លោកស្រី ឆាយ ស៊ីវលីន៖ ការដោះចេញ​របាំងរិតត្បិតនានា អាចទាក់ទាញភ្ញៀវទេសចរ​បរទេសឡើងវិញ

ក្រសួងទេសចរណ៍ បានសម្រេចលុបចោលលក្ខខណ្ឌតម្រូវឲ្យបង្ហាញលទ្ធផល PCR តេស្តអវិជ្ជមានរយៈពេល ៧២ម៉ោងមុនពេលមកដល់ សម្រាប់ប្រតិបត្តិករទេសចរណ៍ ទេសចរជាតិ អន្តរជាតិ និងអ្នកដំណើរទាំងអស់ ចាប់ពីថ្ងៃទី ១៧ ខែមីនា នេះតទៅ។ លើសពីនេះទៀត ក្រសួងក៏សម្រេចលុបលក្ខខណ្ឌតម្រូវឲ្យធ្វើតេស្តរហ័សពេលមកដល់ និងដាក់ឲ្យដំណើរការឡើងវិញ នូវការផ្តល់ទិដ្ឋាការពេលមកដល់ នៅគ្រប់ច្រកទ្វារអន្តរជាតិទាំងអស់ តាមផ្លូវគោក ផ្លូវអាកាស និងផ្លូវទឹក ដោយបំពេញលក្ខខណ្ឌនានា ដូចធ្លាប់បានអនុវត្តមុនពេលកូវីដ-១៩។

ការលុបចោលលក្ខខណ្ឌទាំងអស់នេះ បង្កលក្ខណៈងាយស្រួលដល់ភ្ញៀវទេសចរដែលមានបំណងចូលកម្ពុជា។ កន្លងមកបើទោះបីយើងបានប្រកាសបើកប្រទេសតាំពីពីរបីខែមកហើយក្តី តែនៅ ត្រូវការឯកសារនានា ដែលជារបាំងមួយ ធ្វើឲ្យភ្ញៀវទេសចរ មានការលំបាក និងស្មុគស្មាញ។ នេះបើតាមការលើកឡើងរបស់លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា។

លោកស្រី បញ្ជាក់ប្រាប់កម្ពុជាថ្មី នៅល្ងាចថ្ងៃទី ១៧ ខែមីនាថា «ការដោះចេញលក្ខខណ្ឌទាំងអស់នេះ ធ្វើឲ្យភ្ញៀវមិនលំបាក និងមានសម្ពាធអ្វីឡើយ»។

បើតាមអ្នកជំនាញវិស័យទេសចរណ៍រូបនេះ បច្ចុប្ប​ន្នមានការកើនឡើងភ្ញៀវទេសចរបរទេស ប៉ុន្តែក្នុងកម្រិតមិនច្រើន កើនឡើងយឺត ដោយសាររបាំងនៃការធ្វើដំណើរ ដូចជាកម្រូវការ​ឯកសារជាដើម។ ការដោះចេញនៃការរិតត្បិត អាចនឹងកើនឡើងវិញ នូវវិស័យដឹកជញ្ជូន ក្រុមហ៊ុនដឹកជញ្ជូននឹងពិចារណា ក្នុងការបើកជើងហោះហើរ និងមធ្យោបាយធ្វើដំណើរកាន់តែសម្បូរបែប ជំរុញឲ្យភ្ញៀវទេសចរចង់មកកម្ពុជា កាន់តែច្រើន។

លោកស្រី ស៊ីវលីន បានឲ្យដឹងថា  ទីផ្សារធំសម្រាប់វិស័យទេសចរកម្ពុជា មានប្រទេសថៃ វៀតណាម ម៉ាឡេស៊ី ហ្វីលីពីន ឥណ្ឌូនេស៊ី និងឥណ្ឌា ជាដើម។ ការហោះហើរចូលកម្ពុជា បានចាប់ផ្តើមកើនឡើងវិញ មានដូចជា ជើងហោះហើរពីបាងកកមករាជធានីភ្នំពេញ មានមកពីហ្វីលីពីន តៃវ៉ាន់ និងកូរ៉េ។ ចំណែកប្រទេសជប៉ុន និងម៉ាឡេស៊ី កំពុងពិចារណារៀបចំហោះចូលមកកម្ពុជាផងដែរ។

​សមាគមទីភ្នាក់ងារទេសចរណ៍កម្ពុជា កំពុងធ្វើយុទ្ធសាស្រ្ត និងផែនការ ដើម្បីចាប់យកទីផ្សារដែលមានសក្កានុពល មានដូចជា ប្រទេសថៃ ម៉ាឡេស៊ី និងប្រទេសភីលីពីនជាដើម។

ខណៈដែលវិស័យទេសចរណ៍ ចាប់ផ្តើមងើបឡើងវិញបន្តិចម្តងៗ លោកស្រី ឆាយ ស៊ីវលីន ព្រួយបារម្ភថា សង្រ្គាមនៅអ៊ុយក្រែន និងរុស្ស៊ី ចាប់ផ្តើមប៉ះពាល់ដល់វិស័យទេសចរណ៍ ជាពិសេសការឡើងថ្លៃប្រេង បានប៉ះពាល់ដល់កញ្ចប់ទស្សនៈកិច្ច។ មានន័យថា «ការចាប់ផ្តើមបើកប្រទេស យើងបានដាក់ចេញកញ្ចប់តម្លៃទៅឲ្យដៃគូលក់នៅក្រៅប្រទេស បើប្រេងឡើងថ្លៃភ្លាមៗដូច្នេះ ប្រាកដណាស់ថា នឹងប៉ះពាល់ដល់តម្លៃនៃកញ្ចប់ទស្សនៈកិច្ចដែលយើងបានដាក់ចេញទៅ ហើយយើងលក់អត់កើតព្រោះអ្នកផ្គត់ផ្គង់សេវាដឹកជញ្ជូនក៏ដំឡើងថ្លៃទៅតាមប្រេងនេះដែរ»។

យោងតាមរបាយការណ៍របស់ក្រសួងទេសចរណ៍ បានឲ្យដឹងថា កាលចុងសប្តាហ៍កន្លងទៅ កម្ពុជាទទួលបានភ្ញៀវជាង ២៥ម៉ឺននាក់ កើនឡើងប្រមាណ ២៧.៣០% ធៀបនឹងចុងសប្តាហ៍កន្លងទៅមួយ ក្នុងនោះភ្ញៀវជាតិមានជាង ២៤ម៉ឺននាក់ និងភ្ញៀវបរទេសផ្ទៃក្នុងជាង១ម៉ឺននាក់៕