បិទស្ទីកឃ័រចំណាំងផ្លាត លើគោយន្តកន្ត្រៃយ៍ចំនួន ២១៥គ្រឿង​ នៅស្រុកឆែប​​

ក្រុមការងារមន្ទីរសាធារណការ​ និងដឹកជញ្ជូនខេត្តព្រះវិហារ​ចំនួន​ ៤នាក់ បានសហការជាមួយ​អាជ្ញាធរស្រុកឆែប​ នគរបាលចរាចរណ៍​ស្រុក​ ស.ស.យ.កស្រុ​ក កាលពីថ្ងៃទី ៣ ខែមីនា ឆ្នាំ ២០២២​ បានចុះ​​ផ្សព្វផ្សាយអំពីសុវត្ថិភាពចរាចរណ៍​ និងបិទស្ទីកឃ័រចំណាំងផ្លាត លើគោយន្តកន្ត្រៃ​ចំនួន​ ២១៥គ្រឿង​ ក្នុងឃុំចំនួន ២ ក្នុងស្រុកឆែប ខេត្តព្រះវិហារ​​ ដើម្បីការពារករណីគ្រោះថ្នាក់ចរាចរណ៍។

លោក​ សំ​ លាងទ្រី​ ប្រធានមន្ទីរសាធារណការ និងដឹកជញ្ជូនខេត្តព្រះវិហារ​ បានឲ្យដឹងថា នៅថ្ងៃទី ៣ ខែមីនា ឆ្នាំ ២០២២ ក្រុមការងាររបស់លោក បានចុះ​​ផ្សព្វផ្សាយអំពីសុវត្ថិភាពចរាចរណ៍​ និងបិទស្ទីកឃ័រចំណាំងផ្លាត លើគោយន្តកន្ត្រៃ​ចំនួន​ ២១៥គ្រឿង​ ក្នុងឃុំចំនួន ២​ ដែលមានប្រជាពលរដ្ឋចូលរួមចំនួន​ ២៣០នាក់​ ស្រី ៦២នាក់​ ដើម្បីជាការដាស់តឿន ដល់អ្នកបើកបរគោយន្តកន្ត្រៃយ៍ ឲ្យមានការប្រុងប្រយ័ត្នខ្ពស់ ក៏ដូចជាចែករំលែកនូវចំណេះដឹងបន្ថែម អំពីច្បាប់ចរាចរណ៍ផ្លូវគោក​ ក្នុងគោលបំណងរួមចំណែកកាត់បន្ថយ គ្រោះថ្នាក់ចរាចរណ៍​ឲ្យស្ថិតមកនៅ កម្រិតទាប។

ក្នុងនោះដែរ ក៏បានផ្សព្វផ្សាយអំពីវិធានសុខាភិបាល ៣កុំ ៣ការពារ បញ្ហាគ្រឿងញៀន និងជំងឺអេដស៍ផងដែរ​។ ក្រុមការងារ ក៏បានប្រគល់ជូននូវឯកសារផ្សព្វផ្សាយ អំពីសុវត្ថិភាពចរាចរណ៍ ជូនដល់​ នគរបាលចរាចរណ៍ អាជ្ញាធរ​ ភូមិ-ឃុំ​ ដើម្បីជួយផ្សព្វផ្សាយបន្ត៕

អត្ថបទ៖ ស្រីរ័ត្ន