដើមទំពាំងព្រិច ដែលកំពុងតែបញ្ចេញបណ្ដូលខ្ចីគួរជាទីគយគន់បានផ្លាស់ប្តូរតាមរដូវកាលធម្មជាតិត្រូវអ្នកស្រុកដើរកាត់យកមកធ្វើម្ហូប និងសល់ពីការហូប បានយកទៅលក់នៅលើទីផ្សារ។

អ្នកភូមិបានបន្តថាទំពាំងព្រិច  យើងអាចយកធ្វើជាម្ហូបមានដូចជា ធ្វើអន្លក់ (ទឹកគ្រឿង) ចុចប្រហុកជាមួយម្ជូរក្រសាំង ស្ងោរទំពាំង ឆា សម្លប្រហើរម្សៅ សម្លខ្ទិះដូង ខជើងជ្រូក ធ្វើជ្រក់ទំពាំងព្រិច។

ទំពាំងព្រិចមិនត្រឹមធ្វើជាម្ហូបសម្រាប់មនុស្សទេក៏ជាចំណីសម្រាប់សត្វព្រៃដូចជាសត្វទន្សោង សត្វឈ្លូស ជ្រូកព្រៃ-ល-ដែលកំពុងរស់នៅក្នុងតំបន់ដែនជម្រកសត្វព្រៃធម្មជាតិផងដែរ៕

អត្ថបទ៖ ងិនលីម